بسم الله الرحمن الرحيم
السلام عليكم و رحمة الله و بركاته

كما وعدت امبارح بنزول تقريرعن تغيير كاوتش الالتو
فقد وفيت بوعدي و ها هو التقرير اينعم متأخر حوالي اسبوعين بس الواحد كان مشغول و بيدخل موبايل
و متقلقوش لوللا هتخليني املي القسم تقارير لأنها قايمة بالواجب معايا شوية


المهم الكاوتش اللي راكب في العربية من اول ما جبتها كان جوود يير هندي اللي فعلا ميتعوضش و ما شاء الله عاش حوالي 70 - 80 الف لمدة 4 سنين و النقشة راحت لا فردة اتلوحت و لا فرقعت و الاستبن كانت باقية معايا كمان لحد ما غيرت دول

و المقاس الستوك 13/145/70
و ديه شكل النقشة اللي كانت راكبة



المقاس المعدل بعد الجوود يير 13/165/65
و محدش يفكر يزود عن كده ابدا ده هيرفع العربية معاك شوية في المطبات و في نفس الوقت ثبات و تقدر تقول راكب في العربية ع الشعرة

بخصوص اللي ركب بعد ما الجوود يير جابت جاز هو كاوتش فولدا او المشهور هنا بـ فولدا الماني لكن هو اتحاد اوروبي صنع في بولندا و الجوود يير الجديد اللي بينزل لما سألت توكيله قالي بولندي برده
الفولدا فردة كويسة مش وحشة بس ناشفة شوية و حاول بقدر الامكان تجيبها من مكان بيحفظ الكاوتش كويس و تاريخ انتاجها يكون حديث جدااا

و ديه النقشة اللي كنت مركبها اللي هي ايكو كونترول نقشة الفصول الاربعة




المهم بعد سنتين من استخدام الفولدا حوالي 40 -50 الف ك
فردة ورا عندي فرقعت و لقيت قطع عرضي تقريبا حاجة حادة في الارض دخلت فيها متعرفش ايه اللي حصل و التانية اللي قصادها اتلوحت و فوجئت واحدة قدام بردهفيها لوحة بسيطة مع العلم كل ده النقشة ما شاء الله لسه بدري عليها كمان يعني بالميت تقعدلها كمان 15-20 الف

المهم كنت مضطر اغير فردتين في ساعتها و مركب الاستبن فلتتخيلوا الاستبن جوود يير كانت هي اللي باقية من 5 فرد قدام .... هتوحشيني يا غالية

المهم كنت مقرر اني ان شاء الله هركب هانكوك الكوري لانها فردة محترمة و خلوا بالكم عشان فيه صيني برده او نوع غريب مريب و يقولك هو الهانكوك شغل نصب يعني من المحلات و بيكلموا الزباين ع انهم من كوكب تاني
المهم نزلت لفيت لقيت واحد في احمد سعيد عنده هانكوك و حاطط اليافطة الهانكوك
و سعر الفردة 300 ج فقولت خلاص توكل ع الله و ركب
و ركبتهم هو الاصح لو فردتين بس جداد انك تركب الكاوتش الجديد ورا مش قدام و الأفضل الـ4 فرد يتغيروا و كده كده يومين و اغير فمش مشكلة
ركبت الفردتين و قولتله يومين بس و هاجي اخد منك الفردتين التانيين و متفقين ع نفس السعر و كنت ناوي اجيب بطارية هانكوك مع الفردتين سألته عليها قالي 350 تقريبا و ديلكو 400
و ساعتها احمد باشا alking_2006 كان برده عايز فرد كاوتش هانكوك فقولتله عليه

المهم روحتله بعدها زود عليا السعر و قالي الفردة بـ330 ج طبعا استغربت يا عم احنا مش متفقين و قولتلك كام يوم واعدي عليك و يقولي لأ أصل الاسعار زادت و شغل التهريج بتاع السوق اللي كلنا عارفينه يا عم زادت ازاي ده الكاوتش كمان انتاج اخر 2011 و نازلك بقاله شهر يعني كويس اني اخدها منك ده انت اللي محتاج تخلص منها لأ و جاي اركب بطارية كمان طبعا غاظتني الحركة اللي عملها مش السعر لكن يزود السعر عليا و يقولي أصل زادت فقولت خلاص يا عم متشكرين ع اللي انت عملته سلام عليكم و مشيت
كده كده مش مستعجل ع الفردتين ولا البطارية

الطريف في الامر لقيت فرد كومهو لكن سولو مش اكستا و انتاج حديث سعرها 300 ج في م نصر عند واحد فاتح جنب المصرية في الحي التامن و عند واحد فاتح في الحي السابع قدام هارديز بس خلاص انا رسيت ع هانكوك

لقيت واحد فاتح جديد في م نصر جنب سوق السيارات عالطول عنده فرد الهانكوك بكام يا عم و من هنا لهنا حسب الفردة بـ310 ج بالبلف بالنيتروجين و الترصيص و تزويد كل الكاوتش النيتروجين توكل ع الله و ركب مع العلم الراجل الاولاني لما قولتله هزود الفردتين اللي راكبين نيتروجين قالك لأ ديه لوحدها و ديه لوحدها مع انها مش هتفرق معاهو لا معايا لانها تزويد بس
المهم ركبت و جربت ما شاء الله احسن من الأول و الترصيص محترم و خليته يرصص كله باللي الاولاني عملهم تاني

و ديه نقشة الفردة اللي ركبتها





و اراكم في تقارير اخري ان شاء الله :)