الموضوع: انا قلقان ومش عارف صح ولا غلط

السلام عليكم ورحمة الله وبركاتة

انا اخدت بالى اول حاجه ان الشباب مش بيردو السلام :)

ردو السلام علشان تأخدو 30 حسنه :)

الله يكرمكم انا قلقان من اسبوع او اسبوع ونص كده كنت ماشى وفجأه لقيت العربيه بترجرج جامد ومش بتتحرك ووقفت على قضيب الترام

طبعآ نزلت ابص تحت لقيت المقص مش فى مكانه والمسمار طار ووبص ورا العربيه لقيت المسمار ولقيت الصليبه هربت من الكوبلن الداخلى طبعآ ما عرفتش اعمل حاجه لان حتى ماعيش عده اعمل اى حاجه

فضلت انا وكام واحد ولاد حلال نحاول نزقها مسافه اتنين متر علشان نركنها على الرصيف وطبعآ الدركسيون كان بيلف بمنتهى الصعوبه وقتها وانا كنت خايف جدآ لانى عارف انى كده بحمل على الاسكترا والحمد لله زقيناها ورفعت العربيه وفكيت العجله واتصلت بالميكانيكى وجالى بعديها بساعه الحمد لله انه جه اصلآ

وبعدين فك الاستبليزر وكان فى جوا صليبه الكوبلن طبق اتنطر وانا لقيته واديتهوله راح زنقه بفوطه صغيره وحط الكوبلن مكانه وربط المقص تانى وقالى المسمار اتقرطت عليه جامد ومافيش حاجه والله اعلم هو نط ليه

المهم قالى امشى بالراحه لحد الورشه طبعآ روحنا الورشه لقيت ابوه بيقولى بيتها عندك علشان الوقت متأخر وهنشتغل فيها الصبح

روحت والصبح روحتله تانى فك العفشه وطلع الكوبلن وقالى روح هات صليبه

ما لقيتش ولا صليبه ولا كوبلن الحمد لله محظوظ ومبخت من يومى امال ما ابقاش مصطفى

المهم رجعتله تانى قالى نعملها جلبه عمل جلبه حديد للطبق وحطله ورده على مقاسه وحط عليها سلك رباط وحط شحم كتير من العلبه اللى معايا شحم بلاستيك وربط الكاوتش من فوق وتحت بأفيز بلاستيك

ومشيت على كده

من وقتها وانا حاسس بقى ان الدركسيون بقى خفيف وساعات لما باجى اكسر الدركسيون كله يمين احس ان الدركسيون اتحط يعنى جاب اخره واتهبد على حاجه هى هبده بسيطه ومش جامده بس جديده وبقيت بأحس وانا ماشى ان الدركسيون بقى خفيف جدآ انا من وقتها وانا قلقان وكل ما انزل بالعربيه ابقى ملاحظها لدرجه انى هتجن

مع العلم ولا فى حدفه فى اى حته ولا مع الفرامل ولا مع الطوالى ولا حتى مع السرعه

وبحرك الدركسيون العجل بيتحرك عادى معاه مافيش تأخير فى الاسكترا

ايه الحل فى القلق اللى انا فيه هل هو عادى ولا حصل حاجه للأسكترا بعد ما حملت عليها

وهل لو ظبطت زوايا الدركسيون هيرجع لاصله ولا انا اللى قلقان ومافيش اى حاجه ؟


جزاكم الله كل خير

المهم رجعتله تانى قالى نعملها جلبه عمل جلبه حديد للطبق وحطله ورده على مقاسه وحط عليها سلك رباط وحط شحم كتير من العلبه اللى معايا شحم بلاستيك وربط الكاوتش من فوق وتحت بأفيز بلاستيك

الخطوة دي اعتقد مش صح دي بيسموها تلصيمة علي ماتفرج المفروض ترجع العربية زي ماطلعت من المصنع (روحت والصبح روحتله تانى فك العفشه وطلع الكوبلن وقالى روح هات صليبه
) بس كده والله اعلم