الموضوع: ياجماعة حد يرد عليا تابع مشاكل 128

بداية جزاكم الله كل خير والله انا سعيد جدا انا اول مرة ادخل واسفتدت كتير جدا منكم اعرفكم بنفسى انا مهندس مدنى ومعيد بكلية الهندسة ومعايا 128 موديل 87 والحمد لله هى كويسةولكن ينطبق عليها كل ما قيل فى هذا الموقع من مواضيع وخاصة تست الدرايف بتاع سبعاوى باشا ربنا يخليك لنا عندى شوية مشاكل ارجو الرد عليها من قبل كل ذى خبرة وعلم:

اولا:انا معايا الكبالن من 3 سنين وبقلها سنة ونصف بتطقطق فى الملفات فقط او فى اول الطلعة والعجل مكسور يمين او شمال وانا مطنشها لانى كل ما أقول لحد يقولى طنش مش مشكلة!!!!
هل تمثل خطورة لو ماغيرتهاش ؟ والمفروض تتغير كل قد ايه؟ ولو غيرتها احسن نوع ايه؟

ثانيا:البطارية باظت وروحت اجيب بطارية جديدة كنت بافكر فى بطارية جافة لقلة الصيانة ولكن الكهربائى نصحنى قالى دى تفضل للعربيات الجديدة بس لكن القديمة ممكن تبوظها بسرعة علشان ممكن يحصل مشاكل كتير فى الدينامو مثلا فتبوظها بسرعة اما البطارية السائلة لو حصل كده معاها ممكن نلحقا بالاضافة انها ارخص من الجافة وان نفس العمر الافتراضى واحد للبطاريتان ,رايكم ايه؟

ثالثا:المهم نفس الكلام سمعته من محل بيع البطاريات فاشتريت البطارية السائلة ولكن بعد ماشتريتها 4 يوم قولت اروح اجيب هيدرومتر لقياس مياه البطارية لقيت الترمومتر على اللون الاحمر يعنى عايزة شحن, السؤال بقى هل البطارية بايظة ولا عايزة تتحط على التونجر(الشاحن) ولا عايزة تغيير المياه علما بان الدينامو سليم ؟
ملحوظة مهمة:انا شاكك ان البطارية بقلها سنتين هو الرقم اللى مطبوع 08061783 قلت لصاحب المحل انها بقلها سنتين بس للاسف بعد مافكها وملاها بالميه على اساس انها شهر 8 سنة 2006 قاللى لا انت فاهم غلط دا هى شهر 6 سنه 2008 مش عارف ارجو الافادة مع انه مش هايغير من الموضوع حاجة وبجد حاسس انى انضحك عليا بعد ماشوفت الترمومتر لونه احمر وحسيت ببعض الندم لانى ماجبتش الجافة لدرجة بافكر اغيرها حتى بالخسارة افيدونى افادكم الله؟

رابعا:واحد زميلىنصحنى قالى ماتغيرش بوجيهات فكها ونظفها بالبنزين وضع الشمعة على النار لاخراج الرطوبة وبعد كده صنفرها وركبها تانى تكون كويسه مع العلم انى اشتريت يابانى قبل كده مبرشمه قعدت 6 شهور بس لكن الشامبيون معايا دلوقت بقلها سنه وبفكها زى ما قلى لقيتها مهببه ومترحها زيت صنفرتها بس وركبتها تانى هل ده صح ولا اغير طقم الكهرباء كله (بوجيهات وكوندنسر وابلاتين) علما انى جيبتهم بس مكسل اركبهم الا لما التانيين يجيبوا اخرهم زى ما بيقولولى؟

خامسا:حصل موقف كنت بانظف الريدياتير ونسيت سدادة فى دورة المياة داخل الجلدة الموصلة من الموتور للردياتير ولم الحظ ذلك الا بعد ما سخنت العربيه وانا ماشى ولقيت مؤشر الحرارة راح للمنطقة الحمراء ووقفت ولقيت المياه فى الردياتير نشفت طبعا بعد ماهديت شوية وكبيت شويه مايه عليه هو والموتور لحد مافتكرت وشلت اللى انا كنت حطه المهم ربنا ستر والحمد لله لكن سؤالى ما مدى الضرر الذى سيلحق بى نتيجة ذلك بالنسبة ل(لطرنبة الميه لانها ماكنتش تعمل كويس والدورة ما كنتش شغالها-وعلى الموتور -على الريدياتير)هو لغاية دلوقتى مافيش حاجة والكلام ده حصل امبارح هل فى اجراءات اتخذها ولا اطنش واهو موقف اتعلم منه؟

سادسا:قرأت على موقعكم ان احسن نوع للمساعدين الاماميين هو مونرو امتى نغيرهم اهو نكتشف انهم بايظين هل لما تبوظ الكبالن وتتطقطق هل هذا مؤشر ام ماذا علما بان السيارة بقلها معايا 3 سنين وانا شريها بمساعدينها بس غيرت اللى ورا من سنتين للاسبانى وقلولى انه ناشف هواء وزيت كان 365 لكن البولاندى كان زيت بس 350 وقالولى هايبقى حنين على العربية ايهما احسن من باب العلم بالشىء؟(يعنى ازاى اعرف ان المساعدين الاماميين عايزين يتغيروا -انا قلقت منكم لما قلتم ان ده يسبب شروخ فى الشاسيه)؟

***انا اسف فعلا انى طولت عليكم بس انا طمعان فى كرمكم فى الرد على وبرده بلاقيها فرصة كويسه انى انقل خبرتى الى اى حد يكون محتاجها من خلال هذه المشاكل التى استعرضها معكم اسمى هو مهاب وشكرا لكم .

حضرتك فاتح موضوعين ليه؟؟
و الاتنين بنفس اليوم و نفس التاريخ
و عموما اجابات اسئله حضرتك هنا
http://www.nilemotors.net/Nile/showthread.php?t=34586