حصريا اثبات ان الحكومة كدابة

**noni67** · 09-08-2008 12:39 PM

امس وانا بامون العربية من محطة بنزين موبيل
لقيت شنطة الاسعفات الاولية اللى اعلنت عنها وزارة الصحة انها مش هتزيد عن 40 جنية
هى علبة بلاستيك لونها ابيض فى احمر محطوته فى شنطة قماش حمراء
المفاجئة ان سعرها مش 40 جنية زى ما بيكدبوا على الناس
ثمنها 110 جنية ايوه مائة وعشرة جنيهات
شوفت كدب اكتر من كده والمثلث ب 75 جنية ايوه بخمسة وسبعون جنيها تخيلوا ان مصر فيها 5 مليون عربية لازم كل عربية تدفع 185 جنية علشان تعرف تمشى اضربوا بقى 185 فى 5 مليون استنوا هاضربها واشوف كام
يا نهار اسود 925000000 تسعمائة وخمسة وعشرون مليون جنيه يعنى قرابة المليار الله لعبة حلوه اوى من الحكومة تدى الموظفين بالشمال جنية وتلمهم مليون بالشنطة والمثلث وغلو البنزين واسعار التراخيص والاكل والشرب واللبس وكمان شوية ضريبة على الهوا اللى بنتنفسة
حسبى الله ونعم الوكيل

**Mohamed-Saoud** · 09-08-2008 12:42 PM

مش محتاجة الاثبات... دي مسلمة يابني متفق عليها :)

**Shocky** · 09-08-2008 12:45 PM

لو سمحت هى الحاجات اللى حضرتك شفتها فى البنزينة دى معتمدة ؟

**Hassan Khalil** · 09-08-2008 12:45 PM

حقيقة تاريخية ..

**noni67** · 09-08-2008 12:50 PM

ايوة معتمدة ومختومة من وزارة الصحة

**Shocky** · 09-08-2008 12:57 PM

المشاركة الأصلية كتبت بواسطة noni67

ايوة معتمدة ومختومة من وزارة الصحة

الف شكر ياباشا على الرد السريع
هو كويس ان فى منفذ نقدر نجيب منة حاجة معتمدة بدل اللخبطة
إنما الاسعار لا تعليق

**Hossam_Hassan** · 09-08-2008 01:17 PM

الحكومة لا تكذب و لا حتى بتتجمل، الحكومة بتتكلم لغة مختلفة

المشكلة بقى مش ان المواطن مابيفهمش اللغة دى

المشكلة ان الحكومة نفسها لا تفهم هذه اللغة

**banboty** · 09-08-2008 01:24 PM

المشاركة الأصلية كتبت بواسطة noni67

هى علبة بلاستيك لونها ابيض فى احمر

ازاي معتمدة و بلاستيكية الصنع و ازاي الداخلية بتقول انه

يجب ان تكون الشنظة الخارجية من معدن لا يصدأ

نصدق مين دلوقتى !!

و اذا كانت معتمدة هل هناك شهادة مع الشنطة تفيد هذا المعنى ام مجرد مطبوع على الشنطة كده و خلاص

لان افتكر انى قرات في المنتدى انه لازم تكون الشنطة معاها شهادة معتمدة من الداخلية و الصحة

**Abouzaid2008** · 09-08-2008 01:38 PM

هم يبكي وهم يضحك متأخذونيش بس أصلها حكاية تضحك يمكن وزارة الصحة مقرئتش القانون ومتعرفش موضوع الحقيبة المعدن فتركت الأمر للحكم الشخصي وكل مواطن يدبرها ويفهمها بطريقتة ....عشان كدة بقترح إننا نجيب شنطة معدن مطابقة لمواصفات الدخلية ونحط جواها الشنطة المعتمدة من وزارة الصحة ....وبيني وبينكم نحمد ربنا إنها جت علي قد وزارتين اتنين بس كان ممكن كمان كام وزارة تتدخل وتبقي هيصة ومنلحقش علي تلبية باقي المواصفات بس الحمد للة انها جت علي قد كدة

**Adham** · 09-08-2008 01:48 PM

طيب اللي يدفع 185 جنية في شوية الهبل دة علشان خاطر عيون الحكومة يبقى اية

انا حاجيب ارخص شنطة فاضية في السوق ( الووتربروف الحمراء اللي ب 15 جنية) و حاروح الصيدلية اشتري تحبيشة شاش و قطن و و قزازة صغيرة املاها مياة من الحنفية (كحول) و قزازة تانية املاها مياة (لامؤاخذة) وسخة (صبغه يود) او عصير عناب ِ(ميكروكروم) و السلام

و ارخص مثلث في السوق من ابو 12 جنية و يترمي في الشنطة

دة اسمة نصب و ماينفعش معاه إلا الاستهباااااااااااااااااا ااااااال