أسئلة بخصوص هوندا Si

**honda forever** · 09-04-2013 02:21 PM

السلام عليكم ورحمة الله وبركاته
إزيكم يا شباب يا رب تكونوا كلكم بخير

أولا سامح باشا بخصوص الشرقه اللى بتحصل مع التفويله عملت اللى قلتلى عليه بعد مفولت فكيت صامولة الفلتر وفتحت الكونتاكت وقفلته مرتين متتاليين ومع ذلك المشكله لا زالت موجوده!!!!!! هل أكررها تانى ولا المشكله كده فى حاجه تانيه؟ أرجو الإفاده

ثانيا طلعت العربيه تقيله سنه بسيطه معلش أنا محسوك حبتين هل دى طبيعة فتيس ال Si ؟ (هو الفتيس اللى عندى اللى مقاس الزيت بتاعه من الأمام بس الكبلن الشمال حتتين ده كده أنهى فتيس وكويس للموتور ولا إيه) مع العلم كمان إنى مغيرتش بوجيهات - إيه البوجيهات المناسبه؟

ثالثا المفروض إستهلاك البنزين داخل البلد وعلى الطريق كام تقريبا؟

رابعا إكتشفت سنة عك الراجل مغير ماستر العمومى بواحد بتاع أكورد هى الفرامل كويسه الحمد لله بس هل محتاج أغيره؟

آخر حاجه وآسف على الإطاله مروحة التكييف الداخليه اللى تحت الطابلوه مبتجبش هوا كويس مع إن صوتها عادى

ومليون شكرا ليكم جميعا

**SAMEH_FOUAD** · 10-04-2013 12:27 AM

المشاركة الأصلية كتبت بواسطة Ibrahim Hassan

السلام عليكم ورحمة الله وبركاته
إزيكم يا شباب يا رب تكونوا كلكم بخير

أولا سامح باشا بخصوص الشرقه اللى بتحصل مع التفويله عملت اللى قلتلى عليه بعد مفولت فكيت صامولة الفلتر وفتحت الكونتاكت وقفلته مرتين متتاليين ومع ذلك المشكله لا زالت موجوده!!!!!!

هل أكررها تانى ولا المشكله كده فى حاجه تانيه؟ أرجو الإفاده

ثانيا طلعت العربيه تقيله سنه بسيطه معلش أنا محسوك حبتين هل دى طبيعة فتيس ال Si ؟ (هو الفتيس اللى عندى اللى مقاس الزيت بتاعه من الأمام بس الكبلن الشمال حتتين ده كده أنهى فتيس وكويس للموتور ولا إيه) مع العلم كمان إنى مغيرتش بوجيهات - إيه البوجيهات المناسبه؟

ثالثا المفروض إستهلاك البنزين داخل البلد وعلى الطريق كام تقريبا؟

رابعا إكتشفت سنة عك الراجل مغير ماستر العمومى بواحد بتاع أكورد هى الفرامل كويسه الحمد لله بس هل محتاج أغيره؟

آخر حاجه وآسف على الإطاله مروحة التكييف الداخليه اللى تحت الطابلوه مبتجبش هوا كويس مع إن صوتها عادى

ومليون شكرا ليكم جميعا

الاجابات على حسب ترتيب الاسئلة :

1- لأ كدة انا عايزك تنظف التانك , وفلتر طلمبة البنزين

2- لأ طبعا مش طبيعى , هية المشكلة عندك انا عايزك الاول تقوم بتنظيف ال solonied الموجود على الفتيس من فوق

وعايز اعرف اخبار الاحساس بالنقلات اية ؟؟؟ واخبار الكيك داون اية هل بيلقط بسرعة ولا لازم تجيب الدواسة للاخر ؟؟؟؟ نقلات الفتيس بتنقل عند كام rpm ؟؟؟

3- البوجيهات اللى هتجيبها ngk -platinium ودول هتجيبهم من ش قدرى فى السيدة زينب عشان عليهم عرض ب 100 جنية بدل من 160 جنية ولسة العرض شغال ( شركة التوفيق للتجارة )

4- داخل البلد سرعة لا تتعدى ال120 كم , 190-200 كم فى الصفيحة

فى ال high-way , هتعمل معاك 300-320 كم فى الصفيحة

5- لأ مافيش مشكلة هما تقريبا نفس الضغط والاداء

6- لو بتجيب السرعة على 1 والهواء يكاد يكون بيطلع بالعافية , يبقى لازم تعمل الحاجتين دول

1- تفك المروحة نفسها وتنظفها كويس لانها هتلاقيها متغرقة تراب , ومش هتسمعلها صوت اصلا
وبعد كدة جرب لو ماتظبطش

2- لازم تفك علبة توزيع الهوايات الرئيسية وتنظفها

واى سؤال ياباشا , ومعلش على النأخير فى الرد بس كنت مستنى حد من الاعضاء يردوا

**SAMEH_FOUAD** · 10-04-2013 09:58 AM

المشاركة الأصلية كتبت بواسطة م/اكرم

وهو الكيك داون لو مكانش بيلقط غير لما الدواسة تنزل للاخر ...ف الطبيعي يعني يبقى ايه المشكله؟؟ لان الكلام دا بيحصل عندي...

سلك الكيك داون بيكون عايز يتشد

**honda forever** · 12-04-2013 11:22 PM

سؤال ومحتاج رد سريع يا شباب
هو الكانستر ممكن يبوظ يعنى ممكن يكون هو السبب فى موضوع الشرقه بتاعت التفويل؟
لأن الميكانيكى قالى إنه هو السبب وقالى عايز يتغير
طبعا بعد مراجعة الفايظ والخراطيم ولقى كله تمام

**SAMEH_FOUAD** · 13-04-2013 01:08 AM

المشاركة الأصلية كتبت بواسطة Ibrahim Hassan

سؤال ومحتاج رد سريع يا شباب
هو الكانستر ممكن يبوظ يعنى ممكن يكون هو السبب فى موضوع الشرقه بتاعت التفويل؟
لأن الميكانيكى قالى إنه هو السبب وقالى عايز يتغير
طبعا بعد مراجعة الفايظ والخراطيم ولقى كله تمام

شوف ياباشا هية وظيفة ال canister انة بيمتص الغازات الناتجة من الاحتراق , كنوع يعنى من الحفاظ على البيئة , لان جوة ال canister دة فية فحم بس طبعا فحم مخصص للسيارات

طبعا انا مستبعد الكلام دة خالص

انت ممكن لو عايز تجرب فعلا تجرب fuel pressure regulator او منظم الضغط اللى على مسطرة الرشاشات , فكة ونظفة لان دة منظف vacume