الموضوع: اخر إعطال وحلول ابيزا 94 حصلت معايا للإفادة

السلام عليكم ورحمة الله وبركاته

انا معايا ابيزا موديل 94 موتور 1400 هاف انجيكشن .

العطل :
كتمه فى العربية وانا ماشي ولو التانك وصل للنص تحس ان العربية بتبقى عايزة تقف وترجع تفتح تانى .
الحل :
تغيير تانك البنزين كاملا ان الطرمبة الى طلعت راكبه عندى كان معكوك فيها كتير وخراطيم التانك كانت بايظة وسعر التانك كامل بطرمبة وخراطيم 800 جنية استيراد .

العطل :
تهييس فى موشر الحرارة .
الحل :
تغيير حساس الحرارة 100 جنية .

العطل :
تاخير كتير جدا فى الدوارة واقف اجى ادور ما فيش وشوية وتدور على الرغم من وجود صوت المارش تمام .
الحل :
تغير فره الكونتاكت بواحدة جديدة من الصفا 65 جنية .

العطل :
العربية فصلت منى كهرباء وانا ماشي بيها وحلفت ما هى دايرة تانى الاسبراتير قطع كهرباء نهائي .
الحل:
تغيير اسبراتير كامل بالوش استيراد لسة ما عرفتش تمنة .

العطل:
عدم انتظام الار بي ام فى السلانسية وانا حاسس انه ده موسم الحكاية ده لان ناس كتير اوى اشتكت من كده .
الحل :
تغيير الكارباتير باخر استيراد بس لسة ما عملتش كده لاننا بندور على واحد نضيف جربنا كتير وكله بيطلع انيل من بتاعى اصلا .

العطل :
الموبينة كانت مشروخه واى شوية مياه كانت بتوقف العربية وكانت بتهرب كهرباء .
الحل :
موبينة استيراد 150جنية .

العطل :
بشيل غطاء العربية الصبح لقيت الزجاج مكسور .
الحل :
زجاج جديد اعتقد 350 جنية .

انظباعى النهائي :
اولا :
انا مش عارف اية الى بيحصلى ده اول مرة اتنكس النكسة ده كلها ، الحمد لله على كل شيء .

ثانيا :
انا بعت هدومى خلاص على قطع الغيار والاصلاحات .

ثالثاً :
اى عربية زيرو انت اول واحد تدور مفتاحها احسن من احسن عربية اى كانت مستمعله حتى لو عربية 128 .

رابعا :
انا بقيت اخاف اركب العربية .

والله يا شباب انا قعدت فترة كبيرة جدا جدا مش بعمل اى حاجة فيها غير صيانات وبس ومرة واحده كده كل ده ظهر .

فى النهاية العربيات بتاعتنا ده عربيات محترمة جدا بس بشرطة لما تبقى زيرو حتى مش كسر زيرو علشان ما حدش بيضمن الى قبله كان عامل فيها اية ، وللاسف الفئات الجديدة من العربيات ده غالية جدا ، تحياتى للجميع وان شاء الله ما حدش يحتاج لاى معلومة من بتاعتى فى الموضوع ربنا يبعد عنكم شر الاعطال .

فى حفظ الله ،،

المشاركة الأصلية كتبت بواسطة zika99_eg

قدر الله و ما شاء فعل
ودي حاجات بتحصل علي طول
ومتفتكرش الزيرو مفيش زيه
واحد صحبي جاب كروز بعد 4 شهور غير فتيس
ده قدر

الله يكون فى عونه صعبه اوى ده فعلا ، والحمد لله على كل شيء .