كل واحد يعمل باركينج جنب السرير

**Ahmed Taha** · 09-08-2008 06:03 PM

النهاردة كنت بايت عند والدتي في شارع صلاح الدين في مصر الجديدة و أنا واقف في البلكونة الشارع منظره رهيب خمس إتجاهات المكروباص و الأتوبيسات الخضرا ناقص تمشي علي الحيط و مفيش عسكري مجند حتى واقف إتحسرت علي القانون الجديد و دخلت نمت.

المهم الساعة 9 الصبح تاني يوم لقيت أمى بتصحيني و بتقوللي إلحق الونش بيشيل العربية و البواب وقفهم بالعافية علما بأني راكن جنب الرصيف في المكان إلي سكان العمارة بيركنوا فيه من أكتر من 75 سنة عمر العمارة و قبلي مكانين عليهم يافطة من الحكومة بتقول (مكان إنتظار خاص بعدد 2 سيارة مجهزة طبيا) يعني بالتبعية الركن مسموح بيه.

نزلت لقيت العسكري بيقولي (معلش يا باشا القانون الجديد تعمل باركينج جنب السرير للعربية) و ضحك أبجته طبعا "للأسف" و ركنت في شارع داخلي و لقيت الميدان فية لواء و عمداء و ملازمين بالهبل.

و هوب بليل بيناموا و يشخروا و الشارع يضرب يقلب والمكروباص يمشي عكس و الأتوبيس يوقف الشارع كله مش مهم لكن الناس المحترمة تنزل بالبجامة تشيل عربياتها من الأماكن إلي مسموح فيها بالركن.

جار بيصيف و سايب عربيته زي ما بيعمل من 20 سنة بالعافية خلناهم ميسحبوهاش و يركنوهالنا في شارع جانبي و طبعا متخيلين البهدلة و العربيية بتتشد و الهند بريك ماسك.

عربيات بالهبل إتسحبت و أصحابها نايمين في بيوتهم.

إحنا عمالنالهم إيه عشان يقرفونا كده؟

**MoToRiZeR** · 09-08-2008 06:09 PM

عارف .. انا بحس إن الحكومة اما بتعين أمين شرطة ولا ضابط مبيعملولوش مرتب .. بينزلوه الشارع و يدولوه الأقماع و الحواجز بتاعة الكمين و يقولولوا إنت و شطارتك و الرزق علي الله

المشكلة إنهم دائماَ و أبداَ يتصدروا في الهايفة .. و للأبد هيتصدروا في الهايفة و سايبين أسباب تعطيل المرور الحقيقية ... و القانون الجديد ده يبلوه و يشربوا ميته ولا عمل حاجة و الشوارع زي الزفت كل اللي حصل إن بقي فيه أسباب أكتر للجباية

**Ahmed Taha** · 09-08-2008 06:19 PM

أنا بقترح إنه زي الضريبة و التأمينات الاجتماعية علي المرتبات يعملو بدل رشوة و يوزعوها علي بعض بدل ما يخنقونا.

يعني العسكري لما يشوف العربية عليها إستيكر الترخيص يعرف إني دافع بدل رشوة و يسبني أنام مش ألاقي كبسة زي مكون نشال.

**solycar** · 09-08-2008 06:52 PM

المشاركة الأصلية كتبت بواسطة Ahmed Taha

أنا بقترح إنه زي الضريبة و التأمينات الاجتماعية علي المرتبات يعملو بدل رشوة و يوزعوها علي بعض بدل ما يخنقونا.

يعني العسكري لما يشوف العربية عليها إستيكر الترخيص يعرف إني دافع بدل رشوة و يسبني أنام مش ألاقي كبسة زي مكون نشال.

جامدة اوى بدل رشوة دى

و بالمرة كمان تدفع بدل طبيعة عمل للامين

لانه هيكون امين و

.....

**Adham** · 15-08-2008 12:20 PM

قصة مؤسفة

و فكرتني بحكاية من زمان

كان الريس معدي من صلاح سالم
و قبل مرورة مر الونش و رفع السيارات اللي راكنة في الشارع الداخلى امام عمارات العبور (اللي هوة بينة و بين صلاح سالم رصيف مشاة )

و منهم سيارة مرسيدس جديدة لنج صاحبها كان مش متواجد و بالتالي مالحقش يشيلها قبل ما الونش يمر

رفعوهالة و ركنوها في شارع خلف عمارات العبور

و كانت السيارة اوتوماتيك و معشقها عالباركنج
و المرسيدس طبعا دفع خلفي و هما رفعوها من الامام

و كانت النتيجة ان الفتيس بتاعها اتكسر و كلف صاحبها 20 الف جنية في التوكيل

و دة من حوالي 20 سنة او اقل قليلا

يعني 80 الف بمقياس النهاردة مثلا

و اعتقد ان الراجل رفع قضية بسببها على وزارة الداخلية بس ماعرفش الموضوع انتهي على أية

:(

**yahyanaabil** · 15-08-2008 06:52 PM

قانون ملوش اى لازمه وانا راجع البيت حوالى 12 بليل فى شارع جمال عبد الناصر وده شارع رئيسى كبير لقيت الدنيا واقفه وكانت العربيات بقيت واقفه فى وش بعض لان الطريق مقيهوش جزيره وطبعا الشعب المصرى شعب واعى لما يلاقى الدنيا واقفه بيمشى فى الاتجاه العكسى كانه مش حيلاقى عربيا جايه فى وشه ومش عارف انه كده بيعكها اكتر والجميل انى مالقيتش ولا حتى نص عسكرى ينظم الدنيا

**Noha.M** · 16-08-2008 03:06 AM

المشاركة الأصلية كتبت بواسطة Ahmed Taha

أنا بقترح إنه زي الضريبة و التأمينات الاجتماعية علي المرتبات يعملو بدل رشوة و يوزعوها علي بعض بدل ما يخنقونا.

يعني العسكري لما يشوف العربية عليها إستيكر الترخيص يعرف إني دافع بدل رشوة و يسبني أنام مش ألاقي كبسة زي مكون نشال.

ههههههههههههههههههههههههه هههههههههه

جامدة جدااااااااااااااااااااااا بدل رشوة دى