اقتباس المشاركة الأصلية كتبت بواسطة youssef_u مشاهدة المشاركة
معلش يا باشا بس لما تبقا الالنترا اول فئة ب ١٥٠ الف ،، السيراتو الجديده نفس السعر ،، الريو ب ١٤٠، ، الاكسنت ب ١٣٠ وكل دول عبارة عن صفيحة بكاسيت و عشان اخد ايرباج و abs ادفع ١٥ الف زيادة،،، الكورولا ب ١٦٠ و السيفيك ب ١٨٠ الجيتا و الباسات و الاوكتافيا مش لازم اقول السعر ،،

في المقابل عربية واسعه و فيها وسائل امان ٢ ايرباج و abs ebd ba ، ب ١١٧ الف ، كدة يبقا المميزات تطغى عالعيوب ،،،

وانا عايزك يا باشا تنزل معرض العربيات و تشوف موديل ٢٠١٣ من عربيتك اللي انتا راكبها دلوقتي هتلاقي نفس ضعف الصاج بتاع الصني هو هو و كمان الحكاية دي انا لاحظتها جامد جدا في السيفيك ،،،،

المشكلة اللي في الصني كانت تزييق في المساعديين في اول الدفعااااات فقط و اتحدى انك تلاقي واحد استلم حديث عنده المشكله دي ،،،، و مفيش مشكلة في منظومة الفرامل! هو تيل الفرامل نوعه ردئ بيؤدي الى تلف الطنابير بعد فترة معينه ،،،،، و حضرتك 100٪ هتلاقي عيوب تصنيع كتيره زي اصوات في الصالون بسبب التقفيل المصري و ده بيتحسن مع مرور الوقت ،،، اسف جدا عالاطالة و تحياتي
سيدى الفاضل العربية معايا مستلمها من شهر و حاجة بسيطة ، باختصار كده عندى مزيكة حسب الله و أنا ماشى دا غير نشوفية العفشة مقارنة بالهيونداى اللى بتتفوق على الصنى الجديدة دة من كل الجوانب تقريباً من حيث العفشة و البنزين ، استهلاك الصنى عالى جداً عندى (تقريباً 10 كيلو للتر بدون تكييف فى طريق نصه زحمة نسبياً و نصه طوالى)، معنديش مشاكل فرامل (أو لسة مظهرتش مش عارف ، أنا فقدت الثقة فى العربية كده كده و متوقع أى شئ) ، بس البوية بتقشر و العلامة بتقشر و رايحلهم فى التوكيل أشوف معاهم حل ، نيسان طول عمر حاجتهم زى الدهب ، مش عارف ليه خابو الخيبة دى ، أنا للأسف لما خدت قرار شراء السيارة كان بناءاً على كلام الولاد لأن شكلها شدهم و العربية ما شاء الله واسعة رغم انى كنت ميال أكتر للانسر بومة رغم انها أضيق لاكن بعض زملائى فى العمل نصحونى أبعد عن الصنى الجديدة و لو عايز صنى أجيب القديمة بس المشكلة فى ضيقها و احنا عدد و أحجام ما شاء الله ، لكن صعب الواحد يتقبل عيوب مستفزة بهذا الشكل و بصراحة التقفيل المصرى سئ جداً لأنها حاجات كلها كان ممكن تفاديها من غير النكد دا ، دانا من أوائل الناس اللى جابو الالنترا و مكانش فيها ربع المشاكل دى ، لأ و عمال كل شوية أصعق و ألاقى حد كاتب مشكلة شكل ، بس كان لازم نيسان تشرف علي الانتاج برضه مايسيبوش الدنيا كده ، و أسف للاطالة بس أعمل ايه من تعبى ، أنا اشتركت فى المنتدى يمكن ألاقى عندكو حلول لمشاكل العربية