الموضوع: اخيرا" بقيت سياتاوى

يا جماعة حقيقى مش عارف اشكركم ازاى على اهتمامكم
اتوجه بالشكر الى كل من قام بالتعليق. حقيقى جروب محترم ولى الشرف ان انضم ليكم
الموضوع ببساطة ان السبب فى انى اجيب عربية سيات يرجع لصديقى العزيز السيد أحمد مبارك
بصراحة هو اللى غوانى
قعد يقولى ويحكيلى على جمالها وادائها وثباتها وانها ركوبة وكفاية انها المانى وان سيات اسبانيا معملتش فيها الا البودى والفرش اما باقى العربية كلها المانى (فولكس فاجن بولو )
وفعلا" بدأت رحلة البحث ومقابلتى معاكم كانت البداية . أحمد مبارك قالى تعالى احنا عاملين مقابلة للجروب ويشاء الحظ ان مكان اللقاء 6 اكتوبر اصلى انا من سكان اكتوبر فكانت بالنسبة ليا فركة كعب
وكانت فرصة عشان اتفرج على عدد كبير من العربيات السيات فى وقت واحد بالاضافة لامكانية الاستفسار عن اى شئ يخص السيات من اهل الخبرة
حتى لو تفتكروا انا كنت عمال اسأل وبصراحة كنتم فى منتهى الاحترام وكنتوا بتجاوبوا على الاستفسارات بمنتهى الاهتمام والمصداقية حقيقى استفدت من المقابلة حاجات كتيير
وفضلت ادور لحد ما لقيتها واثناء رحلة البحث قابلت عربيات كتيير اللى تعبانة واللى مشدودة ومافيهاش ريحة الفبريكة لحد ما لقيت الكوردوبا وبرضه اللى رشحهالى عزيزى أحمد مبارك
العربية الحمد لله حالتها جيدة ولونها كمونى مخضر
بس فيه شوية ملاحظات احب اسألكم عليها
مبدئيا" العربية 1000 سى سى بس التكيف مجانينى هو كأداء الحمد لله شغل كويس بس ساعات العربية بتبطل منى فى الطلعة وبسمع صوت التكريك بتاع التاكيهات والاقى ساعات الار بى ام ينزل ل 500 لفة/ دقيقة وانا بطلع على الاولانى والاقى دواسة البنزين سقطت وصوت التكريكة اياها وترجع تتظبط تانى وده تقريبا بيحصل كل عشرين ثانية
دى حاجة لو حد يعرف حلها ايه يبقى جزاكم الله خيرا"
الحاجة التانية فى صوت ونة بتتسمع مع الغيار التالت فيما فوق وصوته بيزيد مع دوس البنزين وبيختفى لما بشيل رجلى من على البنزين
معلش طولت عليكم بس اخر حاجة المفتاح حاولت اكوده وفشلت حاولت كتيير بس مفيش فايدة
رحت لواحد اسمه عزب وصل جهازب بلجة عند الفيوز وقالى الجهاز مش قارى الريسيفر بتاع السنتر وقالى الريسيفر فيه مشكلة روح التوكيل وكان قريب منهاصل عزب ده فى شارع السودان والتوكيل فى ارض اللواء
المهم رحت التوكيل جالى مهندس ومسك المفتاح وقعد يدوس على الزراير بس الغريب انهما عملش التكويد اللى مكتوب فى المانوال انه يحط المفتاح فى الكونتاكت ويفتح من غير ما يدور وبعدين يطلع المفتاح ويضغط على اللوك بستمرار مع الضغط 3 مرات على unlock المهم معملش الكلام ده وقالى فيه مشكله فى الريسيفر وهو اصلا مش موجود عندنا ولو عايزه ممكن نجبهولك من بره وهيكلفك فوق ال 2000 جنيه وقالى انا ممكن ادخل العربية واحطها على الجهاز وهطلعلك تقرير وهيقولك نفس اللى قالهولك بتاع المفاتيح وهتدفع 165 جنيه فا أخدت العربية ومشيت
تفتكروا الموضوع ليه حل؟
واسف على الاطالة

الله يبارك فيك يا عزيزى وربنا يوقعك فى بنت الحلال