الموضوع: الموضوع ده خد كتير من التعليقات رينو لوجان أنها حقا سيارة مقلب !!!!!!!!!!!!

الموضوع ده تجربة شخصية اللى عايز يستفيد يستفيد و أنا نيتى خالصة لوجه الله تعالى
لقد أخذت وقت كبير و مش عارف أردأقول أيه و لكن تعالوا نشوف أولا ماهى اللوجان
داتشيا لوغان 2004-2012 (أه داتشيا فى حاجة )
الشركة المصنعة رينو لوجان
الشركة الأم مجموعة رينو الأنتاج تم على مرحلتين بشكلين مختلفين
الإنتاج مرحلة 1 : 2004--- 2008
مرحلة 2 : 2008---2012
سيارة من الفئة الأقتصادية و أكرر من الفئة الأقتصادية موجهة لفئة معينة من البشر اللى هو عايز عربية معقولة بتمن معقول موجهة لفئة عمرية معينة موجهة للعائلة موجهة لبلاد معينة (البلاد التى يتم التجميع بها رومانيا ـ روسيا ـ كولومبيا ـ إيران ـ الهند ـ البرازيل - المغرب و تنتج فى المكسيك تحت أسم نيسان أبريو )فيها طبيعة بشر أقتصادى عربية أقتصادية من الأخر
أنا قبل ما أشتريها كنت بأقول أيه العك ده عربية متصنعة فى رومانيا ملصوق عليها علامة رينو متجمعة فى المغربزى ماحضرتك كنت بتقول كده برضه و بعدين قلت داتشيا بدعم رينو و ألا لانوس موتور صينى و شاسيه عفا عليه الزمن و ألا فيرنا موتور قوى جدا و شاسيه مش نفس قوة الموتور برضه أنت بتقارن مابين عربيات فى نفس الفئة السعرية يعنى ماينفعش تقول باقارنها بتويوتا أو بنيسان أو بلانسرو بعدين اللى أشترى اللانوس مقتنع بيها جدا وو يقوللى عربية حلوة جدا و رائعة و قطع غيارها رخيصة و صيانتها سهلة من الأخر كله صح و كل واحد بيحسب بطريقته و بعدين لما عربيتى أتخبطت (شاهين 2001) فاضية و بعدين أنا ركبت لها تكييف(أكتر حاجة كنت بأدور عليها التكييف يكون كويس ) المهم علشان ما أطولش على حضرتكوا أنا كنت فى حيرة مابين أربع عربيات لانوس و دى كانت مستبعدة و بي وادى دى و فيرنا و لادا و أستبعدت اللادا لأنى و أنا بأفكر أجيبها شفت واحدة جديدة المقص اللى أدام أتكسر فالعربية وقعت و قلت دى رسالة من ربنا أنى أبعد عن العربية و البى واى دى كانت مستبعدة لأن الصينى صينى ما تضمنوش و أنا ما بأحبش قوى المخاطرة و الفيرنا كانت هى اللى داخلة دماغى علشان غبور الوكيل بتاعها كويس و غير كده موتورها جامد جدا و صيانتها بسيطة وسهلة و فجأة لقيتنى بأشوف اللوجان بنظرة تانية المهم كنت رايح أشترى و أحجز الفيرنا المهم ركبت تاكسى فيرنا و قعدت فيه ورا حسيت أنى مفعوص و أبويا كان راكب معايا ورا قاللى هى دى العربية اللى رايح تحجزها دلوقتى قلت له أه يابابا لكن حسيت فى كلامه بالرفض المطلق خصوصا أنه قعد يتكلم مع السواق و السواق كان ما بينه و بينها تار بايت ماقلتش أنا بقى أن السواق ده هو اللى بهدلنى كل ده كان علشان أبص للوجان تانى تعالوا نبص للوجان من ناحية المبيعات
المبيعات
2700000 سيارة ما بين داتشيا و رينو و ماهيندرا و نيسان على مدار 8 سنوات من 2004 ل 2012

تعالوا نبص على المواتير اللى نزلت فى اللوجان
المحركات :
1.4 لتر 75 حصان
1.5 لتر 70 حصان سولار
1.5 لتر 85 حصان
1.6 لتر 90 حصان
1.6 لتر 105 حصان
السرعة القصوى:
162 كم بالساعة ← 1.4 لتر
158 كم بالساعة ← 1.5 سولار
167 كم بالساعة ← 1.5 لتر
175 كم بالساعة ← 1.6 لتر
183 كم بالساعة ← 1.6 لتر
كود محرك المانيوال و السيارات التى أستخدمت فيها هذا المحرك
K7M Renault megane 1
K7M Renault scenic 1
Dacia logan 2008----Dacia sander 2008


كود محرك الأوتوماتيك و السيارات التى أستخدمت فيها هذا المحرك
K4m
Renault Laguna Renault Mégane (II)
Dacia Logan
Dacia Duster
Dacia Sandero
نيجى بقى لعيوب العربية
• تسعيرها غلط العربية الهاف ب 67500 و الفول أوبشن ب 71000 رغم أن الفرق فى الكماليات كتير جداااا الأوتوماتيك نفس الحكاية موتور أكبر 16 صباب و عمود الأتزان (2000 جنيه لوحده ) و فتيس أوتوماتيك ب ستبترونيك كل ده ب 78000 جنيه ماعلينا العربية كانت صفقة رابحة بكل ما تحمله الكلمة لما كانت بالأسعار دى و أعتقد أن كل اللى فى المنتدى أشتراها بالأسعار دى
• عيوب تصنيع مقبولة جدا جدا خصوصا لما نعرف ان مصنع سوماكا بيعمل 360 ألف عربية رينو فى السنة يا حسرة عليكى يا مصر و سمعت أن نيسان الشريك اليابانى بصدد أنشاء مصنع لها فى المغرب و أن فى شركات تانية كتير جاية فى السكة يا حسرة عليكى يا مصر و طبعا لما نيسان تعمل مصنع مش حتعمله أقل من رينو ما علينا المهم أن فى توحيد للعيوب يعنى العربيات كلها فىها عيب واحد مش حتلاقى عربية فيها و عربية تانية ما فيهاش
• الكاوتش اللى نازل فى العربية كاوتش أقتصادى نظرا لطبيعة السيارة الأقتصادية
• موضوع العزل الحرارى عادى جدا و أهم حاجة أنه فى كل العربيات عربية أقتصادية مصممة لدول أوروبا الشرقية درجة حرارة فظيعة تحت الصفر زيها زى اللادا تشتغل كويس فى الشتاء و تهيس فى الصيف
• زرار الكلاكس اللى فى ناس متضايقة منه ما كان موجود فى ال بيجو 504 و ال 128 و ألا كلنا نسينا و ماحدش كان بيشتكى ولاحاجة
• الزراير الخلفية للأزاز اللى ورا بيبوظوا بسرعة ليه لأن فيه رجلين أطفال بيعدوا عليهم ممكن يتغطوا ببلاستيك الشفاف اللى بيتلف فيه السانوتشات
• أنا لما عرفت موضوع عمود الأتزان فقدت الثقة فى العربية بعض الشئ و بعض الوقت وده عيب أنك تنزل عربية فيها حاجة ناقصة و ده كان أكتر حاجة ضايقتنى فى العربية
• العربية فعلا كرسى السواق بيتحرك و الكرسى اللى جنبه لكن أنا مستغرب أن ده فى ناس بتقول أنه عيب ده ميزة أفرض سعادتك ضربت فرملة جامدة اللى وراك ده حيخبط فى الكرسى اللى أدامه و بالتالى لازم الكرسى يتحرك علشان يمتص صدمة وحركة اللى قاعد وراه فيبقى ده مش عيب ده ميزة
• صوت الموتور ( موتور المانيوال بالفتيس هو الميجان 1 اللى واخد ه أعلى تقييم فى وقتها وموتور الأوتوماتيك بالفتيس هو موتور السينيك 2 عربية جامدة جدا و عاملة مبيعات جامدة ) و هو عالى سنة ده راجع للأقتصادية فى العزل نظرا لطبيعة السيارة الأقتصادية أعتقد حضرتكوا زهقتوا منى و من طبيعة السيارة الأقتصادية
• سعر قطع الغيار المبالغ فيه أحنا عايزين نعرف حضرتك لما تشترى فانوس خلفى لفيرنا من الوكيل حتقوللى و أنا ليه أشتريه من الوكيل ماهو عند الراجل اللى على الناصية و بخمس جنيه مش ب 50 جنيه لازم هنا المقارنة تكون بين سعر وكيل وسعر وكيل تانى مابين صيانة وكيل و صيانة وكيل تانى هو ده المقياس
• لما روحت التوكيل فرع المقطم أسوء وورشة صيانة فى مصر ندمت أنى جبت العربية لكن لما روحت فرع العبور و حسيت بالفرق فى كل حاجة عرفت ساعتها أنى كان لازم أفكر قبل ما أتسرع و أخد قرار فى العموم
• الناس هنا فى المنتدى ناس مميزة جدا و ذوق و أخر جدعنة و مش معنى أن الواحد يبقى متحمس شوية لفكرة ما أنه بيضلل اللى أدامه طيب و فين عقل اللى أدامه فين نصيب اللى أدامه ماشى ياعم أنا بأقول على العربية أنها كويسة فى حدود سعرها أنا لو معايا أزيد كنت جبت حاجة فى حدود المبلغ اللى معايا و لو كان معايا أقل كنت جبت حاجة فى حدود المبلغ اللى معايا برضه
• سعر أعادة البيع فى أوروبا و الدول المتقدمة العربية بتقل كتير جدا بعد أول سنة و تانى سنة و تالت سنة لدرجة أنهم عاملين جدول فى مجلة العربيات الجامدة جدا يوضح لك القيمة بعد كل سنة لكن هنا فى مصر أنت عايز تركب العربية و تستهلكها و لما تيجي تبيعها تكسب فيها مرة واحد صاحبى أشترى عربية و لما جه يبيعها كسب فيها بما فيها تمن البنزين اللى حطه فيها تطلع أشاعة فى السوق يقوللك الرينو دى عربية معقدة و فشلة تبص تلاقى العربية سعرها نزل التراب للأسف أحنا ما عندناش معايير تقييم موضوعية لسعر اعادة البيع
• العربيات دلوقتى كله فى الفطسان يا معلم العربية تقعد فيها تحس أنك بتسوق بالبركة فين أيامك يا شاشا شاهين يعنى كنت بأسوق و حاسس أنى فوق السقف العربيات كلها كده مش الرينو بس

أرجو أن ما حدش يزعل منى و خصوصا كاتب المقال رينو لوجان أنها حقا سيارة مقلب !!!!!!!!!!!!
على فكرة غبور نزل سعر العربية بتاعته emgrand 7 خمسة ألاف حنيه النهارده لأن سبيرانزا أبو الفتوح نزلت عربية جديدة أسمها envy ده شكلها الصينيين حيولعوها صينيين صينيين يعنى