مدير مرور الفيوم يطالب ضباطه بتطبيق القانون على البسطاء فقط!

**wawoo** · 11-08-2008 12:08 AM

طالب العميد عبدالسميع وهدان رئيس إدارة مرور الفيوم ضباط الإدارة عدم التصدي لسيارات أصحاب النفوذ وبعض الشخصيات العامة المخالفة لقانون المرور الجديد والاكتفاء بسيارات المواطنين العاديين من أبناء المحافظة.

وكان وهدان قد اجتمع مع ضباط الإدارة وأبلغهم بهذا الأمر بعد فشل الحملات المرورية في التصدي لأصحاب النفوذ الذين يستقلون سيارات ملاكي مخالفة بها ستائر وزجاج مغيم ولوحات معدنية بلاستيكية بأرقام صغيرة جداً. وذلك حسبما ذكرت صحيفة المساء.

هذا الأمر أدى إلى استياء تام من الأهالي تجاه هذه الظاهرة بالرغم من تصريحات قيادات وزارة الداخلية بأن قانون المرور سوف يطبق على الجميع دون استثناء وفي جميع أنحاء الجمهورية.

ومازالت مواكب الأفراح تجوب شوارع وميادين مدينة الفيوم يتقدمها الموتوسيكلات التي تطلق أبواقها مزعجة وتعطل حركة المرور دون أن يتصدي لها أحد.

التعليق
.............لا تعليق

**M!NA** · 11-08-2008 01:18 AM

تصدق اني شايف الخبر ده حلو أوي؟

قوللي ليه؟

عشان دي أول مرة نقرا فيها اللي بيحصل فعلا مش الواجهة البلاستيك اللي بيحطوها دايما خافيين وراها الوجه القبيح للي بيحصل

خليهم ينشروا الغسيل (اللي مش نضيف)

**mohamed ismail** · 11-08-2008 02:13 AM

معلش الله يكرمك ايه مصدر الخبر ده؟

**wawoo** · 11-08-2008 05:00 AM

من موقع كونتكت كار يا اخ محمد , مش مصدر اكيد قوى , بس الخبر يبدو مقبول فعلا .

**MoToRiZeR** · 11-08-2008 08:41 AM

كانوا جايبين في العاشرة مساء قال ايه .. محافظ كفر الشيخ ضابط وقفه و عمله مخالفة حزام .. و الضابط كان جديد فا ميعرفش شكل المحافظ (مثلا!!) .. و المحافظ قال ايه برضه كان قاصد ميربطش الحزام عشان يختبر الضابط !! و شافه بيوقف الناس و بينصحهم من غير ما ياخدلهم مخالفات و يسحب رخصهم و يقولهم يا جماعة من فضلكم اربطوا الحزام كدة غلط بس المرة دي سماح .

اما شفت الحفلة فكرتني بعادل امام في فيلم مرجان مشهد مجلس الشعب "السواق بتاعي اتقبض عليه رحت اطلعه من القسم لقيت الضباط جايبينله تورتة و قاعدين يحتفلوا بعيد ميلاده .. و مأمور القسم قاعد يقول هابي بيرث داي تو يوووو .. إحنا زي الفل !! .. انتوا بتقولوا ايييييه !!"

**wawoo** · 11-08-2008 11:40 AM

المشاركة الأصلية كتبت بواسطة MoToRiZeR

تورتة و قاعدين يحتفلوا بعيد ميلاده .. و مأمور القسم قاعد يقول هابي بيرث داي تو يوووو .. إحنا زي الفل !! .. انتوا بتقولوا ايييييه !!"

هابى بيرث داى تو يوووو , انت متاكد من المعلومة دى

**hamedo0** · 11-08-2008 11:49 AM

يا جماعه ماهو معروف ان اي قانون بيتعمل بيمشي علي الغلابه والحمد الله الناس تكيفت علي هذا الوضع

**MoToRiZeR** · 11-08-2008 12:19 PM

متأكد .. جابوها في برنامجين .. العاشرة مساء و 90 دقيقة و المحافظ إتكلم في العاشرة مساء

**ibrahimsaad** · 11-08-2008 02:59 PM

المشاركة الأصلية كتبت بواسطة MoToRiZeR

كانوا جايبين في العاشرة مساء قال ايه .. محافظ كفر الشيخ ضابط وقفه و عمله مخالفة حزام .. و الضابط كان جديد فا ميعرفش شكل المحافظ (مثلا!!) .. و المحافظ قال ايه برضه كان قاصد ميربطش الحزام عشان يختبر الضابط !! و شافه بيوقف الناس و بينصحهم من غير ما ياخدلهم مخالفات و يسحب رخصهم و يقولهم يا جماعة من فضلكم اربطوا الحزام كدة غلط بس المرة دي سماح .

اما شفت الحفلة فكرتني بعادل امام في فيلم مرجان مشهد مجلس الشعب "السواق بتاعي اتقبض عليه رحت اطلعه من القسم لقيت الضباط جايبينله تورتة و قاعدين يحتفلوا بعيد ميلاده .. و مأمور القسم قاعد يقول هابي بيرث داي تو يوووو .. إحنا زي الفل !! .. انتوا بتقولوا ايييييه !!"

دى بس حته كده لزوم الدعايه للقانون الجديد والرسم الاعلانى على الناس قال ايه بيطبقوا القانون على المحافظ

ياسيدى الفاضل

هذا الكلام بالنص والحرف الواحد قاله احد ضباط المرور عندنا

حينما سأله زوج اختى بينه وبينه هل ستطبقون القانون على الجميع

قال لا طبعا سيطبق على زباله الشعب فقط ويستثنى منه الضباط ووكلاء النيابه والقضاه والمستشارين

مصر هى مصر مش ممكن تتغير الا بحريق وثوره كبرى تقتلع جذور الفساد المتغلغله فى اعماق الجميع