نريد تدخل الإدارة بسبب حملة التشويه المقصودة على نيسان صني

**abdulmoniem** · 14-04-2013 11:42 PM

فعلاً ودي حقيقة وواضحة ..

أنا عايز أعرف إيه إللي دخل أعضاء قسم معين (ستروين) عشان يردوا على عربية صني عمرهم مركبوها (بيركبوا أحسن منها ربنا يوفقهم) والرد بيبقى عن طريق كوبي وباست من موضوعات الأعضاء هنا ومشاكل ملاك العربية إللي خلاص اتحلت في التوكيل وفي مشاكل فردية كمان كتير بتتنقل على إنها مشاكل جماعية.

لو سمحتم إحنا مش مستنين حد عمره مركب العربية ولا يعرف عنها حاجة ويجي يفتي عندنا في القسم ويشوه صورة العربية لمجرد إنه فاضي ومش لاقي حاجة يعملها.

أنا مش معترض على إن أي حد يتكلم على العربية وحش أو حلو ..

مش دي المشكلة ..

مشكلتي هي الفتي بدون علم

نرجوا من الإدارة التدخل لمنع هذا الصدام ..

من الأخر دخول أعضاء من أقسام أخرى لمجرد الفتي وخلاص .. أو لكي يقولوا ما سمعوه من هنا أو هناك .. أو يينقلوا كوبي باست من قسم نيسان لإظهار المشاكل فقط .. ده سيقابل بصد مننا كملاك للعربية لأننا مش عاجبنا الموضوع وطريقته .. لكن إحنا عارفين إن العربية فيها عيوب وقابلنا وبنحبها على كدة.

وبنقولها لكل واحد بيطلب النصيحة لشراء نيسان بأمانة وصدق. ومش محتاجين حد عمره مركبها ولا يعرفها ولا شافها غير في الشارع أو في الصور يجي يتكلم عنها بدون علم وبفتي وبس.

**mmohamed15** · 14-04-2013 11:51 PM

هدي نفسك يا باشا بس انا معتقدش ان من حقنا ان احنا نمنع اي حد انه يقول رأيه مرحبا بجميع الاراء و المهم في الاخر يا تقتنعني يا اقنعك و بعدين حط نفسك في مكان و احد مالك سياره تانيه و انت عندك رأي فيها تحب يقولك متقولش رأيك عندي ممنوع معتقدش انك ترضي بكده

**abdulmoniem** · 14-04-2013 11:55 PM

لأ أنا مش بقول كدة .. أنا كلامي واضح والله يا باشا

أنا أقصد .. واحد عمره مركبها .. وبيسمع كلام من هنا وهناك .. وداخل يفتي!

لأ وكمان بيتكلم بأسلوب غير لائق وشتائم!

ده مش يتمنع ده يتعاقب أصلاً

لكن لو واحد من برة القسم ويفهم في العربية وركبها .. وقرأ عنها وجربها .. ليه لأ .. بالعكس ياريت ده مرحب بيه وبكل أدب وحب كمان.

**eng.m7md.ali** · 15-04-2013 12:04 AM

مع احترامي الكامل لحضرتك ولعربيتك

الناس بتتكلم في مشاكل عند ملاك العربية ومشاكل عامة .. وضعف الصاج مثلا وخفة العربية دي مشاكل عامة في التصميم وتعتبر عيوب

يعني الناس مش بتفتي زي ماحضرتك بتقول .. دي حقيقة مسلم بيها وربنا يباركلك في عربيتك ويحميها

**abdulmoniem** · 15-04-2013 12:10 AM

يا باشا إللي إنتا شايفه عيب أنا شايفه ميزة.

مين يقول عيب ويقول ميزة أصلاً!!!

لولا اختلاف الازواق لبارت السلع .. استهلاك البنزين عندي إيه وعند غيري إيه؟! وأنا مشيت بيها على كام ولقيتها ثابتة ولا لأ؟ كل دي حقائق مش هيعرفها إلا إللي ركب ومشي بيها 10000 كيلو ولا حاجة .. مش يعمل كوبي وباست من على النت ويشوف مشاكل بعض الأعضاء ويجي يعممها.

على فكرة أنا ممكن أعمل كدة في كل عربية من أول البي إم للمرسيدس وإنتا نازل .. سهلة على فكرة أخش على كل منتدى ألقط كام كلمة وأروح أقولهم هناك!

عمر ميكون ده نقد .. ولا رأي .. ده اسمه والله فتي.

**mmohamed15** · 15-04-2013 12:12 AM

طيب يا جماعه انا كنت ساكت بس انا هتكلم عن نقطه واحده
حاليا في صناعه السيارات في اعتبارات معينه لسمك الصاج
يعني القايم ليه سمك معين
الشاسيه ليه سمك معين و كده
اقل حاجه اعتبارا هو الرفارف و الابواب و الاجزاء الخارجيه و ده غرضه التوفير زائد القدره الاعلي امتصاص الصدمه نتيجه سهوله التشكيل
طيب احنا كمصريين زعلانين ليه علشان احنا مش مستوعبين موضوع تغير الصاج بدلا من استعداله
الكلام ده انا عارف اني هلاقي هجوم عليه بس الكلام ده بناء علي علم و اللي عايز يدور علي السمك المستخدم في كل حته في العربيه هيلاقي الكلام د0متوافر كتير علي الانترنت

**abdulmoniem** · 15-04-2013 12:16 AM

المشاركة الأصلية كتبت بواسطة mmohamed15

طيب يا جماعه انا كنت ساكت بس انا هتكلم عن نقطه واحده
حاليا في صناعه السيارات في اعتبارات معينه لسمك الصاج
يعني القايم ليه سمك معين
الشاسيه ليه سمك معين و كده
اقل حاجه اعتبارا هو الرفارف و الابواب و الاجزاء الخارجيه و ده غرضه التوفير زائد القدره الاعلي امتصاص الصدمه نتيجه سهوله التشكيل
طيب احنا كمصريين زعلانين ليه علشان احنا مش مستوعبين موضوع تغير الصاج بدلا من استعداله
الكلام ده انا عارف اني هلاقي هجوم عليه بس الكلام ده بناء علي علم و اللي عايز يدور علي السمك المستخدم في كل حته في العربيه هيلاقي الكلام د0متوافر كتير علي الانترنت

والله ياريت تقولنا حاجات من العلم ده لحسن في ناس محتاجاه .. ولسة عايشة في دور إنها لازم تركب دبابة هههههههه

**eng.m7md.ali** · 15-04-2013 12:54 AM

المشاركة الأصلية كتبت بواسطة mmohamed15

طيب يا جماعه انا كنت ساكت بس انا هتكلم عن نقطه واحده
حاليا في صناعه السيارات في اعتبارات معينه لسمك الصاج
يعني القايم ليه سمك معين
الشاسيه ليه سمك معين و كده
اقل حاجه اعتبارا هو الرفارف و الابواب و الاجزاء الخارجيه و ده غرضه التوفير زائد القدره الاعلي امتصاص الصدمه نتيجه سهوله التشكيل
طيب احنا كمصريين زعلانين ليه علشان احنا مش مستوعبين موضوع تغير الصاج بدلا من استعداله
الكلام ده انا عارف اني هلاقي هجوم عليه بس الكلام ده بناء علي علم و اللي عايز يدور علي السمك المستخدم في كل حته في العربيه هيلاقي الكلام د0متوافر كتير علي الانترنت

مش معنى ان الصاج خفيف كدة يبقى الشركة وصلت لقمة التكنولوجيا

ده معناه استرخاض في الخامات

عربيات كتير بتنزل بصاج قوي وشركات عالمية واغلبها اوروبي وامريكي .. هل الناس دي لسة موصلتلهمش التكنولوجيا دي؟

ماهو انا مش شايف اي ميزة بصراحة في الصاج الخفيف ده خصوصا في مصر .. حضرتك اكيد عارف الناس بتتعامل ازاي مع العربيات اللي في الشارع ده ناقص يجيب مخدة وينام عليها ده لو مقعدش على الشنطة او الكبوت

**abdulmoniem** · 15-04-2013 01:01 AM

المشاركة الأصلية كتبت بواسطة eng f3lix

مش معنى ان الصاج خفيف كدة يبقى الشركة وصلت لقمة التكنولوجيا

ده معناه استرخاض في الخامات

عربيات كتير بتنزل بصاج قوي وشركات عالمية واغلبها اوروبي وامريكي .. هل الناس دي لسة موصلتلهمش التكنولوجيا دي؟

ماهو انا مش شايف اي ميزة بصراحة في الصاج الخفيف ده خصوصا في مصر .. حضرتك اكيد عارف الناس بتتعامل ازاي مع العربيات اللي في الشارع ده ناقص يجيب مخدة وينام عليها ده لو مقعدش على الشنطة او الكبوت

الميزة إن مصر نسبة الحوادث في الطرق البرية من أعلى النسب في العالم وأعتقد أعلى نسب حوادث في مصر هي حوادث الطرق.

لما الصاج يبقى خفيف .. هيمتص الصدمة - بإذن الله - وهيحمي المقصورة الداخلية - بإذن الله -

وكمان هيوفر في البنزين.

وكمان ترخيص في السعر .. دي حقيقة وكلنا مقتنعين بيها زي محضرتك قلت ..

في مصر بقا في عيوب وأنا معاك فيها .. الناس إللي بتيجي تنام على العربية .. والقطط والكلاب التي تحب دائماً النوم فوق السيارة كأنه فندق هيلتون ههههههههههههه

في الأخر .. الشخص بيختار بين ده وده ..

يدفع في عربية أااااااد كدة .. ولما تعمل حادثة هتتفرتك برضه؟

ولا يدفع تمن مناسب اقتصادي - في مصر - وربنا يستر لو حصل حاجة يبقى مخسرش كتير.

زائد مزايا الأمان إللي لو عايز أجيبها في أي عربية هدفع ضعف تمن العربية أو نصها زيادة!

**M.Nabeeh** · 15-04-2013 01:02 AM

يابيه
هدي اعضائك مش كداااا
كل واااحد بيعرض وجهه نظره ودي أراااء حتي لو كانت صحيحه او مغلوطه

لييه اعضاااء كتيير في المنتدي بتدافع عن عربياتها بإستماته زي مايكون عيل من عيالها بصراحه الموضوع بقي غريب جداااااا
ممكن يكون الواحد بيحب عربيته بس ميخسرش حد علشاااان شويه ارااااء
ياريت كلامي ده ميكونش فهمته علي اساس أني ضدك بالعكس