بالله عليكم كورسا 97 بتفصل ... للاهميه القصوي

**DR-MOODY** · 15-04-2013 12:05 AM

بسم الله الرحمن الرحيم
السلام عليكم ورحمة الله وبركاته يا احلى ناس

اتشرف ان دي اول مشاركه ليا في المنتدي هنا واتمنى انضم لاسرة اوبل

بس للاسف شكلى هسيب الاسرة دي قريب ...
الحكايه تبدأ من يوم 1-1-2013 يوم ما قررت اشتري اوبل كورسا موديل 1997
العربيه كانت نقلة محترمه ليا خصوصا بعد عربيه ريجاتا كانت مطلعه عيني ...
بدأت العربيه بعدها بكام اسبوع تفصل لما التانك يقرب يخلص وماكنتش عارف السبب روحت للميكانيكي غيرت طلومبت البنزين ... لكن نفس المشكله لكن لاحظت انها مش بس لما التانك يقرب يفضي .. لا مش شرط

كشفت كومبيوتر .... قالي خراطيم السخن مسدوده ... رجعت للميكانيكي واتشال اللي كان ساددهم والتكييف اشتغل سخن وبارد تمام ... لكن لاحظت ان العربيه بقت بتسخن جامد جدا

والمروحه بدل ما تشتغل عند 90 بقت علي 92.5 والعربيه بقت بتفصل بس لما تسخن ... يعني طول ماهو ما عداش ال 90 ع البارد يعني ما تفصلش ... لكن ركزوا قوي في المشكله الحقيقيه دلؤتى :::::
(( ان العربيه لما تعدي ال90 احيانا وليس دائما احس باهتزاز بسيط تحت رجلى وبعدها احس انها هتفصل ازود بنزين تبدأ الهزه تزيد لدرجه الكركره احيانا ولو سيبت البنزين تفصل العربيه نهائي وتشتغل بعديها مافيش دقيقه ملحوظه : لمبه التشيك مش بتنور دائما .. ولما تدور تدور بعد عناء مع دواسة البنزين وكركره واحيانا صوت انفجار وفرقعه

غير مشكله اني بشم ريحة بنزين مش محروق جوه العربيه بعد ما افول التانك واحيانا بعد ما بيحصل الموضوع ده ...

انا اسف انى طولت عليكم معلش

بس غصب عني والله انا خلاص بشد في شعري ولو ماحدش عرف حل المشكله دي مش هلومه .. لان المشكله دي احتار فيها الميكانيكيه في اسكندريه ودمنهور .... محتاجه واد مخلص بنى اادم سووبر

انا خلاص صدعت

**temeey** · 15-04-2013 02:37 AM

جرب منظف الإنجكشن ماركة إيبرو الأمريكى وإن شاء الله المشكله حتتحل لو العيب سدد فى الرشاشات.
يتم وضع العبوه على تفويلة البنزين وأشتريه من مكان محترم زى الماركت بتاع بنزينه الإمارت أو موبيل.

**eslam3344** · 15-04-2013 03:12 AM

اولا اهلا وسهلا بيك في بيتنا الكبير نايل موتورز ونتمني اسهامات منك كتيره مفيده لينا وليك ويا رب نقدر نفيدك

ثانيا نيجي للعربيه

اولا انت بتقول المروحه بتشتغل علي 92 اوك ده بيكون ثرموستات الحراره مش بتاع عربيتك وحله انك تشيله وتركب بتاعها الاصلي من اي محل قطع غيار اوبل مش اي محل بتاع قطع غيار دي حاجه ثانيا انها تفصل لما تسخن ده امر طبيعي جدا جدا جدا وكنير من عربيات الكمبيوتر بتاعها هو اللي بيعمل كده عشان متدمرش الموتور

ثانيا لو حضرتك بتحط 80 امشي بيها لحد ما تفضي بنزين خالص وجرب انك تحط 92 ويحبذ لو 95 وتحط منظف انجكشن ابرو امريكي الصنع زي ما البشمهندس تامر شوقي تفضل مشكورا بالرد عليك بس مع تعديل مني وانا خجلان من التعديل ده لاني مش في خبرتك يا بشمهندس تامر بس اسمحلي انا بعمل الاتي بستني التانك يفضي تماما واحط 10 لتر بنزين مع علبة المنظف الابرو كامله وامشي بالعربيه 100 كيلو او لحد ما التنك يفضي وميبقاش فيه ولا شعره .. لييييييييييييييييييييه ؟؟ عشان انا كنت سمعت ان المفروض منظف الانجكشن ميتبقاش منه ولا نقطه في العربيه الا لما يتحرق عشان خراطيم البنزين متتآكلش دي نقطه والنقطه التانيه انك تقرص علي العربيه يعني مثلا هي الار بي ام بتاعها 8 تغير كل الغيارات كلها علي 5 او 4.5 وده عشان البوابه كمان تنضف وبالتالي تحرق اكتر وتفتح العربيه معاك وحاول انك قبل ما تعمل العمليه دي تقوم بتغيير زيت - تغيير فلتر زيت - تغيير فلتر هواء - تغيير فلتر البنزين - تغيير البوجيهات - تغيير دسك واسطوانه - تغيير دورة المياه كلها ودي بيقوم بيها ميكانيكي او متخصص ريداتيرات

اسف للاطاله ويارت تقوللي عملت ايه يهمني اعرف ايه الاخبار

**temeey** · 15-04-2013 04:30 AM

أخى إسلام كلام جميل وكلام معقول مقدرش أقول حاجه عنه.
بس كومنت بسيط : يا ريت يمشى خطوه خطوه وميغيرش كل الحاجات اللى تفضلت بذكرهم مره واحده علشان يوصل للعيب يبتدى الأول بالسهل والرخيص وبالتأكيد فلتر الهوا مهم جدا وممكن يبتدى بتنظيفه ويجرب قبل منظف الإنجكشن.

**eslam3344** · 16-04-2013 01:54 AM

كلامك معقول جدا يا بشمهندس تامر بس ده لو عايز يقتصد في الموضوع انما انت مش شايف ان كل الحاجات دي ضروري تتغير اول ما الواحد يشتري العربيه المستعمله ؟

**amr.mohamed85** · 16-05-2013 06:11 PM

بعد اذنكم انا حقلك الحل
حضرتك حتتفضل مشكورا بزيارة لمركز الصفا اللى فى جسر السويس
صحيح حتتعور فى 200 او 300 جنيه بس حتخرج من باب المركز العربية بتعمل معاك 300 كيلو فى الصفيحة وكل مايخص الانجيكشن ودورة البنزين سيعود كما كان زيرو
ده افضل حل
وبالنسبة للتبريد غير ترموستاتك بس بلاش الترموستات الصينى واغسل دورة تبؤيد وحط مياه خضراء وتأكد من عدم وجود اى تسريب وان المروحة شغالة كويس لانها ممكن تكون شغالة بس فيها مشكلة او لو شغالة على سرعتين ممكن تكون السرعة التانية مش شغالة

**فادى محمد** · 16-05-2013 06:19 PM

بلاش مركز الصفا..
عربيتك 1000 سي سي؟؟؟

**Astra Lovers** · 16-05-2013 06:48 PM

لرو ١٠٠٠ سيسي يا آي جي ار يا ايديال بلف
وشكرا

**DR-MOODY** · 10-06-2013 03:41 AM

صحيح نسيت اقولكم ااخر افتكاسات الصنايعيه :
1- كهربائي سيارات في سيدي بشر : بص يا داكتور م الاخر الترومبيل ده عاوز اسبراتير بتاع الالكترونى ده اصله لما بيفصل بيسخن.
2- ميكانيكي( اشك في ذلك )بعد الكهربائي بشارع : ابشمهندز دي ترومبة بنزيم ( اللي هو البنزين يعني ) مع العلم ان لما قلبها بيفصل دي بالسلامة مش هتدور تانى اصلا .
3- ميكانيكي في بحري : بعد ما عرضت المشكله ومشكله يا اسبراتير يا طرومبه اذا بالحل التالت بقه اللولبي اسم النبي حارسه .... ولا ده ولا ده اصلا يا صاحبي ... المشكلة عندك في دبلة الانجيكشن لانها عندك مكسوره وانت ماسكها بسلكه ( مع العلم ان ده صحيح فعلا ) انا فعلا مع الراي التالت ده بس شاكك لان لو بتفصل هتفصل خالص مش علي مزاجها ولا ايه؟؟؟؟؟؟؟؟؟؟؟