الموضوع: أى الموديلات أفضل فى البولو (98، 99، 2000)

وهل الثلاثة نزلوا 1000 سى سى ويبقى كل الموجود 1400 مسقط موتور ؟ ولا فيه حاجة منهم نزلت 1400 ؟

المشاركة الأصلية كتبت بواسطة elbaz45

بص يا باشا انا عربيتى بولو 2001 وعلى فكرة بيقولوا عليها برده بولو 2000 ودى الموديل اللى قبل البولو العيون وبتبقى فوانيسها مربعة عن البولو 98 و99 وواضح انك متقصدهاش فى مقارنتك على ما فهمت من كلامك
وعموما البولو عربية اعتمادية بس مش عائلية واللى اقصده بكلامى انك لو عاوز عربية صالون وشنطة تصلح لعائلة يبقى متفكرش فى البولو ولا الابيزا
انا بنصحك بالامانة البولو والابيزا موديلات 98 و99و 2001 عربيات جميلة وحلوة وحاجاتها كلها موجودة جديدة واستيراد وصياناتها مش صعبة وناس كتير شغالة فيها والناس هنا كمان مبيتأخروش بصراحة
ده حتى البشمهندس سيد اتخرب بيته تغيير زيت علشان يقولنا اى نوع زيت انسب لينا وربنا يقدره بصراحة

متشكر يا باشا على سرعة الرد
أنا فكرت فى العربية دى علشان عايز عربية اعتمادية وثبات أفضل من الكورى اللى فى نفس سعرها وقليلة الأعطال، موضوع انها مش عائلية ممكن أقبله فى الوقت الحالى ولفترة كام سنة كمان

الموديلات اللى ذكرتها حضرتك مفهاش 2000 عن عمد ولا سهواً ؟

أنا فعلاً ما ذكرتش 2001 علشان بس بنظرة على كونتاكت كارز لقيتها ممكن تفرق شوية فى السعر ... لكن لو قدرت أزود الفرق وقتها وكانت هى الأفضل يبقى تمام

المشاركة الأصلية كتبت بواسطة elbaz45

تقريبا والله اعلم مفيش بولو 2000 وزى ما قلتلك هما بيقولوا على موديل 2001 برده بولو 2000
وعلشان متلخبطش نفسك سيبك من موضوع 2000 لانى لقيت واحد بيقولى انه معاه بولو 2000 فقلتله ودى شكلها زى 2001 ولا شكل 99 قالى لأ دى شكل 2001 ولما بصيت عليها لقيته معدل الفوانيس من برة ومعرفتش انها موديل 99 غير من التابلوه لان التابلوه بتاع ال2001 حاجة تانية خالص غيرهم
ونصيحة ليك وانت بتشترى اشترى العربية بالموتور بتاعها حتى ولو كان تعبان لانك لما تغيره بنفسك غير لما تاخد العربية وهيا مغيرة موتور لان محدش عارف هوا جابه منين وفيه مشاكل ولا لأ والدنيا ماشية ازاى

شكراً يا "باز" باشا
كده عرفت معلومة جديدة ان فيه فرق بين 2001 و 1999 فى التابلوه

ياريت لو حد عنده ترجيح لموديل عن التانى يفيدنى

وإذا مكانش فيه فروق مهمة يبقى إن شاء الله أبحث عن حالة جيدة فى أى موديل فيهم

البولو عربيه جميله جدا بس اهم حاجه تجيب حاله كويسه وتكشف كويس وخد راحتك فى البحث متستعجلش وبالنسبه للاسعار انا اكتر حاجه سمعتها فى موديلات لغايه 99 هيا 35 الف واحد صاحبى شاريها من 3 شهور وكامله وموتور 1400 لكن لو بتدور على موديل 2000 او 2001 ده فى اختلاف بسيط فى الشكل وطبعا مطلوبه اكتر بس سعرها بيبتدى من حاجه واربعين ويمكن كمان توصل ل 50 فى الحالات الحلوه جدا
وبالنسبه للشنطه مش وحشه قوى انا بسافر وبحط فيها شنطه سفر نمره 3 ودى كبيره
وربنا يسهلك الحال وتنضم لينا فى قسم الفولكس

حاجه كمان وانت بتدور خليك (انف ) وانت بتشترى يعنى متاخدش عربيه شكلها متهان لان حيبقى صاحبها مش بيصرف عليها واهممممممممممممممم حاجه واول سؤال تسأله للى بيبيع ( هلى الرخصه باسمك ولا توكيل ) واوعى تشترى من تاجر مفيش تاجر بيجيب عربيه كويسه ولو جابها حيبيع بالغالى قوى

المشاركة الأصلية كتبت بواسطة Ayman_Aly

وهل الثلاثة نزلوا 1000 سى سى ويبقى كل الموجود 1400 مسقط موتور ؟ ولا فيه حاجة منهم نزلت 1400 ؟

؟؟؟