جميع النقاط المستخبية في القانون عشان تحافظ علي رخصك

**MoToRiZeR** · 13-08-2008 02:51 PM

بعد صدور القانون الجديد كثرت الأسئلة حول حاجات زي مكان الطفاية و الوضع القانوني للستاير الخلفية و كدة .. و منعاَ لأن أي حد يبلطج عليك سواء أمين شرطة أو ضابط ولا حتي الجن الأزرق .. انا بعد ما قريت بنود القانون بالكامل من الكتاب اللي في المرور فيه نص القانون ممضي من حسني مبارك نفسه .. جمعت الحاجات اللي ممكن تكون في العربية و مش واخد بالك إنها مخالفة

و لو عملت زي ما مكتوب في الموضوع إن شاء الله الضابط حتي لو حب يرخم عليك مش هيعرف يعمل معاك حاجة .. فيه طبعاَ حاجات هتلاقيها over و مش للدرجة دي و بتاع بس ده يعني تحسباَ لأقصي درجات الرخامة .. يعني واحد نازل من بيته و حاطط في دماغه إن يسحب رخصك إنت بالذات !

أولا الحاجات البديهية :

1- ممنوع الفيميه أي درجة منه حتي لو فاتحة .. مسيرك تقابل اللي يتلكلك .
2- بديهياَ .. متفكرش حتي تحط سرينة .
3- الزينون ممنوع .. لو حاطط زينون شيله

أشياء أخري :

1- لو حاطط فيميه عالفوانيس اللي ورا شيلها لأنها بتغطي عالعواكس اللي في الفانوس و ده بند واضح في القانون (لازم يكون في الفانوس عاكس)
2- لو العربية فيها خبطة جامدة .. إكصدام واقع .. فانوس مش شغال .. إزاز فيه شرخ .. صلح عشان الرخص متتسحبش أمن و متانة
3- قانون الملصقات و المعلقات يمنع أي ستيكرز سواء عالإزاز أو جسم العربية .. شيل كل الستيكرز .. حتي لو ستيكر موبيل ولا دكتور جريش شيل .. لو ستيكر دخول للشغل بس سيبه و لو تقدر متحطوش يبقي بلاش أحسن
4- الستائر الخلفية زيها زي الفيميه .. ممنوعة
5- الطفاية مكانها مش في الشنطة .. لازم تبقي في متناول إيدك .. حطلها تحت الكرسي بتاعك
6- الحاجات اللي بتتعلق في المراية لو رخم حقيقي هيقولك معلقات .. لو حاطط سبحة شيلها .. و لو معلق معطر شيله و حط اللي بيتشبك في شباك التكييف
7- قبل ما تخش الكمين وطي الكاسيت
8- الحزام ليك و للي جنبك مش ليك بس
9- جهزة كشف الرادار بتتصادر
10- لو مستلم النمر من المرور لونها إسود أو فيها أرقام مش واضحة وديها لواحد بتاع دوكو يقلبها أبيض و يزبطها .

حاجات متعملهاش و إنت ماشي :

1- لو اضطريت تجامل حد و تشارك في زفة .. متشغلش الفلاشر و تدي كلاكسات عمال علي بطال .. عشان محدش يقولك مواكب خاصة
2- لا أكل .. ولا شرب .. ولا تدخين .. ممنوع في القانون الجديد .. ممكن تتنفس لو عايز بس بالراحة
3- مترميش حاجة من الشباك قدام الكمين أو قدام أمين شرطة او ضابط (فيه باند بيخليها مخالفة في القانون بس يستحسن برضه للنضافة العامة)
4- طبعا متتكلمش في الموبايل
5- إلتزم بالسرعة القصوي للطريق و متمشيش عكس و الكلام ده كله

كدة مش هيبقي قدام الضابط غير إنه يقول إنه إشتبه إنك إرهابي و يمسكك قانون طوارئ أو الأمين يرميلك حتة حشيش في العربية و يلبسهالك .. بس العربية مش هيبقي فيها تماماَ حاجة يقدر يسحب عليها الرخص لأن دي كل الثغرات إن شاء الله اللي ممكن الضابط يرخم بيها عليك .

**Islam_galal** · 13-08-2008 02:58 PM

جزاك الله خيرا
مع اني مبعملش تقريبا كل اللي حضرتك كاتبه
بس حسيت بهم تقيل علي قلبي بعد ما خلصت الموضوع

ربنا يكفينا شرهم

**aliabutaleb** · 13-08-2008 03:04 PM

كل الحاجات دي متبنطبقش عليا ما عدا الاستيكرات
نايل موتورز على الزجاج الخلفي
ستيكر بـ لوجو الشركة على الزجاج الأمامي على اليمين
وستيكر PDI Ok بتاع فحص ما قبل التسليم فوق لوجو الشركة مش عارف أشيله. ماسك جامد أوي
كلها استيكرات صغيرة أوي ما عدا نايل موتورز
كدة قبل ما أسافر اسكندرية بكرة ان شاء الله هانضف كل ده

ربنا المستعان

جزاك الله خيراً يا أبو حنفي

**dynamic_alpha** · 13-08-2008 03:06 PM

طيب والله كويس السواقة نفسها لسه مسموحة

ممكن يسحب الرخصة علشان حاطط معطر ؟!

**R A N A** · 13-08-2008 03:14 PM

برافو علك ياموتورايزر بتفكرني بالمحامين لما يقعدوا يدوروا في ثغرات القانون عشان يخالفوه بس انت دورت في الثغرات عشان ننفذه يعني من غير تلاكيك من رجال المرور.

بس في سؤال هما ليه منعو الاستيكرات من على الازاز وجسم العربية يعني في استيكرات بتبقي عبارة عن شريط رفيع كده برسة صغيرة بيتلزق على العربية ايه الضرر منه.
انا مثلا حاظة 2 استيكر قدام علي الازاز من فوق خالص عند الشماسة الفيمية ودول مالهمش اي تأثير عليا في السواقة يعني ولا بيلخموني ولا بيبنوا هويتي يعني زي استيكرات النيابة والشرطة وكده يعني حد حابب يذوق شكل عربيته ولا يداري حتة بازت في الدوكو من سواق ميكروباص مثلا فهما ليه بيعتبروها مخالفة لو حد يعرف ياريت يقولنا وكمان سمعت ان الشماسة الصغيرة الفيمية دي مخالفة طب ليه برده. ماهي في نفس حجم سماشة العربية الاصلية لما بتنزل علي الإزاز بدل مانقعد ننزل فيها كل شوية ونطلعها لحد ماتفوت مننا وبرده الحاات اللي بتتعلق في المرايا مشكلتها ايه معاهم .

عموما ربنا يستر ومحدش يرخم عليا في الحاجات دي بس الحزام والموبايل والاكل والشرب والسرعة والزينون والكلام ده انا ملتزمة بيهم جدا والطفاية هاطلعها من شنطة العربية وامري لله احطها تحت الكرسي يارب بس متقعدش تتدحرج وتقرفني

عموما ميرسي علي مجهودك وتفحيصك وتمحيصك لقانون المرور الجديد الشديد السعيد الفريد

**MOHAMED ABD EL SHAFY** · 13-08-2008 03:24 PM

مش من حق اى فرد انه يقولك افتح شنطة العربية ويشوف فيها ايه
لازم ازن نيابة الاول
مش من حق حد يركب معاك او يدخل العربية
لازم ازن نيابة
تفتيش العربية لازم ازن نيابة
زيها زى البيت
عشان كدا لما تدخل لجنة ارفع كل الازازز واقفل السنتر ماعاد الزجاج الخاص بيك فقط عشان محدش يرميلك حشيش او مخدرات
وخلى بالك ( بتحصل كتيير مش هزار ) عشان يدفعك 500 جنية وينفضك زى الباشا عشان تهرب من المصيبة دى

**Islam_galal** · 13-08-2008 03:27 PM

بتحصل للأسف في الموانئ حد يطلب توصله للبوابة و اي كيس معاه بيبقي مسئولية صاحب العربية
حصلت للأسف و بقت قضية مخدرات

**MoToRiZeR** · 13-08-2008 03:34 PM

الف شكر يا جماعة لا شكر علي واجب .. انا أحب أساهم في حرقة دم كل ضابط مفتري

المشاركة الأصلية كتبت بواسطة dynamic_alpha

ممكن يسحب الرخصة علشان حاطط معطر ؟!

في القانون ممنوع تعليق أو لصق أو رسم أي حاجة في السيارة .. بس هل بيعتبروا الحاجات اللي بتتعلق في المراية زي المعطرات و السبح مثلا معلقات ؟ الإجابة : نعم .. بس لازم تكون واقع في ضابط مراته مصبحاه بشبشب علي وشه كدة و نازل يطلع قرفه عالناس

القصة دي قالهالي سواق تاكسي في إنه وقف في كمين و الضابط فضل يلف حوالين العربية .. فا الراجل غلط غلطة عمره و قاله "يا باشا إحنا في السليم إن شاء الله" .. الضابط إتجنن و قاله إنت هتعرفني شغلي ولا إيه .. إنت اللي هتقولي ماشي سليم ولا مش سليم !! .. و قام باصص جوة العربية و قاله إيه ده ؟ سبحة ؟ و قام عامله وصل معلقات !

فا اللي عمله مع السبحة ممكن يعمله مع المعطر .. الإتنين بيتعلقوا في المراية .. فا انا جبت معطر من اللي بيتشبكوا في شباك التكييف .. طبعا دي مبالغة مني و عشان ضابط يسحب رخص عشان كدة لازم يبقي extra رخم .. بس انا اما لقيتهم شادين حيلهم كدة حبيت أبقي في السليم أوي و ربنا يكفينا شرهم

المشاركة الأصلية كتبت بواسطة birdybirdy

بس في سؤال هما ليه منعو الاستيكرات من على الازاز وجسم العربية

فيه اسئلة كتيرة بالنسبة للمرور ملهاش إجابات
زي .. ليه بيخبوا الرادار ؟ ليه الفيميه ممنوع ؟ ليه العسكري ميعرفش الشارع اللي هوا فيه إسمه ايه ؟ حاجات كدة متشغليش بالك بيها لأن مرحلة النقاش عدت و بقي ملهاش لازمة .. دول هيعملولنا شنطة إسعافات فيها ملاية حروق ولا أكنها تجهيزات غرفة إنعاش ! :)

**MoToRiZeR** · 13-08-2008 03:39 PM

المشاركة الأصلية كتبت بواسطة MOHAMED ABD EL SHAFY

مش من حق اى فرد انه يقولك افتح شنطة العربية ويشوف فيها ايه
لازم ازن نيابة الاول
مش من حق حد يركب معاك او يدخل العربية
لازم ازن نيابة
تفتيش العربية لازم ازن نيابة
زيها زى البيت
عشان كدا لما تدخل لجنة ارفع كل الازازز واقفل السنتر ماعاد الزجاج الخاص بيك فقط عشان محدش يرميلك حشيش او مخدرات
وخلى بالك ( بتحصل كتيير مش هزار ) عشان يدفعك 500 جنية وينفضك زى الباشا عشان تهرب من المصيبة دى

نصيحة مهمة جداَ بجد جزاك الله كل خير

المشاركة الأصلية كتبت بواسطة Islam_galal

بتحصل للأسف في الموانئ حد يطلب توصله للبوابة و اي كيس معاه بيبقي مسئولية صاحب العربية
حصلت للأسف و بقت قضية مخدرات

انا بقي حصلت في واحدة معرفة .. بس محدش رمالها حاجة .. عارف حضرتك المخدرات جت منين ؟ من التوكيل :) كانت بتعمل صيانة للعربية و تقريبا حد من اللي شغالين في التوكيل وقع منه "الإصطباحة" بتاعته عندها .. و توكيل سيارات مشهور و محترم جدا و عربياته غالية جدا :) بس عدت لأنها قريبة شخصية مهمة

**theking2690** · 13-08-2008 03:50 PM

الف شكر يا باشا طبعا بس انا كنت عاوز اعلق على نقطتين

1-انا عندى خدش فى جنب العربيه كبيييير هل ده فيه مشاكل لأنى ممكن يحصلى حاجه لو قالى ترش العربيه

2-انا معلق فى المرايه المعطر اللى عل شكل جنوط فى حد بيتكلم عليه