انا هنا عاوز اقول ان مهما الدنيا اسودت في وشك وحسيت انك ما بتعرفش تعمل حاجة تؤهلك انك تبقى غني في يوم من الايام ، حضرتك فاهمها غلط خالص! حضرتك مش مقدر قيمة نفسك ، انت مخك نضيف بس مقابلتش اللي يرتبلك دماغك ويقولك على خطوات في منتهى السهولة.
مبدائيا كده وعلى بلاطة:
اللي يقولك التلت كلمات دول تقوله في العشة والا طارت ؟؟؟
1- البورصة
2- فوركس
3-التسويق الشبكي
ساعات يسموا التسويق الشبكي التسويق الهرمي وساعات التسويق متعدد المستويات mlm
لو ليك في التلاتة دول اسحب نفسك من الموضوع من سكات كده ، سكتك غير سكتي طريقك غير طريقي ، انا ماليش في الاقتصاد التخيلي انا بتاع اقتصاد حقيقي يعني مال حلال يفيد الفرد وينمي المجتمع
اكمل والا محدش مهتم ؟
اقتباس:
المشاركة الأصلية كتبت بواسطة abou_ruqi
بص يا ريس
البيزنيس علشان يتم محتاج اربع اعمدة اساسية
كلنا حاولنا وفشلنا علشان احنا فاكرين ان احنا المفروض نكون نعرف نعمل الاربعة ، ومش بس نعرف لا ده لازم نمارس الاربعة ، يا سيدي لا!!
انا بحب قوي اقرأ ازاي عمالقة البيزنيس ابتدوا ، ملقيتش ولا واحد كان عنده كل شيئ ولا بيعرف يعمل كل حاجة في البيزنيس ، خاااااااالص!
انا مش طالب منك غير واحدة فقط من الاربعة ، ولو حتى معندكش ولا واحدة ليها حل عندي وبعد ما تقرأ الموضوع ده حتعرف تعمل ايه
بص يا ريس اللي بيشتغلوا في الاعمال تلت انواع
مستثمر.... ده المعلم الكبير ودي مرحلة حتوصلها لوحدك بعد فترة من الاعمال الناجحة
رجل اعمال .... ده لعيب وهو ده هدفنا من الموضوع ده
التاجر او الصنايعي او صاحب عمل ..... اللي هو self-employed يعني ، ده اللي كلنا بنفكر فيه لكن انا عاوز الموضوع ده يغير فكرك شوية ، مش هو ده نهاية المطاف
اهم اربع ركائز للبيزنس هما:
1- المخ
2- التمويل
3- التنفيذ
4- التسويق
الاربعة دول في نظري ليهم نفس الوزن النسبي ، بس ساعة الشغل حتضطر تغير الاوزان غصب عنك
المخ يعني الافكار ، الدماغ العالية اللي بتفكر السوق عاوز ايه ، اللي كمان ممكن تخلق احتياج لسلعة مالهاش احتياج ( انت كنت محتاج الفيس بوك قبل ما يخترعوه ؟ )
الخبرة والعلم اللي يخليك تكتب business plan صح لما تقدمها لرقم 2 يعرف انك مش قرد بصديري وانك عارف انت بتعمل ايه، الركيزة دي عايزة الفاهم الواعي اللي عنده قدرة على الابداع ، عندك منه ده؟ انا متأكد ان عندك منه مش علشان انتوا صحابي ، انما من خلال احتكاكي بالشعوب في الخارج ، احنا بدون مجاملة مخنا يوزن بلد واعلى من الشرقيين والغربيين كمان
التمويل ، المال عصب البيزنس وهو الدم اللي بيجري في عروقة ، مفيش مشروع في الدنيا اتعمل رأس ماله صفر ، صدقني متسمعش لحد يقولك غير كده
التنفيذ ، هو ده مصيبتنا كشباب مصري بنيجي عند دي وندور جوانا بنعرف نعملها والا لا ؟ مع ان دي في البيزنس اهيف واسهل حاجة لانك ببساطة حتعملها outsourcing.!!! حنتكلم فيها دي كمان شوية
التسويق ، اوعى تعمل حاجة بايديك وتنزل تسوقها بنفسك ، ادي العيش لخبازه دي اولا ، ثانيا علشان توصل للمنتج النهائي حتكون مرهق ومستهلك ماديا ونفسيا وعصبيا ، اوعى تنزل السوق وانت بالشكل ده وانت حتموت على البيع لكن مش قادر تعمل presentation لكنك مرهق تماما ، وبعدين انت عندك مهارات التسويق ؟ عارف الاعيبه؟ دي بقه انا متأكد ان معظمنا مالناش فيها وواخدنها عافية ، بص علي المسوقين اللبنانيين وانت تعرف انك بره اللعبة دي خالص ، انما لو فاهمها يبقى زي الفل
عندك كام واحدة من الاربع حاجات دي ؟
دماغك حلوة ؟ والا معاك فلوس ؟ والا صنايعي شاطر ؟ والا مسوق مالكش مثيل ؟
انا مش طالب من غير على الاقل واحدة
ويتبع بس حغيب عليكما شوية ان شاء الله........
اقتباس:
المشاركة الأصلية كتبت بواسطة abou_ruqiنرجع لموضوعنا
اولا المخ
انت محتاج من عقلك حاجتين علشان تبتدي اولا فكرة المشروع ثانيا التخطيط لتنفيذ الموضوع وتحويل الفكرة المجردة التي لا تسوى ربع جنية لبيزنس حقيقي على الارض
الاولى دي عاوزة كرامة من عند ربنا والتانية علم ودراسة ومش حتيجي عافية ولا فهلوة لازم تقرأ ازاي تعمل خطة عمل ودراسة جدوى صحيحة وخلي بالك هي مش فيزياء نووية ، دي مستطاعة جدا بس لازم تبذل مجهود
بالنسبة للفكرة ، لا تحتقر الفكرة ابدا. لا يوجد فكرة تافهة اي شيئ ممكن يترجم لبيزنس وفلوس المهم تؤمن بيه
ولإن الشيئ بالشئ يذكر مرة من تلاتين سنة والا حاجة الدكتور مصطفى محمود قال في حلقة من العلم والايمان فكرة مش ناسيها لحد دلوقتي قالك مش لازم تعمل حاجة كبيرة علشان تعمل فلوس كتير المهم تتقنها ومحدش يعرف يعملها زيك ، قال مرادونا بيلعب كورة زيه زي اي ولد في الشوارع المصرية شغلانة تافهة اهيه انما لانه لعب كورة كويس كسر الدنيا وكمان جون ترافولتا رقاص بيهز وسطه ( ايامها ) زيه زي اي..... انما كسر الدنيا برضه ، فانت مش لازم تكون متخرج بمرتبة الشرف من الجامعة علشان يكون مستقبلك كويس ، خالص!
-انتهى كلامه رحمة الله عليه -
عارف انت لما بتقعد على القهوة مع صحابك وواحد يقولك هما ليه ما يعملوش شيشة من غير ولعة فواحد يرد عليه طب وبتوع الفحم يشتغلوا ايه ؟ وتضحكوا وتكملوا كلام على ماتش الزمالك ، اهي دي فكرة ممكن تعدي مرور الكرام وممكن تكون سبب ثراء ليك انت وتلت اجيال بعدك ، انما انت اتعاملت مع الفكرة على انك ولد بيلعب في الشارع غيرك حيتعامل معاها علي انه مرادونا
فكر كده الراجل بتاع كنتاكي عمل ايه في الدنيا غير انه حط على الفراخ دقيق وشوية توابل بقى اكبر سلسلة مطاعم في العالم وهو واحفادة للجيل الالف حيعيشوا ملوك
بذمة اهلك يا شيخ بقه الشيشة اللي من غير ولعة فكرة احسن والا فراخ كنتاكي ؟ :)
فكر في مجالك علشان نبقى عمليين ، مجالك هو ملعبك ، لو انت سباك مفكرتش هما ليه ما يعملوش ...... بدل ال....... وتفكر ممكن تعملها انت نفسك والا لا ؟
لو انت مقاول مفكرتش في طريقة للبناء ممكن تتنفذ وتتميز بيها زي ما حسن فتحي فكر وزي ما اللي اخترع قوالب الخرسانة الجاهزة بدل الخشب والنجار المسلح والكلام العتيق ده ، الشركة دي على فكرة اربحها مليارات دلوقتي
اكيد جاتلك افكار لتطوير عملك ، ايا كان عملك ، لا يوجد عمل في الدنيا غير قابل للتطوير ، فكر انت بس
طب ولو معندكش افكار تعمل ايه ؟
تشتري افكار
هو ده ممكن ؟
تصدق ممكن!
حضرتك تجيب 300 جنيه وتروح شارع القصر العيني نمرة 101 حتلاقي مكتب براءات الاختراع تدفع وتعمل بحث في سجلاتهم حتلاقي مئات الالف من الاختراعات وصحابها ناس غلابة اللي ما انتحرش منهم شغال قهوجي دلوقتي واللي فلح بقى فني معمل ، الخدمة دي ببلاش في كل انحاء العالم انما علشان احنا لينا وضع خاص فبفلوس ، وال 300 جنية دي كانت من 5 سنين لما سألت ، الله اعلم بكام دلوقتي
المهم اعمل بحث في مجالك ، سيارات بقه او سباكة او كمبيوتر شوف انت عاوز ايه
عجبتك فكرة كلم صاحبها واشتري براءة الاختراع منه ، وانت وشطارتك ، ممكن تديله فلوس ، ممكن تديله نسبة من الارباح ، ممكن تعينه مدير انتاج الاختراع بتاعه في شركتك ، المهم هو حيفرح باي حاجة صدقني دول اغلب من الغلب ، بس متجيش عليهم علشان ربنا يباركلك
ملقيتش حاجة عاجبك او ماتفقتش ، فكك من مصر خالص ، اشتري من بره!!!
تسمع عن جوجل باتنت ؟ ده محرك بحث في براءات الاختراعات http://www.google.com/?tbm=pts
بلاش ، ايه رأيك في صالة مزادات على براءات الاختراعات ؟
http://www.patentauction.com/
موقع بيبيع تاني اهه
http://www.ipofferings.com/patents-for-sale.html
المواقع بالهبل على النت ، تحت ايديك مئات الملايين من الافكار عاوزة اللي ينفذها ، مالكش حجة اظن ؟
عارف سوني العملاق الياباني ابتدت ازاي ؟
بيقولك في واحد امريكاني اختراع الترانزيستور ، ولف على الشركات الامريكية كلها جينرال الكتريك وغيرها ، قالولوا انت عبيط يالا ؟ انت عاوزنا نعمل راديو قد كف الايد ؟ ده الراديو قطعة اثاث في البيت مين حيرضى يشتري راديو تافة كده ؟
*الراجل احبط كده زي الجدع اللي لسه شاتمني من شوية ده ، لحد ما قابل راجل ياباني مهاجر لامريكا قاله انا مخترع حاجة اسمها الترانزيستور تغني عن اللمبات ، تشتري يا حج ؟ قاله تيجي معايا اليابان ؟ قاله اجي ، وراحوا اليابان وعملوا سوني يا مؤمن!!!
اسيا نهضت كده ، عاوز البلد تنهض ولا نقعد نضحك على مرسي مع باسم يوسف كل جمعة ؟؟
يتبع ان شاء الله.........
اقتباس:
المشاركة الأصلية كتبت بواسطة abou_ruqiاحد اهم الفروق بين التاجر ورجل الاعمال ، التاجر بيلزق في تجارته وبيحارب علشانها كأنها مراته ، بينما رجل الاعمال زي العطيط كل يوم مع واحدة ولما يزهق منها يصاحب غيرها
المثال وحش في العلاقات انما في البيزنس هو ده الصح ، مفيش انتماء ولا عواطف خد خيرها وارميها ، الفايد باع هارولد وساويرس اون تي في ، وده العادي في دنيا الاعمال
اقتباس:
المشاركة الأصلية كتبت بواسطة abou_ruqiعلشان نخلص فكرة "المخ" وبعد ما عرفت حتدخل دنيا الاعمال ازاي ولقيت الفكرة اللي انت مؤمن انها حتتباع كويس وحتكسب ، اعمل الشغل الرخم بقه ، شوية ادارة اعمال ، طبعا اي واحد هنا متخصص في الادارة يعرف يفيدك احسن مني ومتوقع ان معانا لعيبة وحيولعوا الموضوع نصايح
انما من ناحيتي انا شايف يكفيك business plan كويسة تشمل دراسة الجدوى ، ومش تعملها في دماغك ، لا ، تتكتب وبطريقة احترافية لانك حتقدمها لناس بتفهم بعدين
المواقع على النت بالهبل بتساعدك في عمل الخطة وفي بعضهم بيديلك امثلة جاهزة بالمجان زي دول
http://www.bplans.com/sample_business_plans.php
https://drive.google.com/templates?q=business+plan#
http://www.mtdc.com.my/taf-business-plan.php
http://www.sba.gov/category/navigati...-business-plan
بس علشان اكون صادق معاك ، الحاجات المجانية اللي على النت متملاش عيني مش قد كده ، خدها كدليل وحاول تحقق اللي مكتوب في ويكيبديا العربية اللي هنا
http://ar.m.wikipedia.org/wiki/%D8%A...B9%D9%85%D9%84
ومهم قوي تعمل SWOT analysis اللي هو تحدد بالظبط الاربع نقاط دول
1- strength نقاط القوة في مشروعك
2-weakness. نقاط الضعف
3-opportunity فرص نجاحك
4- threats التحديات المتوقعة
النقطة الهامة التانية اللي لازم تعملها هو تسعير منتجك او الخدمة اللي حتقدمها علشان تعرف تدرس المشروع!
لو فكرت انك تحسب التكلفة وتزود عليها هامش الربح وتطلع سعر البيع ، يبقى انت تاجر عادي بيفكر بالفطرة وشكلك مش ناوي تبقى راجل اعمال
السعر بيتحكم فيه عدة عناصر ، المهم فيهم حاجتين
1- سعرك ليه حد ادنى اللي هو السعر اللي عميلك لو سمعه يقولك لا يا عم ده رخيص قوي يبقى اي كلام! ، وحد اقصى اللي هو السعر اللي لو عميلك سمعه يقولك انا اعمله بنفسي ارخص او بدون منتجك اللي داخل في صناعته يخلي منتجه ارخص
2- المرونة elasticity
طبعا لعيبة الاقتصاد هنا اتطحنوا مسائل في المرونة ايام الجامعة ، لكن انا هنا حبسطها
لو انت من ذوات الماية المعدنية ، في البيت ما بتشربوش غيرها. طبعا بتشتري بالصناديق ، لو بتجبها من كارفور مثلا ب 1.10 جنيه للازازة وبعدين لقيت اولاد رجب جانب كارفور بيبع الازازة 1.05 جنيه. اكيد حتقلب كارفور وتروح لرجب لان الخمسة قروش حتعمل معاك 75 جنيه وفر اخر الشهر
شوفت حساسيتك للسعر عالية ازاي ؟
تخيل بقه انت في الساحل الشمالي في بلاج فخم اوكسجين والا لابلاج ، وانت في اغسطس الساعة 2 وعطشان طحن وعدا بياع معاه جردل تلج فيه نفس ازازة الماية وبيبعها بعشرة جنيه ، طبعا حتشتري
يا راجل ده انت سيبت كارفور علشان خمسة قروش!!!!! ازاي اصبحت غير حساس للسعر كده ؟
لاختلاف الزمان والمكان والاحتياج والاهم الوفرة والندرة
تطبقها ازاي على سياستك التسعيرية ؟
لو افترضنا ان منتجك هو مكثف مياة بيحول الرطوبة الجوية لماء عذب قابل للشرب ( على فكرة جدواه الاقتصادية صفر متفكرش فيه )لكن ده مثال
لو انت تاجر حتحسب التكلفة وتحط هامش ربحك ومصاريف شحنه للسعودية وتطلع السعر
ونفس الموضوع بالنسبة للتصدير لماليزيا
بس الشحن لماليزيا خمس اضعاف تكلفة الشحن للسعودية يبقي منتجك حيبقي اغلي في ماليزيا ، بديهي صح ؟
بس يا ريس السعودية بلد شديدة الاحتياج للماء وماليزيا بلد المطر بينزل فيها 300 يوم في السنة ده غير شبكة الانهار اللي مغطية البلد يعني بلد عندها وفرة للماء
يبقى بعد دراسة السوق منتجك يتباع في السعودية ب 1000 دولار مستريح وفي ماليزيا ب 50 دولار واحتمال كبير ما يتبعش
دراسة سوقك اهم حاجة قبل التسعير
تمام كده ؟
اقتباس:
المشاركة الأصلية كتبت بواسطة abou_ruqiالمهم....
خلاص حددت مشروعك ودرسته وعملته خطة عمل متكاملة ، لو معاك التمويل سيبك من المشاركة دي واستنى اللي بعدها ، معكش ؟ بص بقه يا سيدي
انت لما عملت business plan مش عرفت التكلفة ؟ حددت سعر البيع ؟ قدرت مبيعاتك في السنة ؟ عرفت حجم المال في مشروعك نسبته قد ايه من اجمالي المشروع ؟
طلع العائد على راس المال قد ايه في السنة ؟ الالف جنيه دورتها كام سنة علشان ترجعلك ومعاه اختها الالف التانية ؟
شوف يا سيدي لو تقديرك للوزن النسبي لراس المال 40% مثلا
يعني 1- المخ ( حنقول الادارة بقه ) 30%
2- رأس المال 40%
3- التنفيذ 20%
4- التسويق 10%
لو في مصر مثلا فائدة البنك على الودائع 10% ومعدل التضخم في مصر 25%
ال 40% دول اللي هما نصيب المساهم بالمال من اجمالي الارباح لو مكنوش ضعف فايدة البنك و اعلى من معدل التضخم.مش حتلاقي اللي يساعدك
ده الحد الادني ، اقل من كده يبقى الشراكة معاك بخسارة ، متجبش تمنها ، حط نفسك مكانه تدخل فيها ليه ؟ في مليون حاجة تزودله ثروتة احسن من مشروعك!
بس مش عاوزك تظبطها في الخطة علشان تزغلل عين المساهم وهي ارقام غير واقعية ، لانك بكده تكون ارتكبت كبيرتين الاولى الكدب والتانية السرقة ، انت عاوز تبتديها وربنا غضبان عليك ؟ ده من غير بركاته منلاقيش شربة ماية!!!
لاحظ اني حاطيت التنفيذ والتسويق نسب من الارباح على غير العادة بدل ما يتحسبوا تكلفة ، حنبقى نتكلم فيها لما نوصلها ، وانت مش ملزم تتبع الطريقة الغريبة دي انما انا جربتها ونفعت: )
حتجيب التمويل ده منين بقه ؟
بره مصر الحكومات بتدي منح - مش قروض - بس ما بتبقاش كاش، اما تشتريلك هي اللي انت محتاجه ، او تصرف انت وتحصل منها لذلك برضه بتحتاج رأس مال ولكن اصغر بكتير
اما تمويل ذاتي انت معاك فلوس او التلاتة اللي حيقوموا بالوظايف التانية حيدخلوا مساهمين وبالتالي انتوا الاربعة تصرفوا علي المشروع وده الطبيعي اللي انتوا عارفينه وبنشوفه كل يوم
او عائلي ممكن تستلف منهم وترد او تدخل اخوك شريك او تستلف بدون رد ودي مش حيقبلها غير ابوك او امك: )
او تدخل مساهم ، رجل اعمال مثلا مالوش دعوة بالعمل نفسه حيحط معاك فلوس وياخد فلوس وده نوعين:
يا اما مساهم ملاك / رأس مال مخاطر / venture capital)vc (/ angel capital كل دي اسماء لمسمى واحد ، ده واحد حيدخل معاك بالمال نظير مال مش نظير نسبة
يعني بناء على خطتك حيقولك حديلك مليون جنيه ترجعهملي 1.8 مليون بعد تلت سنين ، ومالوش دعوة بالشركة بتاعتك خالص ، بشرط انه ياخد المبلغ ده لو الخطة اتحققت انما لو خسرت يخسر معاك لو كسبت اكتر من المحدد في الخطة مالهوش دعوة هو حياخد ال 1.8 بتوعه فقط ، في ناس بتقول حرام ، انا معرفش ، بس انا شايف انه طالما بيخسر معايا يبقى شريك مش مرابي! المهم نبقى نسأل فيها مش حنعمل حاجة حرام ، بس هو بيطالبك باستمرار بتقرير عن المصروفات والايرادات لانه لازم يعرف فلوسه راحت فين وهل بتصرف بحكمة والا بتبددها
احلى حاجة في الملاك ده انه لما بيخلص الاتفاق وبياخد فلوسه في ميعادها ، بيروح لحاله وبتخلص انت منه ويبقى مشروعك ملكك ، اعتبرها شراكة مؤقتة مش ابدية
متستغربش لما تعرف ان في مستثمرين كتير بيحبوا الموضوع ده ، ومتستغربش اكتر لما تعرف ان في شركات شغلها هو الموضوع ده ، بصراحة معرفش مصر فيها الشركات دي والا لا . هنا عندي في شركة مالتيناشيونال شغلتها تساهم براس مال مخاطر
http://www.netrove.com/
النوع التاني هو الشريك الحقيقي اللي ليه نسبه في كل شيي اللي هو قانونا احد الملاك مدي الحياة ، اللي احنا افترضنا فوق ان نصيبه في الشركة 40%
ده طبعا مخالف لفكرة الشركة المساهمة اللي بيدرسها طلبة تجارة ، ان نسبة كل مالك هي نسبة مساهمته براس المال ، هنا ابو رقية بيقول المساهم حيدخل ب 100% من راس المال وياخد 40% !!! ،بص انا مبحبش الخطأ الشائع في الافلام العربي اللي يقولك انا شريك بالمال وانت بالمجهود ، ده كلام اهبل والمجهود ده تحطه في عينك لا موأخذه
في الحالة بتاعتنا في الموضوع لو حتمشي على اللي اتقال انت ياللي طالب فلوس من مستثمر ايديك مش فاضية ، ده انت entrepreneur ده انت يا اما عندك اختراع محدش فكر فيه قبلك.وده ليه تمن يا اما شاري اختراع يعني دافع فلوس وتبيعه بالسعر اللي انت عاوزه ، وعامل دراسة جدوي ودي بفلوس وعامل خطة عمل ودي بفلوس وممكن تكون عامل نموذج فعلي ملموس prototype للمنتج النهائي وده بفلوس وممكن تكون اتفقت مع مسوق داخل مصر وكمان عندك توكيلات توزيع خارج مصر زي ما حنشوف لما نوصلها وممكن تكون اتفقت مع اللي بينفذ كل ده وبفلوس وكمان انت حتدير والادارة مفصولة عن الملكية يعني بفلوس بس انت بدل ما حتاخد كل الفلوس دي دلوقتي كرقم ثابت او مرتب ، حتاخد نسبة من الارباح قدرناها فوق ب 30% !
فلوس المستثمر حتدخل ازاي ؟ هل هو شاري منك 40% بحكم انك قبله بتمتلك 100% وساعتها حتبقى الفلوس ملكك تصرفها زي ما انت عاوز وبرضه خزينة الشركة حتفضل صفر. ابقى قابلني لو لقيته المستثمر اللي حيشتري الوهم ده ، الشركة في وضعك ليس لها قيمة لانها لا تنتج شيي وارباحها صفر ، الكلام ده قدام لما الشركة تكسب ويبقى ليها تمن تبيع اسهم تبيعها كلها برحتك
المستثمر هنا داخل بزيادة على رأس المال يبقي الفلوس مش بتاعتك دي بتاعة الشركة المالكة للمشروع
ممكن يدفع تمن ما تم انجازه في المشروع اما ادارتك للمشروع فيدفع لك مرتب شهري ، وساعتها يبقي هو المالك الوحيد للشركة بنسبة 100% وانت مدير الشركة يعني موظف عنده ، يبقى انت بدل ما كنت بتدور على وظيفة خلقت لنفسك وظيفة وفي مركز المدير من اول يوم مش وحشة لو مش في دماغك تبقى رجل اعمال
او متخدش اي حاجة نظير النسبة زي ما قلنا
اخوك اللي في السعودية وعمك اللي في الكويت وجارك اللي في دبي بمعارفهم هناك يعرفوا كويس ان اخوتنا العرب بيدوروا بشمعة علي مشروع كويس يستثمروا فيه
عندك كمان كتير من اللاجئين زي السوريين والليبيين والعراقين اللي في مصر ، فكر خارج الصندوق
طب في مصادر ايه كمان للتمويل ؟
الزفت البنك طبعا!!
اهو ابكم اصم ومش حيضايقك يوميا زي شريكك بس يا ويلك لو اتأخرت شهر ، والربا حرام حرام حرام ، الا لو بنك اسلامي حقيقي ان وجد مثل هذا البنك
الاحلى من كل ده بقه ، فاكر لما قلتلك اكتب خطة عمل احترافية علشان حيشوفوها ناس بتفهم ؟
خد عندك
http://www.sfdegypt.org/web/sfd/home
http://www.fedamisr.net/
http://ayadina.kenanaonline.com/topics/56875
http://www.eba.org.eg/Main/default.aspx
http://www.arab-hardware.com/
ارجو تحري المال الحلال في المعاملات مع الجمعيات دي ، وعلشان اكون صريح انا ما اتعاملتش معاهم عمري
( ملحوظة هامة جدا: كل النسب اللي فوق افتراضية وغير ملزمة لاحد )
اقتباس:
المشاركة الأصلية كتبت بواسطة abou_ruqiخلاص يا ريس ؟ حددت الفكرة ؟ عملتلها دراسة ؟ لقيت تمويل ؟ اشتغل بقه!!!
حتنفذ الفكرة ازاي ؟ دي بقه لكل فكرة شغلها انما حنضرب امثلة والباقي بالقياس
لو منتجك صناعي مثلا ، اول حاجة تفكر فيها النموذج prototype. لازم تحول الفكرة لشيي ملموس توريه للي حيعمله
حتعمل البروتوتايب ازاي ؟ لازم حضرتك ترسم الموديل الاول على الورق وبعدين تبنيه علي الكمبيوتر 3D وبعدين تنحته باستخدام 3D printer ودي سعرها خرافي ، ومش مستهلة ده انت حتستخدمها مرة والا مرتين مش معقول تشتريها
انما اللي لا مفر منه انك تعمل البروتوتايب علي الكمبيوتر ، فيا اما حضرتك بتعرف تشتغل على برامج ال 3D زي 3D max او maya يا تشوف حد حبيبك بيعرف يا تروح لشركة كمبيوتر ودول اكتر من الهم على القلب في مصر
بعد كده تاخد التصميم ويا تشوف حد عنده 3D printer ودي نادرة جدا في مصر واكيد مكلفة يا اما حضرتك تعملها outsourcing بره مصر ، والشركات اللي بتقدم الخدمة دي بالهبل على النت انا هنا حديلك شركة امريكية اسعارها معقوله وسريعة خلال اربع او خمس ايام حيكون النموذج بين ايديك ، وليا واحد صحبي مخترع برضه جربها واتبسط جدا من الجودة
دي حضرتك بتبعتلها الملف وتطلب الخامة اللي انت عاوزها ، معدن او زجاج او بلاستيك وتديها الابعاد وهي تنفذ
http://www.firstcut.com/
غير كده في كتير من الاحيان بيبقى البروتوتايب سهل تنفذه بنفسك وفي مواقع وفيديوهات بالهبل بتشرحلك وتبسطلك الموضوع اكتب انت بس في جوجل how to make a prototype وعيش
النموذج ده شيئ مهم جدا وممكن يكون مرحلة قبل التمويل علشان تقنع بيه حد يشاركك لانه بيوفر عليك الكلام الكتير وبيدي ثقة انك قادر على الانتاج ومش جاي تهرج ، وكمان علشان انت نفسك تتأكد انك ماشي صح
عملت النموذج ؟ شغال تمام ؟
نفذه بقه!
معاك فلوس تعمل مصنع وخط انتاج ؟ تمويلك قوي يعني ؟ توكل على الله
طب ولو مش معاك ؟ كلمة السر في الصناعات الصغيرة OUTSOURCING
تروح لشركة او مصنع او ورشة او مسبك او مشغل ، وتتعاقد على انتاج القطعة بتاعتك وتوفر على نفسك تكاليف انشاء بنية التصنيع الاساسية ، بس خد بالك من دي ، لو منتجك قطعة واحدة فقط ، طنبور عربية مثلا انت بتدي سر الصنعة للمصنع ده ، وهو حيستناك تشيل قرف التسويق واول ما المنتج يبقى عليه طلب حيقلبك ويصنعه هو باسمه ، المفروض حقوق الملكية وبراءة الاختراع والعقد اللي بينك وبينه اللي كتبه محامي من طرفك يحميك ، بس متضمنش برضه
انما لو المنتج مركب من اربع خمس قطع زي دينامو العربية او الجيربوكس او حاجة معقدة ، اتحلت يا ريس ، اعمل كل قطعة في مصنع مختلف وبالتالي كل مصنع مش حيبقى عارف البتاعة اللي انت طالبها دي بيتعمل بيها ايه ، ووقتها مش حيبقى مطلوب منك غير ورشة تجميع بتاعتك، شغل في كام صنايعي تبعك
ويا سلام بقه لو عملت كل قطعة في دولة ، الله عليك ، حتة في مصر وحتة في تايلاند وحتة في الصين وحتة في ماليزيا ، ده لو منتجك عزيز قوي وانت عارف انه حيكسر الدنيا
وعلى فكرة الاتفاق مع مصنع في الصين بالايميل اسهل من ورشة في حرفيين: ) بس ممكن يكون صاحب المصنع عمك والا صحبك وساعتها تلعبها كالاتي
مش عنوان الموضوع منغير ولا مليم ؟ طيب ما تتفق مع المصنع انه ياخد فلوسة نسبة من المبيعات ؟ فاكر لما قلتلك نسبة التنفيذ 20% من الارباح ومحطيتش التنفيذ في تكلفة المنتج ؟ يبقى في الحالة دي انت مش محتاج تمويل كبير او مش محتاج تمويل اصلا ، ده انت حتنتج ببلاش!
بس دي مش حتحصل غير بين المعارف الا لو لقيت صاحب مصنع مؤمن بالفكرة ويتدخل مساهم في الشركة بالنسبة اللي تتفقوا عليها ، في بعض الحالات لو المنتج فكري لا يحتاج لخامات زي برنامج كمبيوتر مثلا سهل قوي تلاقي الشخص ده
بمناسبة المنتج الفكري بقه ، ماذا تفعل لو منتجك ديجيتال ( برنامج او موقع او نظام ) ؟ ممكن تتبع نفس الخطوات وتروح ل software house وممكن تشوف صحبك مهندس كمبيوتر او web developer ، وممكن الجديد بقه يا معلم
ايه رأيك تعمل مزاد عالمي ، مين يعملي كذا كذا باقل سعر؟ ، حتلاقي ال developers بيتخانقوا على اللي ينجز المشروع وينقصوا على بعض لحد ما حتاخد المشروع في الاخر بتراب الفلوس من الهنود والباكستانيين احسن مبرمجين وبيعملوا البرامج بتلت بيضات وكوزين ذرة وفطيرة
خد عندك
http://www.freelancer.com/
http://www.ifreelance.com/
وغيرهم كتير
)(ملحوظة دي فرصة هايلة للي بيشتغل الحاجات دي ومش لاقي شغل في مصر يدخل مزادات علي النت وينزل سعره شوية وحياخد شغل لان الطلب عالي وفي ناس عملت فلوس كويسة من الموضوع ده ، اعمل templates مرة واحدة واتعب فيها وبعدين بيعها كل يوم باي فلوس ما هي اتعملت وجاهزة خلاص تفرق معاك ايه المهم تبيع كتير فتكسب )
كل منتج في دماغك ليه شغله ، وليه اللي بيعرف يعمله داخل مصر وخارجها وربنا يخلي الانترنت اللي منغيرها مكناش اتكلمنا في المواضيع دي ، الانترنت طريقك للثراء السريع لكن في ناس متعرفش عن النت غير الفيس بوك ، آن الاوان نصحيهم بقه!!
اقتباس:
المشاركة الأصلية كتبت بواسطة abou_ruqiتمام ؟ اسست شركة مساهمة والشركة صاحبة اختراع والاختراع قابل للتنفيذ ، سوقه بقه
ابوس ايد اهلك يا شيخ متسوقه بنفسك ، لو سمحت في دي بالذات لو مالكش فيها ارجع لكلمة السر بتاعة ابو رقية outsourcing
ادي العيش لخبازه ولو ياكل 5% او 10% او 15% او 20% على حسب خبيزه
اوعى تعمل زي الاعلان السخيف ، عاوز كمبيوتر ؟ خد ، عاوز سماعات ؟ خد ، عاوز ماوس ؟ خد
انت عملت كل حاجة صح فمتعوكش في الاخر بقه!
لاعيبة التسويق كتير سواء افراد او شركات وكل برغوت على قد دمه ، والمريح في شغل التسويق ان المسوقين متعودين او طبيعة شغلهم نسبة من المبيعات فمش حتلاقي صعوبة ان حد يسوقلك من غير فلوس مقدما
المهم تختار المسوق بعناية وتفهمه قوي المنتج عبارة عن ايه وتحضره للاجابة على اي سؤال يصدر من العميل وممكن تصرف على الحملة الدعاية وتساعد شوية، اعلانات على جوجل وفيس بوك او شوف منتجك سوقه فين ودي برضه كل حالة بحالتها مفيش طريقة واحدة لتسويق اي شيئ
الاهم بقه تفكر globally. متبقاش محلي بطبعك العالم صغير ومحدش عنده حجه لعدم الخروج خارج الحدود
ده غير انك عندك ميزة مش موجودة عن غير
انت عندك 12 مليون مصري في الخارج ، مفيش دولة في العالم مفيهاش مصريين ده حتى غينيا بيساو كان فيها لجنة انتخابات في السفارة المصرية ، انا متأكد ان انت ليك صحاب وقرايب في خمس او ست دول
المصري في خارج مش عايش في نعيم وعمال يكبش فلوس زي ما انت فاكر ، هو كمان نفسه يزود دخله زيك بالظبط
طيب ما تكلم حبايبك بره مصر وبالذات في الخليج لانه سوق رائع لاي شيئ وتبعتله منتجك وليه نسبة من المبيعات
يبقى انت استفدت وهو استفاد والبلد استفادت عملة صعبة والجميع كسبان win-win game
كمان خاطب الملحقيات التجارية لمصر في الخارج ، بعضهم ما يعرفوش ربنا وبضعهم وطني جدا وانا اشهد للملحق التجاري المصري في ماليزيا وهو صديق شخصي ليا انه وطني غيور وخير من يمثل مصر في الخارج وبيساعد باستماتة على تصدير منتجاتنا لماليزيا ، ربنا يبارك فيه وفي اللي زيه في كل مكان
افتح توكيلات في الخارج واعمل franchising. ظبط موزعين ليك. ابتدي بجارك اللي في دبي وعمك اللي في كويت وابن خالتك اللي في ايطاليا وهكذا
ومش عيب تكتبوا عقد ومش عيب تحط شروط زي مثلا target سنوي لو محققهوش الموزع بتاعك يبقى العقد لا يجدد له السنة اللي بعديها ، وعادي انه يدفع مقدما مبلغ حتى لو صغير علشان ياخد الوكالة بتاعتك لانه لو مدفعش ممكن يكسل ويضيع عليك سنة كاملة بدون تسويق في البلد اللي انت مستهدفها
ادي كاش اهو دخل جيبك يساعد معاك برضه
لو منتجك جديد وجيد متقلقش تسويقه سهل ان شا الله
التسويق نسبة من المبيعات
التنفيذ نسبة من المبيعات ( ممكن )
تمويل بسيط نظير نسبة من المبيعات ( حتحتاجه علشان مصاريف الشركة )
يبقى انت لو عملت كل شيئ واتفضلك 30% من الارباح ، زي الفل ، احمد ربنا ده انت مطلعتش محفاظتك من جيبك وعملت شغل من مفيش وبقيت صاحب اعمال
كررها اكتر من مرة وبيع بيزنيس واشتري بيزنس وفكر خارج الصندوق وحتكبر ان شاء الله
شوفت اقامة بيزنس مش معضلة ازاي ؟ ايه اللي يخليك تدخل في التسويق الشبكى وفوركس والعته ده لما المال الحلال موجود قدامك اهه ؟
توكل على الله ولا تنسى الدعاء والصلاة الرزق بايد ربنه المهم تاخد بالاسباب
دعائكم بقه مش حوصيكم
اخوكم خالد عبد العزيز. (ابو رقية وحمزة وروضة )
