الموضوع: ازاي تعمل فلوس وتبقى رجل اعمال منغير ولا مليم ؟ "مش اللي بالك فيه خالص"

عاش يا رجالة والله الواحد مش مصدق الحماس ده ، البلد دي فيها طاقات غيرنا بيحسدنا عليها ، خلو الحماس ده ينتهي بافعال بقه وقوموا وقوموا البلد معاكوا ، احنا اتأخرنا قوي

المشاركة الأصلية كتبت بواسطة amrelsha3er

يااخى والله المصريين دول كبار اوى
الله ينور عليك يابو رقيه ويفتح عليك كمان ويزيدك علم وايمان
انا بعتلك رساله على الخاص اتمنى الرد عليها واكون ممنون
اما بالنسبه ليا انا من ككلام حضرتك كده فا انا تاجر :)
راس مالى كله فى مشروع عامله بس زى مانت قولت كان زمان غير دلوقتى ظهر منافسن كتير بالهبل وبنضارب فى بعض فى الاسعار والربحسه قلت انا فاتح فى الغردقه بالمناسبه فى مجال توريدات الفنادق والمطاعم مستلزممات المطابخ
وابتدى مخى يشتغل الاونه الاخيره انى اضيف باند تانى جمب شغلى والحمد لله ضيفته وكان فعلا خير عليا وربحيته اعلى بكتير من شغلى
المهم الموضوع يطول شرحه وباستفاضه ومحتاج راى حضرتك فى كزا حاجه ياريت تشوف رسالتى وتبعتلى على الخاص
ونا متابع هنا جد باهتمام بشده
ربنا يكرمك

موصلتنيش الرسالة يا ريس! شوف بعتها لمين: )

المشاركة الأصلية كتبت بواسطة benmatar

محصلليش أنا ولكن أخويا قدام عيني، ومديري في الشغل، فكنت عايش القصة بتاعة forex دي في البيت والشغل، والموضوع بيقلب لإدمان وإغراء رهيب .... ثواني يدخل حسابك بواكي أخضر!!! ها؟؟؟ هتكمل ولا تسحبهم؟؟؟ الطمع ليه دوووور كبيييير.... لأ لأ هكمل وبفي ثواني طار طار طار ، وهكذا لغاية ما نوصل لمرحلة الماناخوليا، وبعدين الإدمان يزيد، وفجأة ... أخويا حبيبي ليلك نهارك على منتدى النايا موتورز لو سمحت بيع لأخوك عربيته وهاتلي أي حاة بنص التمن بسرررررعة، وبعدين هابيع الشقة ومش محتاج المساحة دي كلها وبعدين يبقى اللاب توب معاك في كل مكان حتى الحمام أو على ترابيزة السفرة، وهلما جرررررررررا.
ربنا يعافينا

الله يلعن ابو الفوركس والبورصة وكيو نت اللي دمروا اقتصادنا المتهالك اصلا ، وربنا يهدي المدمنين دول ، المفروض اللي يلعب الحاجات دي اهله يحجروا عليه لعدم اهليته في التصرف في ماله!!!!!

المشاركة الأصلية كتبت بواسطة shnory

1- المخ
2- التمويل
3- التنفيذ
4- التسويق

دول موجودين بنسب متفاوته عند اي حد
صاحب النسبه الاعلي يتحط في الخانه اللي تناسبه وتنجح المشروع
وطبعا يا ابوحمزه ورقيه
مش محتاج اقول اني متابع معاك للاخر

صاحب بالين كداب وصاحب تلاتة منافق وصاحب اربعة ابن كلب ، يستحيل واحد بس يعرف يعمل الاربعة يا شنو ، ولو بيعرف حيفشل علشان مش حيقدر ، وتحدي
مسموح يعرف يعمل واحدة ويمتلك التمويل ، غير كده مش حيقدر

المهم....


خلاص حددت مشروعك ودرسته وعملته خطة عمل متكاملة ، لو معاك التمويل سيبك من المشاركة دي واستنى اللي بعدها ، معكش ؟ بص بقه يا سيدي
انت لما عملت business plan مش عرفت التكلفة ؟ حددت سعر البيع ؟ قدرت مبيعاتك في السنة ؟ عرفت حجم المال في مشروعك نسبته قد ايه من اجمالي المشروع ؟
طلع العائد على راس المال قد ايه في السنة ؟ الالف جنيه دورتها كام سنة علشان ترجعلك ومعاه اختها الالف التانية ؟
شوف يا سيدي لو تقديرك للوزن النسبي لراس المال 40% مثلا
يعني 1- المخ ( حنقول الادارة بقه ) 30%
2- رأس المال 40%
3- التنفيذ 20%
4- التسويق 10%
لو في مصر مثلا فائدة البنك على الودائع 10% ومعدل التضخم في مصر 25%
ال 40% دول اللي هما نصيب المساهم بالمال من اجمالي الارباح لو مكنوش ضعف فايدة البنك و اعلى من معدل التضخم.مش حتلاقي اللي يساعدك
ده الحد الادني ، اقل من كده يبقى الشراكة معاك بخسارة ، متجبش تمنها ، حط نفسك مكانه تدخل فيها ليه ؟ في مليون حاجة تزودله ثروتة احسن من مشروعك!

بس مش عاوزك تظبطها في الخطة علشان تزغلل عين المساهم وهي ارقام غير واقعية ، لانك بكده تكون ارتكبت كبيرتين الاولى الكدب والتانية السرقة ، انت عاوز تبتديها وربنا غضبان عليك ؟ ده من غير بركاته منلاقيش شربة ماية!!!

لاحظ اني حاطيت التنفيذ والتسويق نسب من الارباح على غير العادة بدل ما يتحسبوا تكلفة ، حنبقى نتكلم فيها لما نوصلها ، وانت مش ملزم تتبع الطريقة الغريبة دي انما انا جربتها ونفعت: )

حتجيب التمويل ده منين بقه ؟

بره مصر الحكومات بتدي منح - مش قروض - بس ما بتبقاش كاش، اما تشتريلك هي اللي انت محتاجه ، او تصرف انت وتحصل منها لذلك برضه بتحتاج رأس مال ولكن اصغر بكتير

اما تمويل ذاتي انت معاك فلوس او التلاتة اللي حيقوموا بالوظايف التانية حيدخلوا مساهمين وبالتالي انتوا الاربعة تصرفوا علي المشروع وده الطبيعي اللي انتوا عارفينه وبنشوفه كل يوم
او عائلي ممكن تستلف منهم وترد او تدخل اخوك شريك او تستلف بدون رد ودي مش حيقبلها غير ابوك او امك: )

او تدخل مساهم ، رجل اعمال مثلا مالوش دعوة بالعمل نفسه حيحط معاك فلوس وياخد فلوس وده نوعين:

يا اما مساهم ملاك / رأس مال مخاطر / venture capital)vc (/ angel capital كل دي اسماء لمسمى واحد ، ده واحد حيدخل معاك بالمال نظير مال مش نظير نسبة
يعني بناء على خطتك حيقولك حديلك مليون جنيه ترجعهملي 1.8 مليون بعد تلت سنين ، ومالوش دعوة بالشركة بتاعتك خالص ، بشرط انه ياخد المبلغ ده لو الخطة اتحققت انما لو خسرت يخسر معاك لو كسبت اكتر من المحدد في الخطة مالهوش دعوة هو حياخد ال 1.8 بتوعه فقط ، في ناس بتقول حرام ، انا معرفش ، بس انا شايف انه طالما بيخسر معايا يبقى شريك مش مرابي! المهم نبقى نسأل فيها مش حنعمل حاجة حرام ، بس هو بيطالبك باستمرار بتقرير عن المصروفات والايرادات لانه لازم يعرف فلوسه راحت فين وهل بتصرف بحكمة والا بتبددها
احلى حاجة في الملاك ده انه لما بيخلص الاتفاق وبياخد فلوسه في ميعادها ، بيروح لحاله وبتخلص انت منه ويبقى مشروعك ملكك ، اعتبرها شراكة مؤقتة مش ابدية

متستغربش لما تعرف ان في مستثمرين كتير بيحبوا الموضوع ده ، ومتستغربش اكتر لما تعرف ان في شركات شغلها هو الموضوع ده ، بصراحة معرفش مصر فيها الشركات دي والا لا . هنا عندي في شركة مالتيناشيونال شغلتها تساهم براس مال مخاطر

http://www.netrove.com/

النوع التاني هو الشريك الحقيقي اللي ليه نسبه في كل شيي اللي هو قانونا احد الملاك مدي الحياة ، اللي احنا افترضنا فوق ان نصيبه في الشركة 40%
ده طبعا مخالف لفكرة الشركة المساهمة اللي بيدرسها طلبة تجارة ، ان نسبة كل مالك هي نسبة مساهمته براس المال ، هنا ابو رقية بيقول المساهم حيدخل ب 100% من راس المال وياخد 40% !!! ،بص انا مبحبش الخطأ الشائع في الافلام العربي اللي يقولك انا شريك بالمال وانت بالمجهود ، ده كلام اهبل والمجهود ده تحطه في عينك لا موأخذه
في الحالة بتاعتنا في الموضوع لو حتمشي على اللي اتقال انت ياللي طالب فلوس من مستثمر ايديك مش فاضية ، ده انت entrepreneur ده انت يا اما عندك اختراع محدش فكر فيه قبلك.وده ليه تمن يا اما شاري اختراع يعني دافع فلوس وتبيعه بالسعر اللي انت عاوزه ، وعامل دراسة جدوي ودي بفلوس وعامل خطة عمل ودي بفلوس وممكن تكون عامل نموذج فعلي ملموس prototype للمنتج النهائي وده بفلوس وممكن تكون اتفقت مع مسوق داخل مصر وكمان عندك توكيلات توزيع خارج مصر زي ما حنشوف لما نوصلها وممكن تكون اتفقت مع اللي بينفذ كل ده وبفلوس وكمان انت حتدير والادارة مفصولة عن الملكية يعني بفلوس بس انت بدل ما حتاخد كل الفلوس دي دلوقتي كرقم ثابت او مرتب ، حتاخد نسبة من الارباح قدرناها فوق ب 30% !

فلوس المستثمر حتدخل ازاي ؟ هل هو شاري منك 40% بحكم انك قبله بتمتلك 100% وساعتها حتبقى الفلوس ملكك تصرفها زي ما انت عاوز وبرضه خزينة الشركة حتفضل صفر. ابقى قابلني لو لقيته المستثمر اللي حيشتري الوهم ده ، الشركة في وضعك ليس لها قيمة لانها لا تنتج شيي وارباحها صفر ، الكلام ده قدام لما الشركة تكسب ويبقى ليها تمن تبيع اسهم تبيعها كلها برحتك

المستثمر هنا داخل بزيادة على رأس المال يبقي الفلوس مش بتاعتك دي بتاعة الشركة المالكة للمشروع

ممكن يدفع تمن ما تم انجازه في المشروع اما ادارتك للمشروع فيدفع لك مرتب شهري ، وساعتها يبقي هو المالك الوحيد للشركة بنسبة 100% وانت مدير الشركة يعني موظف عنده ، يبقى انت بدل ما كنت بتدور على وظيفة خلقت لنفسك وظيفة وفي مركز المدير من اول يوم مش وحشة لو مش في دماغك تبقى رجل اعمال


او متخدش اي حاجة نظير النسبة زي ما قلنا

اخوك اللي في السعودية وعمك اللي في الكويت وجارك اللي في دبي بمعارفهم هناك يعرفوا كويس ان اخوتنا العرب بيدوروا بشمعة علي مشروع كويس يستثمروا فيه

عندك كمان كتير من اللاجئين زي السوريين والليبيين والعراقين اللي في مصر ، فكر خارج الصندوق

طب في مصادر ايه كمان للتمويل ؟

الزفت البنك طبعا!!

اهو ابكم اصم ومش حيضايقك يوميا زي شريكك بس يا ويلك لو اتأخرت شهر ، والربا حرام حرام حرام ، الا لو بنك اسلامي حقيقي ان وجد مثل هذا البنك

الاحلى من كل ده بقه ، فاكر لما قلتلك اكتب خطة عمل احترافية علشان حيشوفوها ناس بتفهم ؟
خد عندك

http://www.sfdegypt.org/web/sfd/home

http://www.fedamisr.net/

http://ayadina.kenanaonline.com/topics/56875

http://www.eba.org.eg/Main/default.aspx

http://www.arab-hardware.com/
ارجو تحري المال الحلال في المعاملات مع الجمعيات دي ، وعلشان اكون صريح انا ما اتعاملتش معاهم عمري
( ملحوظة هامة جدا: كل النسب اللي فوق افتراضية وغير ملزمة لاحد )