دلوقتي يارجالة المازدا انا معايا العربيه اهي الحمد لله بقالها سنه
عندي مشكله مش عارف ابتديت اخد بالي منها مش عارف دي حاجه عموما ولا عندي انا بس
اول ماجيبت العربيه دي قولت اروح ابص علي الكاوتش لاقيت الفردتين اللي ورا متاكلين من ناحية النص اللي جوه و النص اللي بره كويس ... فقولت اجيبهم قدام
جيبت اللي ورا قدام لاقيت الرعشه زادت اوي و مش ظابطه ... فقومت مرجعهم و قولت لما ربنا يسهلها ابقي اجيب اتنين ورا
بس الاول اشوف ايه السبب في أكلان الكاوتش كده ... لافيت علي ميكانيكيه كتير و كل قالي لأ العفشه عندك زي الفل
ياعم بص طيب كويس دراع ميزان مثلا ولا مساعد ولا اي حاجه ... لا لا لا ياباشا كله زي الفل
قولت اروح اظبط زوايا و بالمره اكشف
كله اجمع لا لا لا ياباشا العربيه زي الفل ... دي ليسه جديده و كررت الموضوع ده عند اتنين بتوع زوايا مختلفين علشان اتأكد و فيه واحد فيهم قالي عندك نص سنتي في الفرده اليمين مش هاعرف اجيبه الا بجنط حديد علشان اعرف اعمل قارصه عليه وانا مطمن انه مايتكسرش بس مش هتأثر معاك في حاجه النص سنتي ده
المهم توكلت علي الله و جيبت فردتين و الحياه بقيت مانجا خالص
بعد 30 ألف كيلوا قولت ياواد روح شيك عليهم و اعملهم ترصيص و Rotation و كانت المفاجأه ان الكوتشتين اللي ورا بردوا منحولين من الجزء اللي جوه بنسبه اكبر من الجزء اللي بره ... الكلام ده في بردجستون العبور ... جابلي بتاع الزوايا قالي ياباشا دول مساعدين خفاف هما اللي يعملوا كده
ياعم مساعدين خفاف ايه العربيه عامله 130 الف كيلوا ليسه ... و بعدين لو مساعدين هايبقي فيها لبه من ورا ولا بترقص ولا اي عيب شهير للمساعدين لما تبوظ
فانا مش فاهم فين المشكله الصراحه ... حد واجهه الحوار ده
ملحوظه :
دراع الميزان الخلفي مش بايظ ... لافيت علي كذا ميكانيكي و كلهم اجمعوا انه مش بايظ و اللي ساقها و اللي رفع العربيه و بص عليها من تحت و كله في التمام ... فمال الحل افدكم الله