السلام عليكم

اصدقائى عندى مشكلة من اول ما جبت العربية فى الاول كنت فاكره طبيعى الصوت الماتور بيبقى عالى قوى فى الهدوء وبيبان اكتر على السلانسية يعنى من غير تزويد بنزين بتحس بصوت ورررررررر كدة على طول ...
طول ما انا ماشى عادى ببقى سامع الصوت الطبيعى للماتور بس على السلانسية او لما بكون بركن او بتحرك بهدوء لما الدنيا بتبقى واقفة بيبقى صوت مش طبيعى بحس انى راكب توتك

وبصراحة كنت متوقع انها بليه الدينمو لن الصوت جاى من الجزء اللى فيه الدينمو وكان فى كهربائى على حاله وانا بشحن التكييف قالى اه الصوت من الدينمو المهم قلت اشوف الدكتور اللى عندى فى المعادى كهربائى دكتور برحله فى الحجات العادية اللى مش محتاجة مع انه بيفهم والله ..

وقلت اغير بليه الدينمو او على الاقل يفك سير الدينمو ونشوف الصوت هيختفى ولا اية !!!

رحت وكان الكهربائى شغال فى عربية كيا وركنت وراء العربية اللى شغال فيها ونزلت

الحوار :
ــــــــــــــ

انا : السلام عليكم

الكهربائى : وعليكم السلام

انا : الله ينور يا عم عصام

الكهربائى : وعليك يا بشمهندس

بعد 3 دقائق

الكهربائى : خير يا باشمهندس

انا : مفيش بس عاوزك تبص على الدينمو علشان صوته عالى شوية

الكهربائى : يا بيه دة صوت طرمبه الباور

انا : !!!!!! ايه ؟؟؟

الكهربائى : يابيه دة باين قوى وانت بتركن الصوت دة مش الدينمو ... صوت الدينمو عاوز تركيز او فى الهدوء علشان تلاحظ ان صوته عالى لكن احنا فى شارع عربيات رايحة وعربيات جايه وانا سامعه وانا شغال فى العربية التانية

انا : مش فاهم يعنى ايه ؟؟؟

الكهربائى : دور ياباشا العربية ... لف الدركسيون على الاخر يمين او شمال وخليك كاسر الدركسيون جامد

الصوت يوطى لثانيه والعربية ترعش والصوت يعلى تانى ارخى الدركسيون شوية الصوت يهدى ويعلى على طول
ارجع اكسر الردسيون على الاخر يهدى الصوت والعربية ترعش كهرباء ويعلى تانى الصوت

قالى عليك وعلى الميكانيكى علشان دى مشكلة طرمبة الباور

ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــــــــــ ــــــــــ

يا اصدقائى كدة الطرمبه ماتت والله يرحمها ولا اية الموضوع ؟؟؟

اللى مستغربلة الصوت تحس انه صوت ماتور صوت حاجة ميكانيكية مش موضوع طرمبه
وهل طرمبة الباور دى مكانها عند الدينمو ؟؟؟؟ علشان الصوت جاى من الجزء اللى فيه الدينمو

فى انتظار ارئكم قبل الذهاب الى الميكانيكى

تحياتى