الموضوع: لمن مصنع مية يولع ... نطفيه بايه ( بي بانزين !!! ) .. أزمة المياة المعدنية في السوق!

المشاركة الأصلية كتبت بواسطة sehsss

حبيبي.. أهلا بيك
هي فعلا بقت بـ 120 جنيها بس أعتقد إنها المفروض تتغير كل 6 شهور مش سنة ولا إيه ؟؟؟

مرحبا واهلا يا باشا .... هو بيدي نتيجة مرضية لبعد ما بيقعد سنة كمان كطعم ورائحة ... وأنا أسرتي صغيرة جدا أنا وام نضال ونضال فقط فاستخدامنا بسيط جدا... أنا باستخدمه من 10 سنوات أيام ما كان ب 180 والفلتر ب60 ... وأنا باغيرة دائما قبل حلول الصيف كل سنة.

هو حسب كلام نستله المفروض انهم راجعين تاني للإنتاج ان شاء الله في مايو يعني هانت خلاص. الفكره ان كل الشركات دلوقتي بتحاول تستغل الفرصه قدر الامكان : اكوافينا نادره قوي و في انواع عجيبه نزلت الله اعلم دي معبأه فين و أزاي و شركه masa اللي بتوزع حياه و صافي بيشترطوا علشان يأتوا للمنازل شراء ٣ قوارير ب ٢٢٠ جنيه علي ما اعتقد لأ و نوع المياه اللي هيجيبوه هيختلف حسب المكان الجغرافي للي عايز بشترك

معلش انا هطول فى الرد شويه وهتعبكم معايا .
عليك وعلى الفلتر اكثر من 3 مراحل واشرب وانت مطمئن . ولو لاقدر الله فى حد عندة الكلى يبقى تسأل بائع الفلاتر وهو تقريبا هيعطيك فلتر 5 مراحل ( ولكنه غير مفضل خالص للشخص الطبيعى لانها بتبقى بدون املاح يعنى تصنيفها انها مياة نقيه بس رديئه لانها لاتعطى الجسم اى فائدة وخاصه فى الصيف لاحتياج الجسم للاملاح ) . وانا احب اعرفك ان انا من الناس اللى بتشرب من الحنفيه دايركت طالما الماء مالوش طعم او رائحه كريهه ( وجايز لان ربنا كرمنى بمحطه معالجه من احسن المحطات فى مصر ( محطه ميت خميس التى تغذى غرب المنصورة ) .
وعلى فكرة احب اشرح لحضرتك شرح حلمنتيشى على السريع لطريقه معالجه مياة الشرب المعمول بها فى مصر علشان تعرف تحكم على مصدر المياة الخاص بك لان بلد صغير مثل المنصورة جودة المياة تختلف فيها على حسب المحطات :
1_ مصدر المياة : ( سطحيه (جاريه ) او ارتوازى ( أبار عميقه وسطحيه ) او مياة امطار وسيول ( غير مستعمله بكثرة )) .
2_ ملوثات الماء :
(أ ) هناك ما يسمى بالعوالق وهى ماتعطى الماء اللون ( غالبا ماء النيل اخضر ) والعوالق دى لو حضرتك جبت زجاجه مياة نيل وتركتها يومين هتلاقيها مترسبه تحت والماء هتلاقيه صافى .
(ب ) ميكروبات وجراثيم وكائنات حيه طفيليه لا ترى بالعين المجردة .
3 _ طريقه المعالجه ( الاكثر شيوعا فى مصر ) :
( أ ) إزاله العوالق عن طريق الترويب باستخدام الشبه ( كبريتات الالومنيوم ) ودة بخلط محلول الشبه المركز الى الماء مع دخول الماء فى عمليه تقليب . عمليه الترويب دى بتنتج مادة رغويه تنتشر فى الماء تعلق بها العوالق مكونه مادة اشبه بالجل ( بتاع الشعر مثلا ) . ثم يأتى بعد ذلك ترسيب هذة الروبه عن طريق التقليب البطيئ ثم عزل الروبه . ثم الدخول فى فلاتر لعزل باقى اجزاء الروبه . وبكدة نكون أزلنا كل العوالق و جسيمات الطفيليات وحصلنا على ماء صافى اللون .
( ب ) هذا الماء صافى اللون ممكن ان تكون به بكتيريا وفيروسات وعلشان كدة بنقوم بعمل تطهير للماء فى الغالب بالكلور ( غاز وليس سائل لان الكلور السائل سام ) هذا الكلور هو قاتل للبكتيريا والفيروسات ويظل موجود بالماء طالما الماء مغطى او موجود تحت ضغط الضخ . ولذلك عند اخذ عينه مياة من الصنبور أهم تحليل هو وجود الكلور من عدمه ولو وجد باى كميه تكون مياة صالحه للشرب . وهناك من يشتكى من كثرة الكلور فى الماء ( خاصه لو قريب من محطه المعالجه ) ودى بسيطه جدا حلها انك ماتشربش الماء علطول اصبر عليه وسيبه مكشوف 10 دقائق فقط .
( ج ) استخدام مضخات لضخ المياة فى الشبكه وممكن استعمال خزانات مرتفعه لاعطاء قوة انضغاط .

اغلب المشاكل ( مش كلها ) بقى بتييجى من الشبكات و خلافه من الوصلات المكسورة واللى ساعتها هتسرب وتقلل كميه الكلور المحقونه مع المياة وبتسمح بدخول الهواء اللى بيعمل على تكون فطريات على جدران الوصلات و جايز بقى يدخل ميه مجارى وخلافه .
ونصيحتى للى ماعندوش فلتر انه ممكن يغلى الماء ثم يتركه ليبرد وبكدة يبقى قتل البكتيريا والفيروسات اما نسبه الاملاح زى ماهى .
انا بقى عايز كل واحد يبقى عارف هو تبع انه محطه والمحطه دى ايه مصدر مياهها وهل فى سابق شكاوى من المياة فى هذة المنطقه ( حتى لو إشاعه ) ومافيش مانع لو رحت عملت لها زيارة ( ما اعتقدش الناس هتمانع ( عن تجربه )) . وعلى الاساس دة انت اللى هتحدد الطريقه اللى بيها تزود معامل الامان لنفسك تجنبا للامراض ( فلتر , كام مرحله , أغلى الماء قبل الشرب , ............. ) .
انا مش بقول الدنيا وردى والمحطات بكفاءة 100 % وعارف ان فى محطات تستاهل الحرق . لكن اللى اقصدة ان كل منطقه غير التانيه خالص فممكن تكون منطقتك ذات جودة متوسطه الفلتر لواحدة يخليك فى الامان .

وعلى فكرة احب انوه على نوع من النصب بيعمله تجار الفلاتر بانه بيخليك تجيب عينه مياة من بيتك . ويوقلك : (دة جهاز هيختبر العينه دى وانت هتشوف بعينك المياة دى واللى هيطلع منها ) وحضرتك تلاقى الميه بقى لونها بنى غامق وفيها رواسب فى حين انه لو عمل الاختبار دة لميه الفلتر سوف تظل رائقه او تتحول للون خفيف خالص .
دة بقى نصب لانه بيقنعك انك تاخد فلتر يشيل الاملاح من المياة ( لان اللى هو عمله هو نوع من التحليل الكهربى للماء لعمل تفاعل مع املاح المياة ( املاح ماغنسيوم كالسيوم اى املاح فى الماء وعلى فكرة المياة المعدنيه هتعطى لون بنى غامق بردة لان بها املاح ) ( زى كدة اللى يزود البطاريه بماء الحنفيه بيعمل رواسب داخل البطاريه ويعمل نفسه ناصح يقوم يغليه على النار مع انه كدة بيبخر الماء النقى وبيزود نسبه الاملاح فى الماء اللى هيحطه فى البطاريه ) لكن الفلتر بعد كام مرحله بيبقى فى مراحل كل وظيفتها تقليل الاملاح فالماء بيطلع نظيف . والمراحل دى تبقى مفيدة لمرضى الكلى او الكبد لكن الشخص العادى فى حاجه للاملاح دى ومش محتاج ينضحك عليه بفلتر مش محتاجه يقعد كل 3 شهور يغير شمعات بالشيئ الفلانى .