يوم في ورشه العفشه!

**hazem_khidr** · 03-07-2007 02:42 PM

الله يخليك يا هاني دا من زوقك .
علي فكره فكرت في موضوع تقل الدركسيون دا لقيت ان ممكن يكون الريجلاش بتاع خزنه الدركسيون(الاسكترا) مقفول عليه شويه. ف ممكن يتهوا . او بيض المقصات عاوز يتشحم. هيا عموما حاجه بسيطه ولو عمل الصيانه حيلاقي كل دا اتصلح باذن الله

03-07-2007 03:40 PM

الواحد مش عارف يقولكوا ايه علي الاهتمام ده ربنا يباركلي فيكوا يا رب

انا متاكد من موضوع ترشيح الزيت جربت انظفة وبيرشح تاني بالظبط حوالين جوان غطا التاكيهات بس هو مش ترشيح جامد بس المنظر مش عاجبني خالص ، فانا ناوي اغير الجوان بتاع غطا التاكيهات بنوع محترم واريح دماغي بس مكنتش عايز ادخل في ظبط التاكيهات لان اداء الموتور بالنسبة لي ممتاز ومش عايز العب فيه

علي فكره يا حازم العربية انجكشن MPI سمينز

بالنسبة لتنظيف وتشحيم العفشة فده انا ناوي اعملة ان شاء الله علي ال 15000 بس فيه واحد بتاع عفشة قالي لازم نفتح علبة الدريكسون ونبص فيها وممكن تتحشي بصراحة حسيت كلامة عك وتراي اند ايرور (هيجرب يعني) علما بانة ساق العربية وحس بالعيب والعربية لسه في الضمان بس انا بحب اعمل الصيانات الدورية علي اديدى وقدام عيني وزيارة التوكيل ديه تبقي لتغيير قطع الغيار او مايلزم من تظبيط للاكسوارات لاكن مبحبهومش يشتغلوا في قلب العربية خالص

بالنسبة لسير الكاتينة فانا كنت ناوي اغيرة برضوا لاني لما فكيته في صيانة ال 10.000 كان مطبع جامد والصنايعي قالي نغيرة وانا ثولتلة سيبة دلوقتي هبقي اغيرة في الصيانة الجاية فانا مستغرب انك بتقول ميتغيرش الا بعد ال 70.000

**hazem_khidr** · 03-07-2007 03:47 PM

فانا مستغرب انك بتقول ميتغيرش الا بعد ال 70.000

انا مش عاوز اقولك 100 الف كمان!!! سير الكاتينه معمر جدا و بيقولو بيتغير عند 100 الف .
انا اول ما جبت العربيه غيرته و الكلام دا من شنه و نص و عامل بيها 40 الف من يوم ما جبتها و كل ما اروح اكشف عليه يقولولي كويس و ناوي علي الصيانه الجايه اللي بعملها اغيره يعني بعد 20 الف كمان.و بعدين هو لازم يبقي مطبع لو هو قال انه بدأ يشقق يبقي كده فعلا باي انما مطبع عادي جدا هو بيطبع بعد 1000 او 2000 كيلو.يا ريت تبقي تقولي رايح امتي و احاول افضي نفسي و اجي معاك

03-07-2007 04:06 PM

ربنا يخليك يا حازم ده كده شكلي انا اللي هجيلك المحلة :P

عامة قريب اوي يعني علي الاسبوع الجاي كده هروح اعمل يوم رياضي بعربتي وعربية واحد صاحبي (جولف) واحتمال عربية الحاجة (برايد عصفورة) ونروح نربط عفشة ونشحم ونعمل صيانة بس انا لسه بفاضل بين الصنايعية اللي اعرفهم عشان اللي اثق فيهم ميكانيكة مش عفشجية والعفشجية اللي اعرفهم مجربتهمش في عربيتي لاكن عملوا شغل لناس صحابي وشكروا فيهم

**hazem_khidr** · 03-07-2007 07:14 PM

تششرف و تنور يا ابو وائل و الله بتكلم بجد تعالي وانا اعملك الشغل اللي علي مزاجك كله ما تقلقش من حاجه و اسعار كويسه كمان مش حتلاقيها في القاهره خالص

**محمد أمين** · 11-08-2007 09:06 PM

السلام عليكم مشكور يا اخ حازم على الموضوع الجميل ده بس ياريت لو تقولنا على أسم الصنايعي ده لكل أخوانك من المحلة الكبرى والمنصورة وطنطا لتعم الفائدة
:D