....معروف ان الزيرو بيتسعر طبقا لخبراء اقتصاديين على اعلى مستوى وبناء على دراسات كتيرة للسوق والمستهلك....طيب ممكن نعرف من حضرتك بقى ايه المقياس العلمى المنطقى اللى بتستخدمه لتحديد السعر السوقى الحقيقى لأى مستعمل؟؟
عرض للطباعة
ههههههههههههههههه
حلوه أوي يا محمد باشا (المقياس العلمي المنطقي لتحديد السعر السوقي الحقيقي)
ما تتعصبش أوي كده أشرب سفن أب و روق أعصابك
الموضوع أبسط من كده بكتيييييييييييييير يا أستاذ محمد
السوق زي ما حضرتك عارف عرض و طلب
لو حضرتك عايز تبيع عربية معينه خد لفة الأول في سوق مدينة نصر يوم الجمعة وشوف العربيات اللي زيها (حسب حالتها و كمالياتها) بتتباع بكام
(سواء صاحب العربية اللي بيبيعها أو تاجر بيبيعها)
و مهم جدا يا أستاذ محمد كلمة بتتباع بكام مش صاحبها طالب فيها كام
يعني ادخل على كذا واحد بيبيع عربية زيها و و اتفرج عليها بجد و فاصل و اتكلم بجد كأنك فعلا بتشتري و شوف الكلام بيوصل لحد فين في الفلوس
أو ممكن تاخد لفه برضو على معارض العربيات المستعملة و تعمل نفس الكلام
و بكده يبقى أنت عرفت متوسط (السعر السوقي الحقيقي) للسيارة
و بعد كده أنت و شطارتك في البيع و الشراء
دي يا أستاذ محمد وجهة نظري في الموضوع أتمنى أني أكون قدرت أوصلها ليك
طبعا في الاول و الاخر كل شيء نصيب و اعتقد ان حضرتك لما تاخد قرار الشراء حضرتك بعد ذلك مباشره بتعمل دراسه سريعه عن طريق الانترنت او سؤال من لديه خبره في الاسعار و من ده حتقدر تطلع رينج سعر بمواصفات معينه و طبعا هيبقي متوافق مع الميزانيه اللي حضرتك حاططها للموضوع و كل ما تدور و تجمع معلومات هتقدر تقلل رينج السعر العادل للسياره و يبقي شبه دقيق و بعد كده بتروح تتفرج علي العربيه و حضرتك في دماغك الرينج العادل بتاعها بحيث لا تظلم نفسك و لا صاحبها و بناء علي الاتفاق المبدأي تروح الخطوه اللي بعدها و هي فحص السياره في مركز صيانه او التوكيل ان أمكن للتأكد من الحاله الفعليه فلو طلعت حالتها كويسه و في رينج السعر العادل يبقي توكل علي الله و احيانا ممكن تكون بحاله نادره فعلا و دي ممكن تخليك تزود الفين او تلات الاف جنيه تقديرا للحاله او تاخدها بالحد الاقصي للرينج اللي حضرتك كنت محدده إنما مش مثلا الرينج الاقصي ١٠٠ الف إنما صاحبها بيتكلم في ١٣٠ الف لان ده معناه ان في حاجه غلط و الموضوع مش هيمشي كده.
طبعا من الأخطاء الشائعة الانخداع بمظهر او بمهنه البائع او بكثره حلفانه و كمان بالمظهر الخارجي للسياره و بالتالي إهمال الكشف علي السياره في التوكيل او مركز معتمد من باب التوفير مع ان ده من الاخطاء الكبيره و العواقب بتبدأ تظهر بعد الشراء و بتتراوح ما بين قطع غيار لازم تتغير و حتي ان العربيه عامله حوادث كبيره او مغيره اجزاء كبيره.
بالنسبه للبائع اللي بيطلب سعر مبالغ فيه ده بيبقي في الاغلب لسه عارض العربيه جديد فبيحاول انه يبيعها بأعلي سعر اعتمادا علي معلومات غير دقيقه او عن طريق تنزيل مبلغ قليل من تمنها الاصلي و ده يخللي سعرها امامك غير واقعي و خاصه بعد لما تكون لفيت و سمعت من اكتر من واحد فبقيت عارف الرينج و كمان لما بيبقي البائع مشتري العربيه بالتقسيط لانها بتقف عليه أغلي من الكاش فبالتالي بيحاول يبيعها باقل خساره ممكنه عن طريق رفع السعر لكن اللي في الاغلب بيحصل انه ما بيلاقيش اقبال علي السياره فبيضطر ينزل من السعر بالتدريج حتي ينزل السعر الي الرينج الطبيعي بعد كده و طبعا النوعيه دي مش هينفع معاها فصال في السعر لان السعر مبالغ فيه و حتي لو فاصلت معاهم و خدتها بسعرها المعقول هيبقي بالنسبه لهم حضرتك غلبتهم في السعر و ظلمتهم مع ان ده مش حقيقي.
لازم تعرف ان فى ناس بتبيع بيع غناوة و دول ابعد عنهم عشان هتلاقية بيضرب سعر ف العالى و لو اتباعت العربية يبقى خير و بركة . ما اتبعتش يبقى عادى بالنسبة ليه
المشكلة ان لما شخص عادى (مش تاجر ) يحب يبيع عربيته بيبقى خايف اوى ان يضحك عليه (و دا حقه ) و دا طبعا من كتر اللى بيسمعه عن ناس اتعمل عليهم مصلحة حلوة خصوصا من التجار (مش كلهم بس كتير منهم )
طريقة كلامك مع صاحب العربية اللى معندوش خبرة ف سوق السيارات لازم تختلف عن طريقة كلامك مع التجارو الناس الفاهمة لانه بيبقى متشكك اوى ,,,,,, و ضحله عيوب عربيته بس مش بطريقة مباشرة عشان مايفتكركش جاى تخسف بتمنها
لو زهقت من النقاش معاه قوله ( اسأل حد تكون بتثق فيه و رد عليا ) و قوله كمان ( اللى يسعرهالك بتمن اعلى , يجيبلك مشترى ياخد بالتمن دا )
متنساش انك لازم تراعى ربنا و تكون حقانى و تقدر قيمة العربية اللى قدامك لو كانت تستاهل و ما تدفعلوش قد اللى بيدفع ف عربيات حالتها اسوء
اخر حاجة , لازم تعرف ان الموضوع ف الاول و الاخر نصيب
بكل بساطه هتقوله أخر سعر ممكن أدفعه فيها كذا ودي نمره موبايلي لو نويت تبيع على السعر ده كلمني. ولو فيه نصيب ليك هيتصل بيك ولو مفيش تبقى راحت لصاحب النصيب. خد بالك برضه ان فيه ناس بتدفع بزياده شويه في عربيه حالتها كويسه عشان بتكون زهقت من الفرجه على العربيات ومن الحالات السيئه فاللي معاه عربيه حالتها كويسه من حقه يدلع شويه عشان يحس بفرق مصاريفه عليها (اللي بيصين في التوكيل بفواتيره الحراقه مقابل اللي يادوب بيغير زيت في أي بنزينه وخلاص).
متابع بما انى فى مرحلة بيع وشراء فى نفس الوقت