شرخ فى الشاسية أمام القنطرة الخلفة يمين

**ahmed.galal78** · 30-04-2013 03:13 AM

السلام عليكم ورحمة الله
زملائى الأعزاء
انا عربيتى فيات 127 مو 82
من كام يوم رحت اظبط زوايا ،،، الراجل قالى ان العربية محتاجة شوية شغل فى العفشة الأول
ومن ضمن الحاجات قالى ان فية شرخ موجود قصاد القنطرة فى الشاسية بالخلف ،،، أنا بصيت عليه لاقيتة هو تقريباً ناحية المقص الخلفى يمين

عاوز أعرف هو دة كدة يبقى عيب فى شاسية السيارة ولآ دة مجرد شروخ زى اللى اللى بتفتح فى العلب بتاعة الشاسية

يا ريت حد يدلنى لأنى من ساعة ما عرفت وأنا متنكد
ويا ترى علاجها إيه ،،، هو اللحام بس ولآ أركب حاجة فى العربية تحميها انها تشرخ تانى

الله المستعان

**hilal** · 30-04-2013 10:18 AM

انا شايف انك تلحمها عادي عند واحد كويس ، بس خلي بالك من المطبات ، وما تحملهاش تقيل لأن مكان اللحام بيفضل ضعيف ، وما تشيلش هم وسيبها لله

**ahmed.galal78** · 30-04-2013 10:52 AM

جزاكم الله خير
ربنا يباركلك طمنتنى

طب ممكن الواحد يعمل حاجة فى المساعدين الخلفى أو يركب حاجة تخفف الحمل عنها

أنا عربيتى فيات نصر 127 مو 82
وشكراً

**kayson** · 30-04-2013 03:43 PM

عادى جدا و لا تتنكد ولاحاجة مفيش 127 او 128 فى مصر الا لازم يحصل كده انت هتروح عند سمكرى كويس اما تلحم و الموتور راكب او هتحل الموتور و يلحم وتركب الموتور تانى و بعد كده تعمل شغل العفشة و تضبط زوايا بس لازم لازم لازم تكون بعد كده العفشة الامامية حرير يعنى ماتهملش فيها عشان الشرخ مايفتحش تانى