الموضوع: ثــــبــــــات التيــــــــدا ؟؟؟ !!!

يا ريت يا جماعة حد يقولى الكلام الأكيد والنهائى فى ثبات التيدا

, وعلشان يكون الكلام محدد فهل ثباتها قبل 130-140 ك
(ودى سرعه كافية جدا ) بيكون زى

جين 2 الماليزى - والفيات اللينيا الإيطالى - وأوبل كورسا

الألمانى ولا أقل منهم رغم إنهم تقريبا فئة سعرية واحدة
ماعدا الجين 2 أرخص بس فيه مشاكل فى تقفيلها المصرى والفرامل غير مجمع على إنها كويسة وكمان تكييفها ليه صوت مسموع ولكن ثباتها رائع

نوضح أكتر وبإختصار التيدا لازقة فى الأرض وثابتة قوى
ولا أقل من العربيات المكتوبة

وممكن لسهولة الإجابة للأعضاء الكرام نقسمها للآتى :-

ممتازة ......... ( ثباتها زى العربيات المكتوبة )
جيدة ......... ( أقل حاجة بسيطة ومش هتحس بالفرق )
متوسطة ......... ( فيه فرق بس متزنة على الطريق )


ويا ريت نحسم الموضوع ده

وطبعا أنتم عارفين أهمية الثبات لواحد لسه هيشترى أول عربية يسوقها فى حياته
خاصة وإن الهاندلينج يعتمد على الثبات ويعتبر أهم حاجة بالنسبالى فى العربية ولأعضاء غيرى بيفضلوا الأوروبى لهذا السبب
والتيدا العربية اليابانى الوحيدة فى الرنج ده اللى ممكن تتقارن بالأوروبى أو الجين 2 ( علشان أقدر أستفيد من مزايا اعتماديتها العالية وتوكيلها الكويس وقطع غيارها وبقية مواصفتها المجمع عليها من الكل - ناقص بس موضوع الثبات )

رجاء أخير يا ريت الإجابة تبقى عن تجربة علشان دى شهادة ونصيحة بتقدمة لأخوك ومسئول عنها أمام الله
وزى ما نبينا عليه الصلاة والسلام قال وعلمنا " لا يؤمن أحدكم حتى يحب لأخيه ما يحب لنفسه " ومحدش منكم يحب يدفع فى عربية الفلوس دى كلها وبعدين يحس بندم أو إنه خسران فيها وكان ممكن يجيب الأحسن

المشاركة الأصلية كتبت بواسطة Nashaat Rady

بدون تحيز إليك رائي.....

التيدا في منتهي الثبات عند السرعات اللي انت طالبها....

بالنسبة للسيارات الأخري، لم أجربها قط.

لكنها في النهاية سيارة خفيفة نسبياً - ١١٦٠ كج فارغة و ١٥٥٠ كج محملة للـhb.

ولكن تصميم نظام التعليق ممتاز و بيتغلب علي خفة الوزن و كمان الإطارات اللي بتنزل بيها مناسبة علي حجمها و لا انصح التعريض

تحياتي

أنا بشكرك جدا لنشاطك فى المنتدى واهتمامك وامانتك فى الرد وده سمت أغلب الأعضاء الكرام زيك واللى المنتدى بيعتمد عليهم

بس عايز أوضح إن سمعة العربيات اللى أنا كاتبها فى الثبات عالية جدا وعندك الجين 2 نفس نظام تعليق المرسيدس
- Double Wishbone - الخلفى مستقل وسعرها أقل
وتخيل الاسبرانزا النيفى الجديدة Multi-Link ووزنها 1280 كيلو واللى اشتراها بيشكر فى ثباتها , وحتى الإمجراند 7 نفس الوزن وواخده أربعة من خمسة فى اختبارات الأمان الاوروبية
طبعا أنا لا يمكن أشترى صينى لأن عارف اعتمادية الموتور منخفضة بعد 100 ألف كيلو إذا كملهم

أما ثبات اللينيا والكورسا مفيش خلاف عليهم ووزنهم تقيل برضو وكلهم نفس ثمن التيدا تقريبا وشكلهم أحلى بس الشكل مشمهم أهم حاجة العربية نفسها

فالسؤال والتردد سببه زى ما وضحت إن العربيات المكتوبة ثمنها أقل أو نفس الرينج ولكن وزن وثبات ونظام تعليق أحسن بس مشاكلها فى التوكيل وقطع الغيار واعادة البيع

أما التيدا فثباتها هو مشكلتها الوحيدة وأى حاجة تانية ( ماتور - اعتمادية - وسع - كماليات - توكيل ... إلج ) كله كويس

وأكيد الواحد عايز يكسب كل حاجة مقابل الثمن الكبير اللى هيدفعه 140 ألف تقريبا , غير إن عربية بالثمن ده بصراحة كان لازم يكلفو نفسهم بخامات أثقل ونظام تعلق أحسن ويعرضوا الكوتش شويه ( من 195 لــ 205 ) وتبقى كده عربية وهم , وهيه دى أصلا الحاجات المكلفة لأن تكنولوجيا الموتور تكلفتها بتكون مرة واحده قبل التصنيع

, وكمان مش مستحيل ده يحصل لو عملنا مقارنة بالعربيات الصينى المكتوبة ( من ناحية الوزن والتعليق فقططط ) ورغم كده أرخص النص لأن مش معقولة الصين هتغش فى الوزن أو التعليق بس مشاكلها فى حاجات تانية

واللى مزود الطينة بلة وحيرة إنى إذا لم أحسم أفضلية ثبات التيدا يبقى لازم أدخل السيتروين سى إليزيه والبيجو 301 فى دماغى وأعمل مقارنة معاهم لأنهم نفس الوزن الخفيف نسبيا ونفس المزايا الأخرى فى الوسع والتقفيل والموتور والكماليا وخلافه

يا رب حضرتك والكل يكون فهمنى وعرف سبب سؤالى وكتابتى للمشاركة دى وعلى فكرة أظن إن السوق والمنافسة هيفرضوا على نيسان وغيرها تعديل المسائل دى

المشاركة الأصلية كتبت بواسطة fouady

أنا هلخص كلامي فيه جملة العربية معيا بقالها سنة ... ثابتة على أي سرعة لو مفيش هوا " رياح " لو فيه رياح بتبقى مرجيح بس كده

المختصر المفيد
شكرا لحضرتك