صيانة العشرين الف للإلنترا الجديده غبور العبور

**msalama** · 01-05-2013 12:44 PM

رحت امبارح عملت صيانة العشرين الف و أنا رحت بدرى على 18000 لن كان عندى مشكلة فى الفتيس كنت طرحتها فى موضع سابق و كان الرد زى ما توقعت المشكلة كانت و أنا مروح من الشغل بادور العربيه سمعت صوت هبده فى الفتيس جامده و بعدين جيت أنقل الغيار على r مش عايز ينقل أنا كنت سايب العربيه أصلا على n و لما أجيب ال d تنقل عادى بس أسمع صوت هبده برده فى الموتور أو الفتيس مش عارف بصراحه و بعدين لقيت الشاشه بتاعة التابلوة اللى بيظهر فيها الفيتيس على اى غيار مطفيه المهم بطلت و دورت تانى تقريبا 4 مرات بعد كده رجعت طبيعيه
رحت بقى التوكيل و شرحت المشكله لمهندس الأستقبال قالى طبعا حنكشف عليها المهم عملت صيانة العشرين غيار زيت و فلتر زيت و فلتر بنزين و فلتر هواء و تربيط العفشه و ده تكلفته 1300 جنيه
و أنا فى ألاستراحه كلمونى قالولى تيل الفرامل لازم يتغير و تمنه بالمصنعيه 750 جنيه ماشى يا عم غير المهم العربيه خلصت و نزلت تحت عايز اطمن على الفتيس قالى زى ما كنت متوقع مافيش حاجه العربيه سليمه تلاقى بس حاجه كانت معلقه ما علينا أستلمت العربيه و بأشوف قطع الغيار اللى طلعت لقيت تيل الفرامل لسه فيه نصه يعنى يشتغل 6000 او 7000 كيلو كمان طبعا دمى اتحرق
مهندس الاستقبال اللى استلم العربيه قاللى شيل اى حاجه من العربيه خايف عليها حتى صباع الولاعه شيله ماشى يا عم انت محسسنى انى مدخل العربيه عند عصابه المهم شلت الحجات اللى فى العربيه و نسيت الفلاشه :) فى الكاسيت طبعا استملت العربيه من غيرها و للاسف ما أخدتش بالى الا بعد ما مشيت
للأسف دى أول مرة أعمل صيانه عند غبور الميزة و الوحيده ان المكان جديد و نضيف انما الخدمه و حشه و مافيش روح فى التعامل مع العملاء عكس مودرن سيرفيس كنت بأروح عندهم الاول هو أه صغير و الاستراحه مؤلمه بس الناس تعاملها كويس و بتاخد و تدى معاك فى الكلام و بعدين عمرهم كا سرقوا حاجه بصراحه مع انى كنت بأسيب كل حاجه فى العربيه

**Walid_M** · 01-05-2013 01:06 PM

أولاً : مبروك الصيانة وربنا يبارك لك في عربيتك ...
وموضوع الفتيس متتهاونش فيه , ولو ظهر تاني أي عرض تروح لهم مخصوص , الفتيس من الحاجات اللي مينفعش نهزر فيها .

ثانياً :عم غبور زيه زي كثيرين موش ناوي حد يقوله إن فيهإختراع ظهر في القرن الواحد والعشرين إسمه الموارد البشرية ...

لازم يعينوا الناس اللي بثلاثة أبيض بغض النظر عن الكفاءة والأمانة وأشياء اخرى !!!
كل مؤهلاتهم إنهم أجرهم ضعيف !!!

ربنا يتوب على البلد دي بقى يارب !!!

ثالثاً : حاجة بصراحة حرقت دمي ...
صيانة 20 الف إيه اللي ب 2050 جنيه , وإيه حكاية التيل ابو 750 جنيه ده
أمال لو حصلحها ... حصلحها بكام ؟
بصراحة ناس طيبين قوي !!!

ياشماتت حبايبنا فينا !!!

تحياتي

**Habd** · 01-05-2013 01:16 PM

يا باشا التيل ده لو فيه نصه زى ما بتقول ممكن كان يكمل معاك للاربعين بس هانقول ايه ف هبور

**msalama** · 01-05-2013 01:22 PM

أنا بس زعلان على الفلاشه :( ههههههههه

**mahamedaraby** · 01-05-2013 01:36 PM

تيل الفرامل ب 750 ويقولك اشترى كورى علشان اسعار قطع الغيار
انا مش داخل والله اقول كورى ولا يابانى ولا حاجة بس حرام بجد ان الواحد يشترى تيل فرامل ب 750 جنية ويتغير كل 20 الف كمان امال الطنابير بكام

**Habd** · 01-05-2013 01:36 PM

ربنا يعوض عليك مش عارف اقول ايه و الله بس فعليا انا كان اخرى مع هبور صيانة الالف من 3 سنين دا فخ مش توكيل

**dozo** · 01-05-2013 01:50 PM

- مبروك على الصيانه و عقبال صيانه ال 200000 ..
- حاول ياباشا مراجعه كتيب الصيانه و الكتالوج لمعرفه الحاجات اللى بتتغير بصفه دوريه زى تيل الفرامل و البوجيهات عشان ما حدش يقولك غيرها قبل ميعادها و شغل النصب ده بتاع التوكيلات..
- اللى حارق دمى فعلا الفلاشه اللى اتسرقت .. هو انت مدخل العربيه الوكاله و لا ورشه فى توكيل المفروض انه محترم .. انا لو منك كنت رجعت سيحتلهم حتى لو مش حاخدها تانى بس عشان المهندس االى موجود و الناس اللى بتعمل صيانه يعرفوا انهم مشغلين حراميه..
اما سعر الصيانه بغض النظر عن تيل الفرامل 1300 جنيه ليه؟؟؟؟ بس ارجع و اقولك الكورى بقت حاجته غاليه مش زى زمان .. و اللى بيشترى يبقى عامل حسابه.
تحياتى ....

**Samir Elshahawy** · 01-05-2013 02:48 PM

بداية ربنا يحفظك لك العربية و يبارك لك فيها و يبعد عنها العين و أولاد الحرام و غبووووووووووووووور

1- المفروض ماكنتش تمشي من التوكيل الا لما البيه مهندس الاستهبال يركب معاك و تسمعه الصوت اللي في الفتيس و تكتب شكواك في تقرير الاستلام أو أمر الشغل
هما بقي يهتموا و يعملوا حاجة أو مايعملوش يبقي أنت سجلتها عليهم

2- تيل فرامل أيه اللي يتغير علي 20,000 كم ؟؟
ماحدش بعد كده يغير تيل ألا لما يشوف التيل اللي طالع بعينه و بعد كده يقرر بناء علي رؤية مش علي سمع
التيل عامل معايا 40,000 كم و لسه حالته كويسة و لو قالوا لي نغيره هأرفض طبعا

3- فلتر البنزين أيه اللي يتغير علي 20,000 كم (مع أني غيرته للتجربة و كان نظيف جدا جدا جدا) لذا قررت أني أغيره مش أقل من 40,000 كم

كده أنت دفعت فوق ال 1200 جنيه أونطة
و حضرتك ماجبتش سيرة البوجيهات ؟؟ غيروها و لا لأ ؟

**M.Al-Hefnawy** · 01-05-2013 03:41 PM

الهبدة اللي في الفتيس أو بمعنى أصح تحس فيه بنطرة جامدة ده بيبقى من الكنترول ... لازم تخليهم يكشفوا على كنترول العربية لأن لو العربية خرجت من الضمان هتلاقي تمنه غالي قوي ... يا ريت تروحلهم زيارة تانية وتخليه يكشف على كنترول العربية أو بمعنى آخر يحطلك كنترول تاني وتجرب بيه غيارات العربية كلها وتشوف فيها الهبدة أو النطرة دي ولأ ... لو راحت يبقى دا عيب كنترول وما تتنازلش عن حقك في تغييره في الضمان بدون ما تدفع حاجة

**svneleven** · 27-05-2013 01:33 PM

هو 750 جنيه تيل أمامي فقط و الا ورا و قدام؟

الموضوع: صيانة العشرين الف للإلنترا الجديده غبور العبور

LinkBack

أدوات الموضوع

عرض

صيانة العشرين الف للإلنترا الجديده غبور العبور - انشر الموضوع فى :

-

-

-

-

المواضيع المتشابهه

تقرير صيانة 1000 كم ix35 - غبور العبور + تغيير الكلاكس

صيانة ألنترا الجديده في غبور العبور 1000 كيلو متر

صيانه العشرين الف ارجوكم الدخول ( ازاى اروح العبور )

صيانة العشرين (( بدري)).. تجربتي مع توكيل العبور اليوم والفرق بين مهندسي الاستقبال

صيانة العشرين ألف كم في دايهاتسو العبور

الكلمات الدلالية لهذا الموضوع

المفضلات

المفضلات

ضوابط المشاركة