إمبارح و انا رايح الشغل لاحظت رعشة فى الطارة عند سرعة 120 كم و قولت كده لازم أبص على الكاوتش و ترصيصه
و بما انى شغال فى المعادى فطلعت بعد الشغل على Fit & Fix (فرع الأوتوستراد جنب سجن طرة) و طلبت أظبط زوايا و أرصص .
تم عمل اللازم و الموضوع أخد تقريبا نص ساعة و قبلهم نص ساعة إنتظار علشان كان فى عربية بتغير كاوتش :)
فيما يلى ما تم عمله طبقاً للفاتورة :
1- ضبط زوايا أمامى (قاللى الأمامى بس هو اللى محتاج ظبط) : 36.36 جنيه
2- ترصيص (تم ترصيص أربع فرد) : 54.55 جنيه
3- ضريبة مبيعات : 9.09 جنيه
الإجمالى : 100 جنيه مصرى

أكتشفت إن الكاوتش الخلفى حالته سيئة جداً و لما أشتريت العربية صاحبها قاللى لازم أغيره قريب و هو كان مغير الأمامى و مشى بيه 5000 كم (فردتين بريدجستون تورانزا ER300 يابانى) فقولت أسأل عليهم و أجيب زيهم .. طلعت الفردة عاملة 1040 جنيه (مقاس 205/50/16 )
عرضوا عليا فردة نفس المقاس بس فيرستون و كانت عاملة 775 بس أنا كنت عايز أشيل اللى قدام و أرجعهم ورا و أركب الجداد قدام و طبعا لازم اللى قدام يكونوا حاجة كويسة مش أقل من اللى ورا فلازم يكونوا تورانزا برضه !!!
المهم مشيت و حأعيد حساباتى تانى و ربنا يكرم و أجبيهم فى أقرب فرصه ..