الموضوع: محتاج حد يفهمنى بخصوص اشتراك النت بتاعى قبل ما اولع فى لينك :(

دلوقتى انا كلمت الدعم الفنى وقالولى الاتى
بعد ما خلونى انزل برنامج بردة من موقع مايكروسوفت وطلع ال RATE 180-200 كيلو قالولى دة العادى طالما فى حدود المينيموم ودة اللى انت فية حاليا
قلتلة انا بكلمك متاخر والحدود دى مبتزيدش عن كدة لا صبح ولا ليل بالعكس دى بتقل الصبح كمان
وقلتلة ان فى ناس كتير سرعتهم ثابتة طول الوقت لية او اشمعنى انا
قالى : علشان ممكن الجهاز اللى فى السنترال وخطك متدبس فية يكون مش بكفاءة اجهزة تانية فى نفس السنترال مع اعضاء تانيين لنفس الشركة وتلاقى سرعتهم زى الفل طول الوقت
قلتلة طب اعمل اية علشان خطى يتنقل من جهاز الى جهاز تانى كويس زى اللى انت بتقول عليهم دول
قالى لازم تكون تحت المينيموم علشان نعمل شكوى !!!!!!!!!!!
قلتلة والمينيموم بتاعتى كام
قالى 150 كيلو غير كدة منقدرش نعمل شكوى وخصوصا ان احنا والمصرية للاتصالات لا توجد اى اوجة تعاون بيننا الا فى اضيق الحدود :( (وهنا ادركت ميزة اللعينة te-data) طب بس انا كنت حعمل اية مكنش ينفع استنى 3 شهور لما النت يدخل دة زى الاكل والشرب دلوقتى :(
المهم قلتلة طيب انا دلوقتى لما اكلمك واقولك السرعة عندى اقل من 150 حتعرف ازاى ؟
قالى ان بعد التحميل بتاعى بساعة بينزل عندة سرعة التحميل اللى انا كنت شغال بيها
قلتلة خلاص حكلمك بكرة الضهر ونعمل القصة دى واكيد السرعة حتكون تحت ال 150 كيلو ساعتها حتقدم شكوى ؟
قالى ايوة
قلتلة تمام
اية رايكوا فى الكلام دة ؟؟؟هل الكلام اللى بيقولة دة منطقى ولا لاء ؟؟؟
ولو ليا حد فى المصرية للاتصالات ممكن ينقلى الخط بتاعى فعلا من على جهاز الى جهاز تانى زى ما البية دة بيقول لان انا ممكن اعمل الحوار دة من غير شكوى ولا نيلة وانتوا عارفين العيال بتوع التركيبات دول بتكرمشلهم القرشين ويتظبطوا ؟ لو دى المشكلة يعنى ؟

أنا مشترك في بيت أبويا مع tedata اشتراك 2 ميجا بيجيب 200-210 لأنهم بيدوك 80% من السرعه بس متاحين أي وقت من الليل والنهار حتى الخميس والجمعه والسبت وأنا في 6 أكتوبر برضه على فكره.

اللي يقولك بقى أي حاجه أكبر من 77 يبقى الخط مفيهوش مشكله قوله هات ولي امرك يكلمني. لو عندك مشكله في السرعه قوله يديك يوزر وباسورد جداد ولو المشكله لسه موجوده تقولهم يبعتو فني يشوف المشكله عندك ايه.

نسيت أقول اني مش عارف أركب خط أرضي في شقتي عشان معنديش بوكس على البيت ومقدم عليه من شهر 9 اللي فات ومستنىي الفرج ومقضيها فودافون 20 جيجا في الشهر. ادعيلي...

بص يا سيدي
شركات النت لما بتدخل خدمة في سنترال بتعمل الاتي:
عدد اليوزرز في السنترال مثلا 200 واحد
متوسط السرعة المطلوبة 1 ميجا
يبقى علشان ال 200 يوزر ياخدو سرعتهم كاملة في اي وقت الشركة محتاجة توفر 2 جيجا انترنت في السنترال ده۔ وده طبعا من عاشر المستحيلات۔
في قاعدة في النتورك بتقول ان مستحيل كل المشتركين يشتغلوا في وقت واحد في نفس اللحظة۔ يعني حتلاقي مجموعة طافية الجهاز ومجموعة بتتصفح نت وتقرا اللي بتتصفحه وبالتالي مفيش سحب ومجموعة بتعمل داونلود وهكذا۔
فلجؤوا لل contention ratio.
وده معناه انك تخلي مجموعة من اليوزرز يتشاركوا الخط الرئيسي
النسبة في اوروبا لخطوط البزنس 1:20 وخطوط المنازل 1:50
ده معناه ايه؟

في المثال السابق اتفقنا ان علشان تشغل 200 يوزر بسرعة 1 ميجا مضمونة طول الوقت CIR rate لازم توفر انترنت في السنترال سرعته 2 جيجا۔
لو طبقنا القاعدة يبقى انت ممكن توصل خط 2048 ميجا / 50 = 40 ميجا
يبقى لو اليوزرز منازل تقدر تشغل 200 يوزر على خط رئيسي 40 ميجا بسرعة لكل واحد 1 ميجا burst rate.

cir rate تعني سرعة مضمونه في اي وقت
burst rate تعني اقصى سرعة ممكن توصلها على حسب استهلاك الناس اللي بيشاركوك في الخط الرئيسي۔

طب مشكلتنا في مصر ايه اللي دمرت المبدا ده في الاتصالات؟؟
وصلات النت
لان لو هما حاسبين ان ال 200 يوزر دول حتكفيهم سرعة 40 ميجا، الفعلي ان في علي الاقل 50 يوزر عاملين شبكة عليها على الاقل 10 في كل شبكة۔
يعني بدل ما ال40 ميجا بتخدم 200 يوزر، فعليا هي بتخدم 200+ 50*10 = 700 يوزر

بالاضافة ان اصلا ممكن الشركة متلتزمش بال contention ratio العالمي وتشغل مثلا على 1:70 او اكتر

لو فكرت تشتري خط CIR dedicated حتلاقي ان سرعة ال 256 سعرها خزعبلي۔