الموضوع: <<<<تقرير مسيرة سكودا أوكتافيا فانتازيا 100 ألف كم>>>>

بسم الله الرحمن الرحيم

- الحمد لله العربية عملت 100 ألف كم بسلام.وفي الموضوع ده هنتناول كل النقاط التي تشمل مميزات أو عيوب.وبعض العيوب اللي لها حلول نهائية إن شاء الله.بكل حيادية.دون أي تحيز.

- بيانات السيارة :-

* سكودا أوكتافيا فانتازيا موديل 2010/5 أول فئة تيبترونيك وكيل.
* اللون فضي.
* الصيانة الدورية حتي تاريخه تمت في التوكيل فقط لا غير دون الذهاب لأي مكان آخر.
* مصاريف الصيانة من تاريخ شراء السيارة حتي وقتنا هذا حوالي 14000 جنيه ( غير شامل البنزين ) وهي عبارة عن صيانة دورية ( زيت وفيلتر ) وصيانة 60 ألف كم ( الأكثر تكلفة ) وتغيير الزجاج الأمامي , وتغيير الإطارات , وتغيير قربة مياه التبريد , وتغيير الـ 4 طنابير.

--------------------------------------------

* بعض أسعار قطع الغيار :-

- زجاج أمامي 1350 جنيه شامل التركيب.
- 4 طنابير 2300 جنيه شامل التركيب.
- قربة مياه التبريد 180 جنيه شامل التركيب.
- الإطارات 520 جنيه للإطار الواحد ( سعر جملة ).

--------------------------------------------

المميزات وحالة أساسيات السيارة بعد مسيرة 100000 كم
-------------------------------------------------------

1- شكل السيارة الخارجي .. إذا تخلينا عن مصطلح " أذواق " .. تصميم ممتاز ويعطيك إحساس بالفخامة والوقار.
2- صاج السيارة محمل ومتين جداً خصوصاً الإكصدامات. ومع مرور الزمن يظل محتفظ بقوته دون التأثر بعوامل التعرية.إلا جزء معين هتناوله في العيوب.
3- دهان السيارة ممتاز جداً وقوي ولا يتأثر أيضاً مع مرور الزمن بعوامل التعرية كالشمس والحرارة.
4- خامة فوانيس السيارة ممتازة ولا يحدث لها خشانة أو غيمة حتي مع السفر لفترات طويلة.
5- المظهر الداخلي للسيارة .. إذا تخلينا عن مصطلح " أذواق " .. تصميم رائع ومنظم.
6- الخامات الداخلية لمقصورة السيارة ممتازة بما فيها من جلد / بلاستيك / نواكل / تطعيم أبواب وطابلوه / قماش.
7- تطعيم الأبواب والطابلوه والنواكل الموجودة بمقصورة السيارة لا تتأثر مع مرور الوقت..والمقصود هنا إنها مش بتتمسح زي كثير من السيارات بسبب العرق والحرارة والملمعات.
8- قماش وتنجيد الكراسي ممتاز ومش بيهبط مع مرور الوقت.
9- شاشة البيانات اللي بين العدادات ونور العدادات والأزرار حالتهم ممتازة ومفيش حاجة فيهم ضعفت أو فصلت أو شئ من هذا القبيل.
10- عزل السيارة .. العربية وهي دايرة متحسش إنها دايرة..والإحساس ده زاد بعد إستخدام زيت محرك كاسترول .. عزل صوت المحرك .. وإنت ماشي علي سرعة 100 كم / س عدد لفات الموتور بيكون حوالي 2500 لفة تقريباً وعلي السرعة السادسة ومش بتسمع صوت الموتور..وعامةً صوت الموتور مش بتسمعه غير لما تعمل kick down فقط ومش بيبقي مزعج زي ما ملاك كتير بيقولوا ولا بيبقي خشن.اللي عاوز يسمع صوت موتور عالي جداً وخشن لدرجة الصداع .. يجرب يجري بعربية لانسر بومة ويقول لي رأيه..في نقطة مهمة جداً..إن موديلات 2011-2012-2013 نزل منها سيارات كتير بدون وش فيبر للموتور..وده عليه عامل في العزل..حسبي الله ونعم الوكيل في سياسة التوفير في مصر

فيديو يوضح صوت الموتور مع غلق النوافذ وتشغيل التكييف

https://www.youtube.com/watch?v=bWp9...Y-dZw&index=16

لو عملنا مقارنة مثلاً مع لانسر في النقطة دي وهي سيارة ياباني

https://www.youtube.com/watch?v=pm054msmpTo

11- عزل صوت الطريق أثناء السير..بعد تغيير الكاوتش اللي نازل مع العربية ( الكونتينينتال الألماني ) العزل إتحسن بصورة كبيرة جداً..عزل صوت إرتطام الهواء بجسم السيارة أثناء السير علي سرعات عالية.جيد جداً وليس ممتاز.
12- نظام التعليق في السيارة بحالة الزيرو رغم الـ 100 ألف كم ولكن تحتاج لأطياش ميزان أمامية وده إكتشفته وقت صيانة الـ 100 ألف وقالولي عليه.لكن أنا مش حاسس بحاجة غلط وأنا ماشي في طريق مكسر..فربنا يسهل هوديها فرع تاني أتأكد.لكن حالة مساعدين / مقصات بمشتملاتها / سكاترا / بطاحات / يايات..كل ده زيرو ولله الحمد.
13- بالنسبة للموتور والفتيس .. وأنا جمعت بينهم في نقطة واحدة لأنهم بيكملوا بعض..الفتيس بعد المسافة المقطوعة دي كلها بنفس حالته والعربية لسه زيرو.لا يوجد أي نتشة أو هبدة.أو تأخر في النقلات أو خلل في الـ kick down .. وده بفضل الله أولاً ثم بالإلتزام بتغيير زيت الفتيس علي 60 ألف كم..بالنسبة للموتور..الحمد لله أدائه زي ما هو بل إتحسن أكتر بعد ما كان تسارع السيارة من 0-100 في 14 ثانية حالياً في 12.5 ثانية..ولا يوجد أي عادم أو رجة في المحرك أو خشونة أو تسريب سوائل أو سماع أي أصوات غريبة أو خلل في حساس من الحساسات.ويظل حتي هذه اللحظة بيبخر مية من الشكمان.ولسه النهاردة جايب بيها 200 كم/س علي الطريق المؤدي لدريم بارك 6 أكتوبر بعد الدائري.
14- تكييف السيارة..لله الحمد بنفس أداء التبريد من أول ما إشتريت العربية حتي تاريخه.ولا يوجد أي خلل أو ضعف في الكباس والفريون بتاع الفبريقة زي ما هو..
15- موتور ضم المرايات الجانبية بنفس حالته ومحصلوش أي مشكلة الحمد لله.
16- جميع وظائف السيارة تعمل بشكل طبيعي.
17- وضعية الجلوس في المقاعد الأمامية مريحة جداً سواء للسائق أو الراكب الأمامي.وعمري ما حسيت وأنا سايق إني مش مستريح.وأنا من النوع اللي لازم أكون قاعد وذراعي مفرود وأنا ماسك الدريكسيون وعمر ما رجلي خبطت في طابلوه العربية وأنا قاعد ولا حسيت بمشكلة في وضعية دواسة البنزين.( الرك علي ظبط وضعية الكرسي صح )
18- وضعية الجلوس علي الكنبة الخلفية مريحة ومش ضيقة بالدرجة الشائعة بالنسبة لراحة القدمين.وذلك بشرط ضبط مسند ظهر المقاعد الأمامية بطريقة معينة بحيث تكون مريحة أيضاً للراكب الأمامي.
19- النظام الصوتي للسيارة رائع بمعني الكلمة والحمد لله مشتملاته كلها من كاسيت وسماعات بحالتهم زي ما هما مفيهومش أي مشكلة.
20- نظام البلو توث جيد جداً وعمره ما عمل معايا أي مشكلة في إستقبال أي command مني ويعمل بكل فعالية.

وأخيراً ,, عوامل الأمان في السيارة سيتم التحدث عنها في بند منفصل.

------------------------------------------------------------------------

العيوب :-
----------

1- أعتقد إن كبوت العربية دي مش بمتانة باقي صاج السيارة.

2- جلد الطارة بيتمسح مع مرور الوقت.الحل هو كسوة جلد عند سروجي محترم أو عليك وعلي جينز كار.

3- الإطارات اللي بتنزل مع العربية ( كونتينينتال ألماني ) فاشلة فاشلة فاشلة في موضوع عزل صوت الطريق. الحل هو إستبدالها بنوع آخر مثل فولدا أو كومهو أو هانكوك.

4- مع تكرار الغسيل المرايات الجانبية مع الضم الكهربة بتعمل صوت تزييق..الحل هو إنك ترش wd-40 ومش هتسمع بعد كده أي أصوات.

5- مساند الرأس الخلفية للكنبة بايخة شوية في إن البروز بتاعها زيادة شوية.

6- مش هعتبرها عيب.. نظام الـ climatronic للتكييف بايخ شوية لناس كتير لأن له نظام تشغيل معين..وهو كالآتي..
* لو عاوز التكييف يظبط نفسه علي درجة البرودة المناسبة خليه علي 18 درجة مئوية.وإعمل نظام دوران الهواء علي وضعية A عشان تسمح بتجديد الهواء كل 5 دقايق تلقائياً.وكده هيبدأ سينسور الحرارة الداخلي يظبط درجة التبريد..وبعد الإختبار..لما بتكون درجة حرارة الجو الخارجية 40 درجة مئوية..سرعة المروحة بتاعة التكييف بتكون علي 3 بعد إنهاء عملية تهيئة البرودة.
* لو عاوز أفضل أداء لتبريد التكييف.أظبط البكرة علي العلامة الزرقاء وإعمل سرعة المروحة علي 5 لمدة 10 دقايق وبعدها نزل السرعة لـ 3 .. وابقي تعالي قوللي إنت مبتفهمش حاجة لو إستحملته :)
* عاوز لما تقفل التكييف وتفتحه يفضل محتفظ بالوضعية اللي إنت عاملها..لما تقفله بتدوس علي زرار off .. بردو لما تعوز تفتحه تاني دوس علي زرار off ومتدوسش علي زرار ac هتلاقي كل حاجة زي ما هي وسرعة المروحة اللي إنت ظابطها مش هتتغير.بس خد بالك ده في حالة إنك تكون عامله علي العلامة الزرقاء.

7- بعد فترة باب الراكب الأمامي الأيمن بيحصل في الشباك بتاعه خللِ ما..بيسبب إن الزجاج يحصله لخبطة أثناء الغلق تلاقيه بينزل تاني لوحده وعشان تقفله لازم ترفعه سِنة سِنة لحد ما يقفل..الحل هو تغيير ترس الواير بتاع ماكينة الزجاج من بلاستيك لفيبر مقوي..وسعر الترس ده 70 جنيه في الوكالة ومتحاولش تروح التوكيل عشان هيقولولك عاوزة ماكينة زجاج بـ 2500 جنيه ( تقليب الزبون ).

8- بعد فترة سنتين كده ممكن لمبة أو لمبتين يتحرقوا لوحدهم في الفوانيس..الحل هو تغييرهم بأصلية وحط تحت الأصلية دي 100 خط.عشان لو جيبت أي لمبة هتكون إضائتها ضعيفة وتتحرق بسرعة.

9- كان نفسي شنطة العربية دي لما تفتحها من الريموت تتفتح لفوق علي طول..مش لما تفتحها من الريموت تفك تعشيقة الكالون وتترفع نص سم وتقولك نكتفي بهذا القدر !!! وتفسير العيب ده هو تقل باب الشنطة بغباااااااااااااء...لم أتوصل لحل حتي الآن.

10- فتحات التكييف الخلفية كان المفرض يعملولها أي دايرة تحكم في كمية الهواء اللي بتخرج.

11- عدم وجود مخرج usb دي رخم بصراحة..الحل إنك تعملها من الولاعة ( شوفت ناس كتير عاملاها بس أنا مجربتش بصراحة )
----------------------------------------------------------------

حقائق :-
----------

- عوامل الأمان في العربية دي هي رأس مالها الحقيقي .. سواء كانت الفرامل وقوتها وإستجابتها...ثبات العربية في المنحنيات والمناورات علي أي سرعة حتي مع عدم وجود الـ ESP .. صاج العربية المحمل..الهاندلينج بتاع العربية والـ Over steer والـ Down steer ..
- عمري ما حسيت بأي بوش في الدريكسيون كما ذًكر..بالعكس المفروض إنك في أقل لمسة تجاه اليمين أو اليسار العربية بتروح معاك.
- الباور بتاع العربية عملي جداً جداً وبالرغم من إنه كهربة مش عامل زي باور الكهربة اللي نازل في الكوري ( شوربة ) لا بيضمن التحكم في العربية علي السرعات.
- التصفيح اللي تحت العربية يخليك ماشي مش قلقان علي الدنيا تحت.
- تسارع العربية وطلعتها لحد 100 كم/س مش زي عربيات كتير في فئتها..ولكن الوضع مختلف بعد الـ 100 كم/س وعن تجربة وده موضوع قًتل بحثاً. وطبعاً الكلام علي الأوتوماتيك مش المنوال.
- السرعة القصوي للعربية دي مش 185 كم/س..العبد لله كسر بيها حاجز الـ 200 كم/س كتير.
- لو قارنت بينها وبين باقي العربيات اللي في نفس الفئة السعرية هتلاقيها هي الأنسب ( بتحدي ولا مؤاخذة :) )


* ده كل اللي أنا فاكره حالياً عشان عاوز أنام هههههههههه...لو حد شايف إني نسيت حاجة متكلمتش عليها يقوللي عليها في رد عشان أضيفها..لكم مني أكبر تحية.وإدعولي ربنا يبارك فيها ويصونها دائماً.السلام عليكم