الموضوع: تغير ماستر و سيرفو الفراميل للاسترا بالصور

بسم الله الرحمن الرحيم
هذا التقرير و غيره من المواضيع لوجه الله وللافادة العامة للساده الأعضاء المحترمين
كان فيه تسريب بسيط لزيت الباكم من بين الماستر و السيرفو و ده طبعا بيكون من جلد الماستر بعد فتره بيضعف و بيهرب ضغط الزيت بره الدوره "عربيتى كانت مركونه 4 سنين" و ده برده من اثارها
و طبعا تم التركيب كالعاده بنفسى
1-ماستر جديد اصلى "برازيلى" نقس الكود بتاع الى فى العربية ب 350 جنيه
2-سيرفو تم حله من نص استرا بحاله الزيرو 300 جنيه
3-علبيتين زيت باكم دوت 4 علبة زرقه صفيح ب 30 و الصورة من ا/فادى

طبعا انا حليت السيرفو من النص الاستيراد بالعده بتاعت أ/ فادى و هى
1-مفتاح بلدى 13
2-مفتاح بلدى 12
3-مفتاح بلدى 15
4-لقمه 13 ومفتاح سيستم
5-بلادوس او لمبه
6-مفتاح بيبه 13
7-مفك عاده و صليبه
8- زجاجة بلاستيك مقطوعة من فوق
9-بنسه ببوز

خطوات العمل
1-هنفك علبة الفيوزات من القعده بتاعتها هى لها كلبسات صغيره من الجناب هدوس عليها و هتطلع معاك بسهولة

2-هنجيب حقنة مقاس كبير من الصيدلية ونسحب بيها الزيت من علبة الزيت و نفك الماسورتين بتوع الماستر واحده 10 و التانيه 12 و تحاول تخلى الزيت ينزل فى الزجاجة البلاستيك

3-هنضطر نحل ال abs و ده ثابت فى الصاجة عن طريق لاكورين بيتربطه من فوق الصاجه بصامولتين 13 كما موضح بالصور

4-هنفك مواسير الزيت المربوطين فى ال abs هما 6 مواسير 4 لل عجل و 2 جايين من الماستر 3 منهم مقاس 12 و 3 منهم مقاس 10 و دى مقصوده من الخواجات الألمان عشان ميحصلش لغبطه او ماسوره تركب مكان واحده التانية

5-القاعده الصاج الى شايله علبة الفيوزات و ال abs ليها 3 صواميل ال 13 الى فاكيناهم فى خطوه 2 و صاموله 3 مقاس 15 فوق على اقصى اليمين

6-ال abs بيثبت على قاعده كاوتش من تحت و دى راكبة فى الصاجة من تحت ال abs و بعد كده هتلاقى فيشة ال abs ليها كلبس بمفك عاده تزق الكلبس لبره كما هو موضح بالصوره


7-هطلع الabs بره خالص و نحاول منفضيش منه الزيت لو نضيف لاكن لو لونه غامق يبقى نفضيه و نملاه بزيت نضيف من فوق

8-فى خرطوم هواء رابط من المنافولد للسيرفو ده عشان البدال يبقى عالى و طرى و العربية دايره

9-الماستر مربوط فى السرفو بمسمارين 13 هنحلهم و نطلع الماستر القديم

10-هتلاقى السرفو مربوط من داخل السيارة "هتنزل فى الدواسه" وتوصل البلادوس عشان الضلمه بصامولتين 13 فوق "يمين وتحت شمال" هتحلهم بالسيستم واللقمه ال 13 و ممكن البيبة 13 تساعدك و فى صامولتين مش لازم تحلهم "فوق شمال و تحت يمين" عاكسهم 13 برضه مثبيتين صاجه الدواسه

11-فى تيله ماسكه الدواسه مع السيرفو و ديه بتتزق بالمفك والبنسه ببوز وتسحب السيرفو من جوه الحوض


12-هنركب بالعكس السيرفو و الماستر و بعدين ال abs و نثبت الصاجه وتركب فيشه ال abs و بعدين تحط الزيت فى العلبة وتركب المواسير بس متهوية متربطش طبعا تسيب الزيت لغايت ميخرج من بين المواسير و الماستر و بعدين تربط جامد عشان نضمن ان الهوا خرج من الماستر و نفس الكلام فى abs و بعد كده تقفل علبة الفيوزات و كده يبقى تمام



ملاحظه انا لقيت فرق طول اقل من 1 سم بين عامود السيرفو القديم والجديد "الجديد بتاع عاربية مانيوال وانا عربيتى اوتو" و ده بان بعد ما خلصت و قفلت التركيب كله لاقيت نور الفراميل منور على طول طبعا مع الكونت
فى ساعة الفلرامل شيكت لاقيتها راكبه مكانها خرجتها بره "كما هو موضح بالصور"

و جربتها لقيتها سليمه و طريقه عملها انك لما تدوس على السويتش النور يطفى تسيبه النور ينور و حل المشكله انى اقفل المسافة بين البدال و السويتش جبت حته كاوتش و خرمتها من الناحيتين و جبت افيزين و ثبتها فى بدال الفرامل

و تمام كده اتحلت المشكله

ارجو ان اكون وضحت فى الشرح و الصور

المشاركة الأصلية كتبت بواسطة hagagatc

مجهود جبار الله ينور يا باشا بس المشكله لو الكاوتشه اتاكلت حترجع تنور تاني انا من رايي اتعب وفكه تاني ورجعه وهات بتاعها

الف شكر يا باشا على النصيحة و جزاك الله خير
اولا هو بتاعها فعلا و حكايت افك تانى دى مستحيلة تماما دى بتاخد مجهود و وقت جبار لأنك بتفك حجات كتير و مكانها صعب
الأسهل ان لو الكاوتش اتاكلت " نظريا مش اقل من 2--3 سنين " هعمل وحده غيرها و ده اسهل الحلول