مشكلة في فتيس جولف 4 الاوتوماتيك

**madsir** · 10-05-2013 02:45 PM

عندي جولف 4 اوتوماتيك
الفتيس بتاعها كان تمام وكويس ومره واحده كان في زحمه وفضلت فيها شويه يعني تلت ساعه
المهم لما طلعت من الزحمه جيت اطلع بالعربيه لقتها بتطلع علي التالت المهم بطلت وشغلت تاني اتعدلت ومره واحده برضه بقت علي التالت بس
يعني حاليا لما بدور واطلع بالعربيه بتطلع علي التالت وتفضل علي التالت ومتنقلش خالص
يا تري ايه سبب المشكلة دي وايه الحل ؟ وكمان بعد ما حصل الموضوع ده لمبه الموتور نورت في التابلوة

**SYD** · 10-05-2013 03:12 PM

كدة الفتيس بيدخل في مود الحماية
اكشف علي الزيت
اكشف علي دورة التبريد
حط العربية علي الكمبيوتر عشان تعرف لو مسجلة اي اعطال بخصوص الفتيس

وشوف الموضوع دة - فيه مشكلة مشابهة
http://www.nilemotors.net/Nile/35334...post3874961175

تحياتي

**mahmoudfawzypr** · 11-05-2013 01:48 AM

متغليهوش يمد ايده على اي حاجة واسيبه نصيحة لوجه الله

المشكلة وببساطة ان فيه مشكلة عندك في الفتيس ممكن تبدا من حساس لغاية الكلاتشات بتاعت الفتيس ومفيش حاجة تخليك تعرف غير ان تحطها على كمبوتر وتعرف العطل ...انا اول ما جبت العربية بعديها باسبوع عملت معايا نفس الحركة ورحت لواحد قالي ده البادي فالف من غير حتى ما يرفع العربية ومشيت وسبته وروحت عند واحد عنده كمبيوتر اعطال وطلعت المشكلة في حساس تمنه مستعمل 150 جنيه بعد ما كنت حلبس في فتيس ب 4000 جنيه

**madsir** · 11-05-2013 11:25 PM

دلوقتي يا شباب الراجل غير فلتر وزيت و كولر
المهم كان بيقولي الفتيس مطلع منه حاجات سوده كدا مكلكعه فالمهم جربت والمشكله زي ما هيا مفيش جديد
ركنت العربيه وطلعت اتعشيت وقولت انزل اجرب تاني نزلت جربت جبت ال 1 اليدوي عادي وبعدين جبت ال 2 وبعدين جبت ال 3 واول ما ال rpm كان علي رقم 3 جبت ال d لقيته نقل علي الرابع علي طول ولمبه الموتور طفت انا اتخضيت بصراحه قمت ركنت وقفلت العربيه وشغلت تاني واشتغل عادي وكان بينقل عادي جدا واللمبه بتاعت الموتور منورتش تاني
رحت للميكانيكي قولتله الفتيس اشتغل قالي كدا يبقي الحاجات السوده الى مطلعينها دي هيا الى كانت عامله سد في دورة الزيت ولما الزيت خد دورته ولين الفتيس اشتغل طبيعي
هل الكلام ده صحيح يا شباب ؟؟

**alzelafy** · 18-05-2013 02:49 AM

طالما نقل طبيعى يبقى الفتيس سليم لحد اللحظه اللى انتا جربته فيها و لو لقدر الله عملها تانى يبقى فى مشكله فى الكهرباء ممكن كنترول الفتيس او اى حساس ..... و اوعى تصدق حد فى مصر يقولك حنفك الفتيس و نصلحو ....لا دا لما يتفك يترمى و ييجى غيرو على طول و دا لما تجرب كل محاولات الكهرباء و يا رب يبعد عنك و عن كل الناس مشاكل اوتوماتيك الفولكس او الاوروبى عموما