تجربتى و تقيمى لكيا ريو 2013 بعد 17000 كم
فى البدايه أنا بحاول أنى أكتب فى التقرير ده خلاصه تجربتى ل الريو بعد حوالى 8 شهور أستخدام و حوالى 17000 كم
مش حتكلم كتير عن وصف العربيه علشان الناس بتشوفها فى الشارع و أكيد عارفنها كويس كمان الأخوه هنا فى المنتدى عملوا مواضيع كتير فى وصفها
حبدأ بمواصفات العربيه
موديل 2013 و كنت جايبها ب 113 ألف قبل متغلى
هى الفئه الى قبل الأخيره من الأوتو وكيل
جنوط 15 و 1 أير باج و وللأسف من غير ABS
تاريخ الريو الجديده بدأ فى مصر من أول 2012 لما نزلت أول دفعه من الريو الشكل الجديد والي كان فيها العيب المشهور فى السوفت وير
(تأخي رفى أستجابت العربيه فى النقلات و التجميع)
المهم التوكيل حل الموضوع عن طريق عمل تحديث السوفت وير و الموضوع أنتهى على كده و نزلت الدفعه التانيه فى 2012 من غير العيب ده
بس للأسف الموضوع ده عمل سمعه سيئه للعربيه خصوصا أن كانت ليها منافسين أقوياء زى الأكسنت أو النيسان
كمان موضوع أنها 1400 سى سى كان عامل قلق للناس من موضوع السحب و التجميع
بالنسبالى بعد تفكير كتير مبين كل البدائل المتاحه فى الفئه السعريه ديه ,قررت أنى أشترى ريو بس وكيل كمان أستنيت أول دفعه من 2013 علشان أبعد عن القلق
و النتيجه الحمد لله مرضيه جدا جدا
أسف جدا على الكلام الكتير الى فى المقدمه بس حبيت أنقل الصوره كامله
ندخل بقى على التقييم
عايز أوضح حاجه أنى تجربتى فى السواقه بقالها أكتر من 10 سنيت مبين جيتز 2008 و سيراتوا 2008 و أكسنت القديمه و ال نيو أكسنت (مش ال ر ب)
المميزات:
1-العربيه جرايه جدا و بتجيب سرعات عاليه بسهوله و نعومه يعنى من غير صوت الموتور ميعلى
2-عزل الصوت داخل صالون العربيه ممتاز جدا جدا
3-طبعا كماليات العربيه كتيره جدا ومن اهمها من رأيى أنهم عاملين مخرج ل هوا التكييف فى درج الطابلوه (درج تلاجه ) و ديه حاجه أنا بشوفها مفيده جدا فى السفر خصوصا لو معاك أدويه أو أى حاجه ممكن تبوظ من الحر
4-ثبات العربيه كويس أوى لحد 140 بعد كده العربيه بتكون خفيفه , بس برضه لحد 160 مفيش مشاكل (و حتى لو أخدت غرز واسعه على سرعات عاليه مفيش مشاكل)
فى المجمل ثباتها أعلى بكتير من الجيتز و أقل حاجه بسيطه من السيراتو 2008
5-وسع الصالون و الشنطه بشوف أنهم مرضيين بالنسبالى بس برضه الكنبه ضيقه شويه و ده بشوف أنه عادى بالنسبه ل city car
6-أنتشار العربيه بقى كويس أوى و بيزيد كمان و ده أكيد حيفرق فى سعر قطع الغيار و سعر أعاده البيع
7-طبعا شياكه المنظر الداخلى و الخارجى للعربيه
العيوب بقى
1-عزم العربيه فى المطالع بيكون ضعيف شويه و ده بالنسبالى حاجه بضايق خصوصا للى كان بيسوق جيتز مانيول زى حالاتى
2-أستهلاك البنزين بقى بشوف أنه عادى زى أى عربيه 1600 سى سى بس الى عامل مشاكل معايا و تقريبا مع الناس كلها حاجتين
أولا, أن تانك البنزين 43 ليتر و ده من رأيى صغير نسبيا خصوصا فى السفر مسافات طويله
ثانيا ,أن عداد البنزين واخد مساحه كبيره و ده بيخلى أى تغيير فى البنزبن بيدى حركه كبيره نسبيا لمؤشر البنزين و ده بيحسس الواحد أن أستهلاك البنزين كبير طبعا
أستهلاك البنزين معايا بعد أكتر من 17000 كم كالتالى
داخل المدينه نصف التانك بيعمل حوالى 180
فى الطرق السريعه نصف التانك ببيعمل من 250 ل 300 على سرعه من 120 ل 160
حاجه أخيره فى موضوع أستهلاك البنزين
فى كذا عضو معانا جربوا أنعم يغيروا البوجيهات من أبو رواش من العاديه ل راديوم و بيقولو أن ده زود السحب و قلل أستهلاك البنزين
بس أنا لسه مجربتش ده ,أنشاء الله حجربه فى صيانه ال 20000 كم
3-مدخل الشنطه صغير نسبيا بالنسبه لحجمها بمعنى أنك لو حابب تدخل حاجه كبيره فى الشنطه حتى لو حجم الشنطه ممكن يستوعب الحجم ده بس مدخل الشنطه ممكن ميسمحش أنك تتدخل الحاجه الكبيره ديه
4-دهان العربيه ضعيف جدا خصوصا الأكصدامات و أعتقد أن ده لسان حال كل العربيات الجديده
5-العربيه من رأيى أنه ناشفه شويه بس مش أوى ( أنعم بكتير من الجيتز و أنشف شويه من ال سيراتو 2008)
مش فاكر أى عيوب تانيه من وجه نظرى فى العربيه
فى النهايه لو رجع بيا الزمن لوراه كنت برضه حجيب الريو بس كنت حجيب الهاى لاين
أو يمكن كنت حفكر ف الهوندا سيتى بس
أسف للأطاله بس حبيت أنقل تقيمى للعربيه بمنتهى الحياديه و لو فيه حاجه أنا نسيتها أنا تحت أمركم فى أى سؤال
