الموضوع: انا زهقت بقى من العربية دى !

المشاركة الأصلية كتبت بواسطة inspiron

أعتقد الرجالة ردت بما يكفي ربنا يباركلهم..شوف يا دكتور..لازم نبص للموضوع بنظرة أكتر واقعية..يعني الواقع بيقول إن عربيتك محتاجة ظبط.سواء موتور-عفشة-كاوتش..طيب أنا لو مكانك هعمل الآتي :-

- الموتور :-
* هتطلع علي واحد من الإتنين..أحمد زاهر..أو رامي شعبان..وأنا أفضل رامي شعبان..وده رقمه 01000429378 ومكانه في أول الهرم..وده مش هيسيب حاجة في الموتور إلا لما يعملهالك.ومصنعيته في المعقول وفاهم أوي أوي أوي في الأوكتافيا حتي الجديد.

- العفشة :-
* هتطلع علي عفشجي نظيف كنت بتعامل معاه أيام الـ a4 إسمه الباشا في شارع المدبح العمرانيه..وبردو هيعملك العفشة كما ينبغي أن تكون.ومش غالي.

- الكاوتش :- هتروح تجيب 4 فِرد جداد نوع من التلاتة..فولدا ألماني..أو كونتينينتال فرنساوي أو بيرللي .. والسعر في حدود 510 جنيه للفردة الواحدة لو مقاس 195/60/16 وهتجيبه من ممدوح غطاطي في فيصل. وده مكان محترم والعمالة اللي فيه مدربة في بيرللي وشاطرين أوي.

نيجي بقا للمهم..كل حاجة من دول هتعمل فيها إيه بالظبط :-

- الموتور :- إذا لزم الأمر لتغيير بعض الأجزاء الهامة المستهلكة تغيرها..وده الميكانيكي هيطلبه منك ( اذا لزم الأمر ).. مطلبش..يبقي تطلب منه ما يلي :-
* تنظيف بوابة الإنجيكشن بعبوة سبراي junk
* فك التانك وغسيله.
* تنظيف سينسور الـماف بنفس السبراي.
* مراجعة صواميل وجوانات كارتيرة الزيت سواء للفتيس أو الموتور.عشان لو في تسريب بسببهم.
* تنزيل زيت الموتور القديم وإضافة آخر بتاع الـ 3000 كيلو وإضافة سائل flush معاه..وتدور العربية وتسيبها دايرة ربع ساعة بدون ضغط علي البنزين.بعد كده تبطل العربية وتنزل الزيت المختلط بالـ flush ومتتخضش من المنظر اللي هتشوفه.هتحس إن كان فيه بلاك في الموتور من لون الزيت اللي هينزل.
* بعد إتمام العملية السابقة هتحط زيت جديد 5000 كم مع تغيير الفلتر.
* بعد إتمام ما سبق كله..هتروح محطة بنزين موبيل أو شيل تقولهم ينظفولك دورة مياه التبريد بتاعة الريداتير.هتاخد منك بالظبط تلت ساعة شغل.هينزل المياه القديمة ويضيف مزيل صدأ وينظف بيه وينزل كل اللي في الريداتير ويملا الريداتير ميه خضرة.عن طريق القربة طبعاً

بعد إتمام كل ما سبق..هتستمتع بموتور صوته هادئ نظيف..ناعم..سحبه جميل.

----------------------------------------

العفشة..غالباً هتحتاج المراجعة علي ما يلي عند العفشجي :-

* طقم جلب المقصات.
* أطياش الميزان.
* شد السوست.
* حالة كل مساعد.

يتم تغيير ما يلزم إذا تطلب الأمر ذلك بناءً علي رؤية العفشجي.

----------------------------------------------------------------------------

الكاوتش :-

* هتملاً الفرد نيتروجين مش هواء عادي.
* هتخليه يظبط ضغط الإطارات كما هو موصي به علي قائم السيارة.

بعد ما تعمل كلللللللل اللي قولتلك عليه ده..إنت هتعرف إنك ظلمت العربية في حكمك عليها..وهتتفاجئ بتغيير 180 درجة في العربية في كل شئ..بالتوفيق إن شاء الله

+111111