الموضوع: باركولي يا شباب بعد عناء جبت النترا 2007 هاي لاين

المشاركة الأصلية كتبت بواسطة muslim_nsb

الف مبروك ياباشا وربنا يعطيك خيرها ويكفيك شرها
المفروض في صيانة 60 الف بيتغير طقم سيور وبلية كاتينه وفلتر تكييف زيت وهواء وبنزين وتغيير بوجيهات وتغير زييت الاوتو وفلتر زيت اوتو
لو المالك اللي قبلك معملهمش في التوكيل الحق بسرعه وغير الحاجات دي اهم شيء علشان تحافظ على العربيه وعلى مستواها ويفضل كل الحاجات دي تكون اصلى من التوكيل (تضمن انها جديدة ومش مركونه )او اي حد مضمون بيبيع الحاجات دي اصلى
واكشف على المساعدين والسست والمقصات والبيض بالمره وربط عفشه كويس وظبط زوايا وتيل الفرامل الامامي والخلفي ويفضل الاصلي هايفرق معاك في الفرامل وكمان الكاوتش اكشف عليه ولو عاوز يتغير غيره ومتستهونش بموضوع الكاوتش واختار نوع نضيف
وبما ان العربيه دي كنت بتدور عليها يبقه هاتفضل معاك فتره ان شاء الله ومش هاتفكر تبيع يبقه الافضل تغير الحاجات دي ويكون اصلى
ولو افتكرت حاجه اقلك ان شاء الله وربنا يبارك لك فيها

الله يبارك فيك يا باشا

ان شاء الله أنا ناوي أجيب كل حاجة أصلي
بس يا ريت لو حد هنا من الوحوش يدلني على مكان مضمون أجيب منه الحاجة الأصلي بس بعيد عن التوكيل
عشان عمو غبور أسعاره حراقه حبتين تلاته

و بالنسبة للكاوتش الحمدلله الكاوتش اللي راكب فيها جديد

و شاكر جدا لاهتمامك و لنصائحك الجميلة دي

المشاركة الأصلية كتبت بواسطة samir_adel

ألف مبروك, نصيحة بقي ياريت تنزل كل الزيوت اللي في العربية من باكم و فتيس و موتور و مياة راداتير..الخ و تغير جميع الفلاتر و تعمل صيانة كاملة و شاملة و مبروك كمان مرة.

الله يبارك فيك يا باشا
و شكرا على نصيحتك الجميلة دي
ان شاء الله ربنا يكرمني و أعمل كل ده بس يا رب الميزانية ما تخرمش

المشاركة الأصلية كتبت بواسطة mo7a_mo7a

الف مبروك ربنا يديك خيرها ويكفيك شرها

الله يبارك فيك يا أستاذ Mo7a
و شكرا لذوقك

المشاركة الأصلية كتبت بواسطة mhkorayem

مبروك عليك العربيه يا باشا ربنا يحفظهالك
أعتقد اهم حاجه لازم تتغير السيور لو مكانتش لسه متغيره
السيور بتتغير كل 60000 كم
حاول تعرف اللي قبلك مغيرهم ولا لأ ولو غيرهم غيرهم على كام
لو معرفتش منه خلى حد فاهم يبصلك على حالتهم او غيرهم وخلاص وريح نفسك وتبقى مطمن

الله يبارك فيك يا باشا
ان شاء الله ربنا يقدرني و أعملها صيانة شاملة عشان أبقى مطمن

المشاركة الأصلية كتبت بواسطة Walid_M

ألف مبروك ... ربنا يديك خيرها ويكفيك شرها ....

لو صاحب العربية الأصلي مجبليش ورق صيانة ال 60 الف كم يبقى حعمل الأتي :

- غيار زيت تخليقي وفلتر الزيت الأصلي .
- تغيير فلتر الهواء والتكييف .
- تغيير فلتر البنزين .
- تغيير سير المجموعة .
- لو مغيرش زيت الفتيس قبل كده أغيره .
- تغيير طقم البوجيهات .
- تغيير زيت الباكم بتاع الفرامل , والكشف على التيل الخلفي والأمامي وتغيير ما يحتاجوه وضبط رجلاش الفرامل .
- تغيير مياة الردياتير وعمل دروة غسيل لها وتنظيف القربة .
- الكشف على الكاوتش وتغيير مايلزم !!! .
- الكشف على العفشة جيداً وتغيير ما يلزم .

أفضل أن يتم كل ما سبق عند مركز صيانة محترم ...

تحياتي ...

الله يبارك فيك يا أستاذ Walid

الله ينور عليك كلام واضح و محدد في نقاط خلى الدنيا بالنسبة لي أسهل و أوضح بكتير

يا ريت لو حضرتك تقولي على مكان أشتري منه قطع الغيار الأصلي و مضمون بس غير التوكيل عشان الأسعار

و يا سلام كمان لو مركز محترم ناحية المعادي أعمل فيه الصيانة

و أنا شاكر جدا جدا لأهتمام حضرتك

المشاركة الأصلية كتبت بواسطة Kareem Fawzy

مليون مبروك على العربية
ربنا يباركلك فيها ان شاء الله
بص حضرتك بالنسبة للصيانة
لو صيانة ال60 الف متعملتش يبقى هتغير

سير مجموعة
فلتر هواء
بوجيهات
تيل على حسب حالته

لو ان شاء الله الحاجات دى متغيرة على ال60 تقدر تعرف من غير ما تسأل الراجل
بخصوص السير بص عليه شوفه مشقق ولا لا
لانه لو الفابريكا اكيد هتلاقيه مشقق خصوصاً ان السير دة بيتغير كل 60 الف او 4 سنين ايهما اقرب
فلتر البنزين بتغير كل 40 الف كيلو
مياة الرادياتير كل 40 الف
زيت الفتيس لو متغيرش تغيره هو والفلتر بتاعه لانه بيتغير على 40 الف من غير الفلتر
وعلى 80 الف بالفلتر
التيل الخلفى بيتغير كل 80 الف
بالتوفيق ان شاء الله

الله يبارك فيك يا أستاذ Kareem
أنا ان شاء الله ناوي أعمل صيانة شاملة و أغير كل حاجة عشان أبقى مطمن

أنا فاكر أن حضرتك كنت عامل موضوع قبل كده عن مركز صيانة محترم يا ريت لو حضرتك تدلني عليه
و يا ريت لو حضرتك تقولي على مكان أشتري منه قطع الغيار الأصلي و مضمون بس غير التوكيل عشان الأسعار

و أنا شاكر جدا لاهتمام حضرتك و لمعلوماتك المفيدة

الف مبروك ربنا يديك خيرها ويكفيك شرها وبالنسبه الاي انتا عايز تعرفه
1-تغير زيت الماتور والفلتر انا بحط زيت
2-تغير زيت الفتيس ان لازم
3-تربيط العفشه لاطمئنان

الف مبروك...