الموضوع: الشكوى جابت نتيجه في العبور - ix35

السلام عليكم ورحمة الله وبركاته
كنت من فتره صغيره كتبت تقرير عن صيانة ال 1000 والجزء الخاص بتاع الهياكل
http://www.nilemotors.net/Nile/353501-1000-ix35.html

وبعد مامشيت من عندهم ,,,لقيت صوت التخبيط لسه موجود في الشنطه,,,,
سألت عن فرع اسكندرية ومواعيده في الاجازه
http://www.nilemotors.net/Nile/353927-a.html

وللاسف بعد مارحت هناك لقيتهم اجازه,,,,,
الصراحه دمي فاااااااااااار وروحت كلمت خدمة العملاء وانا في الفرع وقدمت شكويتين
1- في فرع العبور,,,,,انهم قالولي اتصلحت ولما مشيت لقيته لسه موجود
2- في فرع اسكندريه ان مواعيد الاجازه الاسبوعيه ( جمعه وسبت ) غير اللي متسجله في خدمة العملاء ( خميس وجمعه )

المهم بعديها بيومين علطول لقيت م/عادل مسئول الاستقبال في هياكل العبور بيكلمني وقاللي انا فاكرك,,,ليه مارجعتش علطول لما لقيت الصوت لسه موجود ؟؟
قلتله انت عارف المنطقه عندكو والزحمه,,,الصوت ظهر لما مشيت على الدائري فكان مستحيل اني ارجع تاني وانا لما سألت حضرتك ايه اللي حصل في العربيه ,,,,قولتلي معرفش وانا روحت سألت العامل وقاللي بسيطه قفل الشنطه اتظبط بس.
المهم اتفقت معاه على معاد تاني ورحتله من 8:30 واول ماشافني افتكرني وهو الصراحه راجل مهذب ومحترم,,,,
قاللي هتخش الورشه وتفهم المهندس والفني كل اللي انت عايزه وتطلع تجرب معاه ومش هتمشي الا وانت راضي ان شاء الله

صراحه كان يووووووووووووم عظييييييييييييم ,,,,من 8:30 ل 3:00 العصر في الورشه
دخلت مع العربيه الورشه وقعدت اشرحلهم المشكله والتخبيط والمهندس ايمن - مدير قسم الهياكل - بنفسه كان واقف معانا ومهتم بالقضيه
العربيه قعدت حوالي ساعه كده وطلعنا جربنا للمره الاولي - حوالي الساعه 10.
جربنا والصوت بقى أقل شويه بس لسه موجود,,,,
رجعنا عالورشه,,,الفني يعمل حاجه ونطلع نجرب تاني ونرجع الورشه,,,
فضلنا عالحال ده اربع خمس مرات لحد ما عم مصطفى داخ مننا وراح ياكل ويرتاح
وهو الصراحه راجل طيب جدا وبيشتغل بضمير جدا - كان قاعد في الشنطه واحنا بنجرب عشان يعرف الصوت طالع منين
وجبنا فني جديد على الساعه 1 كده وكان عايز يبتدي القصه من اولها ويعمل كل تجاربنا السابقه :( :(
قلتله وحياة والدك احنا تعيبنا,,,واستفيد من خبرتنا طول النهار لوسمحت
طلعنا جربنا وعم حسين قعد برضه في الشنطه وطلعنا بقى عالطريق السريع عشان نجيب من الاخر
الراجل تقريبا فك كل حاجه ورا واحنا ماشيين عشان نكتشف الصوت منين - الكنبه وشماسة الشنطه والكريك وقعدنا نجري ورا الصوت لحد ماقفشنااااااااااااااااااا ااااااااااااااااااه اخيرا

كان الفيبر بتاع الشنطه هو السبب اللعين

والصراحه انا من يوم ما استلمت العربيه وسمعت الصوت...دورت على السبب عالنت ولاقيت الناس بره بتشتكي منه ومش عارفيين يحلوه خاااااااااالص

بس النهايه كانت مثمره ومرضيه ب درجة 90% او اكتر والصوت تقريبا اختفى والحمد لله
وهم برضه اكتسبه خبره في الموضوع عشان لو حد راحلهم يجيبوا من الاخر ومايخدش الوقت الرهيب ده كله,,,,,
وبالمناسبه كان فيه عربيه تانيه عندهم وهي موديل السنه اللي فاتت وطلعت جرتها معاهم عشان نشوف فيها نفس الصوت ولا لأ ,,,,وفعلا لاقيناه وبدرجه اكبر كمان :) :)

روحت شكرت المهندس عادل وطلعت على قسم الصيانه عشان كنت عايز اسأل على منظف الرشاشات

الظريف جدا اني اول مادخلت لقيت م/امير في وشي - وهو اللي كان عملي صيانة ال 1000 - سلمت عليه وقولتله انا كنت عندك قريب فاكرني ؟؟
قاللي ايوا مش انت بتاع موضوع الكلاكس ,,,قلتله ايوا

قالللي انت كتبت المناقشه اللي دارت بينا عالنت والعصفوره قالتلي
مين بقى ياشباب العصفوره ده ياترى ؟؟؟؟؟؟؟??????????????????؟؟؟؟؟؟؟؟؟ ؟؟؟؟؟؟؟؟؟؟

سألت على المنظف وقولتله انا عملت ايه في الكلاكس وعدم اللعب في الدفيره ,,,,
صدمني وقاللي مدام غيرت اي حاجه في العربيه,,,لو حصلت بعد كده اي مشكله في الكهرباء هتبقى بره الضمان قلتله انا مالعيبتش فى اي حاجه !!!! قاللي ولو حتى غيرت الكاسيت وحصلت مشكله بعد كده هتبقى بره الضمان للاسف

ده معلومه ,,,يمكن تفيد حد او تغير رأي حد كان عايز يعمل حاجه في عربيته.

الشكوى التانيه بقى بتاعت اسكندريه ولا حد كلمني ولا حد عبرني فيهااااااااااااااااا
بس هما يعني هايقوله ايه ؟؟؟ كانوا فاتحين وانت مخدتش بالك

المشاركة الأصلية كتبت بواسطة amagroup

طالما دفعت لازم لو في عيب تتصلح
اناعارف ان في ناس كتيير مصالحها بتتعطل لو في صبانه دوريه للعاربيه فما بالك بعطل بس العربيه لازم تكون 100% وإلا هتفتح معاك بعد كده
مهما كان التطنيش او تكبير الدماغ او حتي عدم الخبره من أي وكيل
لازم العميل يطلع مرتاح لانه هيرتاح بعد كده علي طول
الحمد لله ان فيه منتدي زي ده عشان نتعلم منه ونشارك بخبرتنا
وزياده علي كده كل واحد يحط في نيته ان بشرح ويوضح ويشارك بمعلومته لوجه الله عشان ياخد ثواب كمان عليها ان شاء الله

مبروك علي اصلاح العيب وربنا يكفيك شرها

الله يفتح عليك ,,,,هو ده الكلام
وفعلا موضوع النيه مهم جدا,,,,ربنا يجعله في ميزان حسناتنا كلنا ان شاء الله