السلام عليكم ورحمه الله

اذيوكوا ياجماعة عاملين اية

حابب انقل لكم تجربتى فى قيادة سيارات المانى فى اجازة شم النسيم

سقتهم كتير وفى طرق مختلفة و احباط رسمي !

العربيتين هما 320 2011 اوكتافيا a5 2012 ام جنوط 17

بداية الحوار هو اننا كنا فى الساحل

والتنقل كان مع عائلات وتبديل العربيات كان الاساسى بين معايا وعربية من الاتنين التانين عشان الحجم ودى شايلة اكتر والشنط وماشابة ذلك.

فكنت ببدل ...

انا سقت الاتنين وبصراحة احبطت جدا

يعنى هو انا لازم عشان احس ان دى المانى اكسر ال 160 واخد ملفات بالسرعة دى واضرب الفرامل واقول تمام وقفت


عامة

بداية التجربة على طريق الساحل لمدة 40 كيلو اية دة ... اية النشوفية اللى فيها ال 320 دى ؟ وكنا بنتريق على السيراتو مثلا ماهى نفس النشوفية

غير احساس انى قريب اووووووووووووووووى من الارض يمكن عشا احساس الركوب مختلف بين الكارينز مثلا وال سيدان الله اعلم

لكن حوصفلكم احساسى ... لو فى مطب مثلا تلاقينى برفع نفسي من على الكرسي كدة هههههههه

يعنى العربية مش مريحة ومش بتاخد وتدى مع مطبات الهوا ذى الكارينز .... طبعا دة بيدى ثبات على سرعات عالية بس عالية ابتداء من فين 150 160 وطالع وقتها تحس ان اة دة بقى المانى والانتقال بين الحارات ذى المسطرة

قرصت شوية بستفيد بقى من الموتور ال320 واطلع اطلع 180 200 كبست اكتر 210 215 ................................. بس ؟


هو يعنى لازم انتحر ياخوانا عشان اقول دى المانى ... لأ مكنتش حاسس بالامان وانا العداد قارى 190 والطريق طالع نازل وبتهبد فى الكرسي وخايف حاجة تطلعلى وحاجة تيجي فجأة

اة الفرامل ماشاء الله والثبات ذى المسطرة ... لكن كل دة بحسة بعد ما اكسر ال160

يعنى 97% من الطريق المشي العادى ال 120 130 كنت .................... مشتاق لعربيتى


الاوكتافيا بخلاف اللى فات ان الماتور محستوش يعنى حسيتة بعد ال 170 بيفقد كل قوتة طبعا عشان 1600 وبقارنة بال320

بس الاوكتافيا العجيبة بقى ! عجبتنى اكتر ! اعلى من ال320 مش برفع نفسي مع المطبات ومن جوة افخم كتير

لكن ماتورها قاتلها الكيك داون ميت ... هو هو بتاع الكارينز وابطأ يعنى مستفدش انى راكب سيدان وال1600 حيطيرها .... بالذات لما تلاقى سيراتو الجديدة جمبك طارت بالكيك داون من 100 ل 160 مثلا و انا اقول بس ححصلة فى الملفات.

ومحصلتوش :)


جوة بقى فى القرية

ماشاء الله .... مفيش مطب يامعلم ال320 معلمتش فية ... ولوحدى :) !!

طب هات الوكتافيا ركب 2 معاك والحس المطبات كلها

قعد بقى خدها بالورب بالعرض بالطول واقف نايم مفيش

طب اية

كان فى جزء غير ممهد ورملة بيدخل للبحر مباشرة يعنى كان لأ ستوب حتغرز ووش لأن العربية كلها من تحت ماسكة فى الرمل

يعنى مثلا فى الكارينز العربية مبتقعش لما احمل الوقعة الجامدة دى يمكن اختلاف سيدان عن دى الله اعلم

نيجى تانى نطلع برة

قلت لأ بقي لازم العب واشوف فى اية فى ال320 اكبس اسحب طير ماشاء الله ماتور جميل جدا

140 160 يمين شمال مسطرة وفرامل توقفك تمام

بس انا مش دى سواقتى دلوقتى هو لازم كل مرة عشان احس بفرق (اتهور) ؟!!!

العربية اذا كان دى او دى ناشفة ال320 واطية الاوكتافيا بطة شوية
العربيتين ضيقين وطلع الكرسي واعدل الضهر

اة شياكة وبرستيج لكن


اية المانى واوروبى وكورى والهجس دة

نزلت رحت اخدت عربيتى

رجعت الكرسي والضهر
انتخت
مش خايف احك
دخلت للبحر عادى مطبات القرية مفكرتش فيها باخدها عادى
اة التابلوة بلاستيك بس لازم ادوس واحسة اية يعنى !


مشيت لحد 150 مش حاسس بالفرق الووااااااووو

قلت الحمد لله فيما رزق

وانسوا بقى كلمة كورى وبتاع

الكورى مش الاكسيل والاكسنت بتاع زمان

الدنيا اتغيرت.


سلااااام