الموضوع: هوندا سيتي 2010 اتقلبت بينا انا وأسرتي

السلام عليكم
يوم الأثنين الموافق شم النسيم واحنا راجعين أنا وأسرتي من الغردقة بعد الظهر للأسف عيني غفلت شوية قبل الزعفرانة بـ 40 كيلو وبدون خوض في التفاصيل في النهاية العربية اتقلبت بينا وزحفت علي السقف حوالي 50 متر علي الرمل وبفضل الله خرجنا منها بدون اصابات المهم طبعا العربية اتبهدلت جامد ولكن الحمد لله القوايم والموتور والشاسيه كله سليم ولكن محتاجه كبوت وسقف وشنطة ورفرف أمامي يمين واكصدام امامي ودنجل خلفي شمال لأن العجلة اتكسرت طبعا غير الكماليات من زجاج وكشاف وفانوس ومراية.
حاولت اسأل عن الحاجات دي في التوكيل اللي رد قاللي ممكن اديك سعر اربع حاجات بس لكن كله ده ماينفعش مش عارف ليه أهو رخامة منهم ، فهل ممكن حد يقوللي تقريبا الحاجات دي تعمل كام عشان أحاول ادبر الفلوس قبل ما أوديها تتصلح في حتة وجزاكم الله خيرا

حاجة اخيرة العربية من الداخل سليمة تماما وهو ما ساعد بفضل الله علي خروجنا منها بسلام وده دليل علي أن العربية فعلا فيها وسائل حماية للركاب وده اللي هايخليني اصلحها وما أبيعهاش بحالتها دي بما إن الأساسيات سليمة .
.

انا اكتر واحد حاسس بيك لانه حصل معايا نفس الكلام من شهرين بس اللي حصل معايا انه فردة كاوتش ضربت وانا ماشي 180 على طريق شرم وكنت لوحدي في عربيتي اللوجان (طبعا 180 بلوجان انتحار) لكن الحمد لله طلعت بكسر في الترقوة وشوية كدمات لكن العربية كانت حالتها اسوأ من عربيتك بكتير لانها اتقلبت مرتين (مع العلم الايرباج مافتحش) لكن والله قول فوقت وشوفت العربية حمدت ربنا من قلبي اني لسة عايش وزوجتي وبناتي ماكانوش معايا وبعت العربية على حالتها ب15000ج بعد ماكونت هبيعها ب55000ج قبل الحادثة باسبوع.
والله انا انا مازعلت على خسارة الفلوس وللا على الكسر والكدمات بالعكس انا لغاية دلوقتي فرحان ان ربنا نجاني وان شاء الله ربنا هيعوضني ويعوضك خير .
مفيش حد بيتقلب بعربية مهما حصل الا اذا كان طاير بيها وده درس ليك وليا ولكل الاعضاء السواقة بسرعة مبالغ فيها انتحااااااااااار مهما كانت مهارتك وكفاءة عربيتك...ربنا يستر طرقنا جميعا