السلام عليكم
النهاردة كنت بعمل صيانة الاربعين ألف و كانت ملاحظاتى كالتالى:
1- طبعا أول شكوى لازم تكون موضوع الـ rpm اللى بيعلى و تبطيل العربية:
أول مرة لما اشتكيت منها أوهمونى ان المشكلة فى واير البنزين و منهم لله بدل ما يغيروه شحموه و عملها فيا و انا مسافر و اتقطع لولا ستر ربنا ان فيه حد أنقذنى من الموقف ده.
المرة دى قلتلها نفس المشكلة حصلت تانى و متقوليليش الواير عشان انا غيرته و انا بستلم العربية لقيتها بتقولى احنا نضفنا البوابة لانها بتبقى متوسخة من انواع البنزين اللى بنستخدمها اللى بيبقى فيها شوائب كتير.. قلتلها طب لو حصلت المشكلة تانى ايه الحل قالتلى هنضطر نغيرها و دى تكلفتها حوالى 1500 جنيه قلتلها يا سلام و ليه ما تتغيرش فى الضمان إن شاء الله ....قعدت تلف و تدور لما زنقتها فى الكلام و قلتلها ان عارف سبب المشكلة و ان انتوا بتغيروا البوابة بواحدة الومنيوم احسن من البلاستيك اللى موجودة... طب اكتبيلى فى شهادى الجودة ان لو حصلت المشكلة هتغيروا البوابة قالتلى متقلقش انتا معاك امر شغل و مثبت فيه المشكلة و لو حصلت تانى ساعتها نبى نشوف هنعمل ايه.
السؤال دلوقتى ايه الحل معاهم لو حصلت المشكلة تانى و مرضيوش يغيروا البوابة؟
هوا فيه حد غيرها فى فرع سموحة قبل كده؟
هوا فيه علاقة بين بوابة الهواء و البنزين (معلش اصل انا معرفش وظيفتها ايه بصراحة)؟
2- الكاسيت بيقطع فى الفواصل بتاعة الكبارى و على مزلقانات القطر و الترام:
الكاسيت سليم و لا توجد به اى مشكلة... ثبتناه فى مكانه بس مش اكتر
الجميل ان عند اول مزلقان قابلته لقيت السى دى بتقطع تانى
المشكلة أحيانا بتحصل كمان مع الراديو مش مع السى دى بس!!!
الموضو ع ده ايه حله لو سمحتوا يا جماعة؟؟ و يا ريت حل بعيد عن التوكيل
3- فحص التكييف عشان الصيف:
التكييف عايز فلتر تكييف بـ 180 جنيه قلتلها شكرا ليكى مش المرادى المرة الجاية ان شاء الله
السؤال دلوقتى هوا الفلتر دا موجود فى السوق فى اسكندرية و لو موجود الاقيه فين و سعره حوالى اد ايه؟
4- فحص الفرامل و رجلاشها
التيل الامامى عايز يتغير قدامه اسبوع او اتنين ...بكام قالتلى بـ 380 جنيه قلتلها المرة الجاية نغيره إن شاء الله.
التيل ده انا مغيره فى صيانة الـ 25 ألف يعنى لسه مكملش الـ 15 ألف كيلو
اسف لو طولت عليكم يا جماعة بس انا فعلا مضايق من موضوع البوابة ده و الاستهبال بتاعهم خصوصا ان اخر مرة المشكلة حصلت امبارح و انا على مطلع كوبرى ستانلى و لولا ستر ربنا ان الطريق كان واقف و مكانتش الناس بتجرى ... دا كفاية الخضة اللى بتحصل للواحد لما الـ rpm بيعلى.
جزاكم الله خيرا
المفضلات