أنا مش عارف أيه اللى حصل للأتوس بتاعتى(أرجو الأفادة)!!!!!!!!

**Na7nology** · 20-08-2008 12:25 PM

أصدقائى أعضاء نايل موتورز....
مبدئيا انا عاوز أشكر كل الللى بيساهم بالمجهود الجبار ده عشان نفضل أحسن منتدى عربيات فى مصر ...
أنا دخلت عربيتى(أتوس برايم 2008) صيانة ال 5000 كم فى توكيل هيونداى والعربية كانت زى الفل والله (قبل الصيانة طبعا)
وخرجت بالعربية من هناك ولا حول ولا قوة الا بالله ... كنت هتقلب بيها مرتيين على الدائرى تعويم والدريكسون بياخد يمين او شمال وبيرد ببطء شديد وحاجة غريبة رجعتلهم طبعا تانى يوم وأحنا أسفين وشكرا انك رجعتلنا ...طب يا جماعة كان فى أيه؟؟؟
قالولى لأ ده حاجة بسيطة أخدت العربية ومشيت وهاه كانت أحسن شوية لكن مفيش يا جماعة هو أسبوع والعربية رجعت أسوأ لدرجة انها وصلت ان انا لو على سرعة 50 وبفرمل العربية بتزحف وتصفر ومش بتقف يا جماعة ده أول عربية ليه لو ممكن تدلونى بس أعمل أيه؟؟؟
والعيب ده ممكن يكون السبب في أيه يبقى جزاكم الله خيرا وشكرا........

**AHMEDCAR** · 20-08-2008 12:48 PM

عليك و على الزوايا و الكشف على علبه الدركسيون

**MOHAMED ABD EL SHAFY** · 20-08-2008 03:50 PM

امام حضرتك حلين لا ثالث لمهما :
1- تروح التوكيل وتعمل هيصة وزمبليطة ومتمشيش الا لما الموضوع يتصلح وتطلع تجرب وترجع تانى وتشتكى لمديرهم ومدير مديرهم عشان يتعدلوا ويعملوا شغلهم صح

2- كبر دماغك من التوكيل وقول (حسبى الله ونعم الوكيل) وتروح حضرتك لازم تكشف على العفشة وعلبة الدركسيون وتشوف الزوايا والفرامل فى مركز صيانة
فيه واحد مشهور فى المنيل بعد سينما فاتن حمامة فى شارع المنيل ليه دخلة كدا هيظبطلك كل حاجة والمصنعية من 100 الى 200 جنية دا لو فك علبه الدركسيون.

ملحوظة :
متمشيش بالعربية كدا على طرق سريعة او سرعات كبيرة الا لما تحل المشكلة عشان الموضوع دا خطر عليك حفاظا على نفسك اولا ثم السيارة
وإن شاء الله ربنا يكرمك وتحل المشكلة دى وربنا ينتقم منهم

**ahmed1981** · 20-08-2008 04:10 PM

إطلع على مركز درش لضبط الزوايا بشارع خالد درويش بعد محطة التعاون بالمطرية ولو هتحتاج ضبط في العفشة هو هيتصرف ويبعتك لناس كويسة

**Na7nology** · 21-08-2008 12:22 PM

شكرا جزيلا يا جماعة على أهتمامكم وعلى ردودكم
أنا روحت ظبط زوايا أمبارح والحمد لله الموضوع أحسن شوية دلوقتى وكمان أقترحوا عليا أن أنا أغير الكاوتش اللى ورا أجيبوا قدام والعكس (مش عارف ليه؟؟؟؟؟؟)..
وقررت فعلا أستنى بس شوية لغاية صيانة ال 10000 كم وأروحلهم التوكيل ومش هخرج بأذن الله غيير وهما مظبطيين كل حاجة...
انا بس لو ممكن حد يدلنا على حد بيربط عفشة ويظبط زوايا يكون كويس ومضمون لأن انا بصراحة مبقتش أطمن لبتوع التوكيل دوول خالص (واضح أن الأشاعة بتاعة أنهم بيرفعوا العربية وينزلوها تانى بس من غيرر ما يعملوا حاجة طلعت صح)..