الموضوع: هجوم غير مبرر

المشاركة الأصلية كتبت بواسطة ahmed_dinamo

+111111111111
احييك على كلامك المظبوط

اشكرك يافندم على المتابعه والرد

المشاركة الأصلية كتبت بواسطة adelghanem

احنا كده عشنا 100 سنه نقول بيجو 79 !!!!!الجديد دايما نسب فيه مش نتأنى ونشوف..الحكايه انى عندنا الواحد عيب يقول مااعرفش الموديل الجديد ده اخباره ايه ,انما يبدا يشتم فيه ويروح على طول مكلمك على اللى عارفه ويفتى..وبعد ما الموديل بنتشر يبدا يمدح فيه ويسب الموديل اللى بعده !!وهكذا

وهو صناعة العربيات جابت زي البيجو والكربيراتير والاكصدامات الحديد والنيكل والمساعدين اللي بيتملو زيت .. الدنيا عندنا بتقف والعالم بيجري

المشاركة الأصلية كتبت بواسطة the_air_devil

اللي يجادلك بالطريقة دي تسيبك منه علشان هو مش فاهم , وجدال واحد مش فاهم عمره ماهايوصلك لنتيجة غير حرقة دمك وأعصابك

الهجوم على أي موديل جديد بيكون من فئات:

1- فئة سطوحي أفندي أنتيكة ... ده توقف نمو عقله عند سنة 1960 , وكل العربيات اللي اتصنعت بعد السنة دي مالهاش لازمة وكلها على بعضها ماتسواش في نظره تعريفة ... أهم حاجة عنده الصاج وان الباب لما يترزع جامد تبقى عربية فل الفل

2- فئة حمادة كلاكس .... وده كل العربيات الباقية غير عربيته تبقى وحشة , تدخل عربيته تلاقيها فيميه وجنوط واكصدامات غريبة الشكل .... وألوان ورسومات تحسسك انك داخل كهف من العصر الحجري , ده كل العربيات من وجهة نظره - بما فيهم نفس موديل عربيته - وحشة ...لأن اللي هو عامله في عربيته بيحميها ويخليها ضد المية ضد النار , ضد الحشرة ضد الفار !!

3- فئة خالتي اللتاتة ... وده حال معظم المصريين اللي غاويين يفتوا في أي حاجة, أصل "بيقوللك" العربية نازلة خفيفة ...بيوفروا في التكاليف يا بيه ... العربية تانك البنزين بتاعها صغير ... يعني هاتدفع بنزين كتير (رغم ان مافيش أدنى علاقة بين ده وده !! )... "واحد صاحبي ركبها" وقال انها تعبانة ... وهكذا ... هاتلاقي ردود كتير نسبة المنطق فيها ماتزيدش عن 3%

4- فئة أنا ومن بعدي الطوفان ... ده بيكون توكيل منافس أو حد متعصب من نجاح العربية ونسبة مبيعاتها العالية , مش باتكلم على نيسان بس لأ على كل الموديلات , هدفه الأساسي والوحيد هو هدم الثقة في كل شئ في العربية علشان غايظاه فقط , مش أكتر !!


5- فئة "كدة Over Over" , وده لو سمع صوت تكة جاية من مكان مجهول في العربية يقعد يلطم ويصرخ ويقوللك العربية معيوبة وفيها أصوات وتجميعها وحش , بصراحة النوع ده من الناس بيكون له أسباب منطقية انه يشتكي , وبصراحة أكتر لازم نعترف ان التجميع المصري لسة ماوصلش لمرحلة احترافية متقدمة , غالباً بيكون عامل مسقط أو مش نايم أو ضارب سيجارة محشية لوز وبندق ... ونتيجة لغفلته في شغله حصل عيب تقفيل , ومش هايظهر للمراجعة والجودة لأن أغلب عيوب التقفيل بتكون في تربيط الصواميل أو الفرش الداخلي , ودي مش هاتتكشف غير بعد فترة من تحرك العربية في ظروف الشوارع العادية , وبيكشفها مالك العربية بنفسه

لكن ده مش مبرر للهجوم على العربية ككل ..انت تقدر تنتقد التقفيل وأسلوبه وتخلي الشركة تجبر العمال انهم يمشوا بنظام أحسن من الحالي .... لكن لو مسامير الكنبة اللي ورا مضايقاك .... الفيتيس ذنبه إيه ؟؟!!


وعادي سيب الناس تهاجم , لو كان هجومهم على مشكلة لها أصل في الحقيقة , يبقى المسئول عن إصلاح المشكلة هو الشركة الصانعة للعربية , ولو كان هجومهم على كلام فارغ وكدب مالهوش منطق , يبقى انت مش محتاج ترد أساساً


وكدة أو كدة , دي عربيتك انت وانت الوحيد صاحب الحق في نقدها أو إطراءها ... دي فلوسك وملكك ومن حقك تحبها وتحافظ عليها أو لو ماحبتهاش تبيعها ...براحتك ... ماحدش شريكك فيها وعمر ماحد مهما هاجم أو اتريق أو قال كلمتين بايخين ما هايكون له نصيب في عربيتك ... ربنا يباركلك فيها ويرزقك خيرها ويكفيك شرها ... وعلى رأي فيلسوف عين الصيرة : كلام الناس ... لا بيقدم ...ولا يأخر !!!

هههههههه الفئات دي هيا اللي جايبانا لورا . يعني شركات السيارات العالميه بسنين خبراتها ومشاركاتها في الفورميولا وان والاف ساعات التجارب العمليه للسيارات مش بيفهموا او فاتتهم حاجات اساسيه وانتبهلها سطوحي افندي . يعني في اسكندريه هنا اكتشف سواقين التاكسي سر اللادا وانها اعظم تاكسي في التاريخ والكاربيراتير مش الانجيكشن .. خلي بالك . والروسي مش المصري .. حاجات تخليك تخرج عن شعورك . ياسيدي انا مش متعصب لعربيتي وقول فيها العبر وانتقدها بس متعمليش فيها خبير ومنظر في صناعة السيارات وانت مجربتهاش او سمعت عنها او تقارنها بحاجات مليانه عيوب . يعني انا مستغرب من كلام النيسان القديمه احلى ده .. طب ازاي ؟ انا العربيه دي " القديمه" سافرت بيها الغردقه من اسكندريه رايح جي وفي رأيي الجديده احسن في كثير من النقاط .. الوسع . الماتور اهدى . الشنطه . العلو عن الارض عشان المطبات والنقر الجميله . الشكل وده نسبي طبعا . الباور الكهربا . الامبولايزر . توفير البنزين . النظام السمعي . الفرامل . abs . وغيره . الموضوع نسبي بس لما تنقد انقد بخبره وبدون تعصب . شكرا يافندم على مشاركتك وكلماتك الرقيقه ..

المشاركة الأصلية كتبت بواسطة toty_305

- لا تلتفت لكلام الناس و على رأي المثل كلام الناس لا يقدم و لا يأخر

-بس و النبي بلاش جو هجوم غير مبرر لأنه مبرر تبرير مبررات مبرره #شفيق

اييييييييييييه ؟؟!!! شفيق ستايل هههههههههههههه

المشاركة الأصلية كتبت بواسطة miceg

أخي الكريم
انا من متابعي القسم
فين الهجوم اللي حضرتك بتقول عليه ؟؟؟؟؟؟
إرفق شوية مشاركات كدة عشان الواحد يتأكد من كلامك
هو معنى ان الناس بتنتقد نقد مش عاجبك يبقا بيهاجمك ؟
وليه جو النفنسة ده من الاساس
كل صاحب سيارة طالما مقتنع بيها ومريحاه يحمد ربنا على نعمة الرضا
ليه تنظر لنقد يدايقك طالما انت مليء بالثقة من عربيتك
ولا ثقتك بتستمدها من كلام الناااس
احنا هنا مش منتدى المطبلاتية ده منتدى
يعني لازم كلنا نقول سلبيات وإيجابيات كل حاجة

اولا حضرتك مش بتحقق معايا عشان اجيبلك مشاركات قريتها او اعلق على انطباعات ناس مجربتش وده الاساس . وحضرتك مش لازم تتاكد من كلامي ومش لازم تعلق او تهتم بالموضوع اساسا . ياسيدي انا شخص منفسن ومريض وغير واثق في عربيتي وبستمد ثقتي فيها من الناس فعلا ... اه وبحب التطبيل كمان .. فعلا انا محتاج علاج وده اللي الناس اكيد لاحظوه من مشاركتي سواد وغل فعلا .. شكرا على مرورك واسلوبك الراقي في الرد

الغرض من الموضوع اساسا للقاريء الكريم ان الهجوم المتعصب لماركه معينه او موديل معين او الناتج عن الاشاعات او السماع او عدم الخبره قد ينتج عنه اثناء البعض عن قرار شراء السياره . اللي ممكن تكون مناسبه للمقبل على الشراء ومتوافقه مع امكانياته الماديه . حبيت اني اقول رأيي المتواضع في حاجه جربتها عشان اللي محتار في قرار الشراء يكون عنده اكتر من راي سعيا لمزيد من التوازن في النقد وعرض التجارب . دمتم بصحه