هجوم غير مبرر

**grumby78** · 17-05-2013 02:31 AM

اولا السلام عليكم
باستغرب من هجوم بعض الاعضاء على نيسان صني الجديده . العربيه لسه جديده وتلاقي ناس تقولك مش معمره ! طيب عرفت ازاي يافندم ؟ يقولك اصلها تجميع مصري ! طيب ايه المشكله ؟ هيا تجميع مصري ماركة ميدو للبويات يعني ؟ التجميع ده بيتم من خلال خطوط تجميع اعتمدتها نيسان اليابان بأيدي عامله مصريه مدربه . طيب تقول ايه عن عربيات تجميع خارج مصر وبها عيوب صناعه . فتيس احيانا ومشاكل عفشه وكهرباء وغيره ! يعني عيوب التصنيع وارده وفي اكبر صناع العالم . تويوتا بتستدعي سيارات لعيوب فرامل وصندوق التروس وايرباجز وغيره . فولكس واجن تستدعي سيارات من الصين لعيوب في فتيس dsg . وغيره طيب ايه المشكله اني اشتري عربيه ماركه عالميه تجميع بايدي عماله مصريه مدربه . طب مالبي ام تجميع مصري والمرسيدس والجيب . ثانيا العربيه نزلت بسعر منافس جدا . اول ماطرحت اواخر العام الماضي كانت بسعر 100 الف للفئه الاتوماتيك و 95 الف للمانيوال . السعر ده زاد تقريبا ليصبح 100 للمانيوال و 110 للاتوماتيك ومع ذلك فالسعر مقارنة بكل من حولها في نفس الفئه ممتاز مع الوضع في الاعتبار ان العربيه نازله بايرباجز اماميتين و abs و ebd . ماتور هاديء وعزل ممتاز باور كهربا ناعم جدا . مساحة داخليه هي الاوسع في فئتها وشنطه كبيره . اميبوليزر . فتح شنطه من الريموت . اقتصاديه . عفشه ناعمه . كل ده طبعا مقارنة الفلوس المدفوعه مقابل ماتحصل عليه . العربيه اعتقد انها اعلى مبيعات في السوق الان في فئتها خصوصا بعد ما شفنا سعر العربيات الكوري المنافسه حصله ايه يعني ارقام فلكيه . انا مش مصدق ان الكيا بيكانتو الجديده ب 100 الف الاتوماتيك وكمان اللوجان الاتوماتيك ب 95500 .. ليه ؟ وازاي؟ شكل العربيه نسبي ودي اذواق انا عن نفسي بحب اشكال العربيات الياباني بتصميمها المتحفظ شويه عن الكوري يعني التيدا تعجبني وناس تانيه مابتطيقهاش زي الجيوك كده .. الاذواق تختلف وكذلك الاراء لكن حبيت اقول رأيي في مسأله استغربتها . ليه الهجوم ؟ هل لانها الاكثر مبيعا الان ؟ يمكن . ولكن تبقى النيسان علامه تجاريه يحترمها الجميع حتى لو اتجمعت في بلاد الواق واق . دمتم بصحه .

**hasanh_red** · 17-05-2013 02:41 AM

السلام عليكم اولا
ثانيا انا مع حضرتك تماما في كل كلمه ودة بسبب عدم الثقه في الايدي المصريه العاملة ولاكن بجد العربيه ثمنها في كل اﻷاوبشنز إلي فيها بس هو في ناس كدة تعشق التشاؤم والفتي والمصري معروف بجبروته في الفتي طبعا هههههههههههههههههههههه

**د.محمدعبدالعال** · 17-05-2013 02:53 AM

يا سيدي لا تلتفت لمثل هذا الكلام .. ثقافة السوق المصري ترفض كل ما هو جديد حتى يستقر ويثبت وجوده وعندما يصبح قديما يقتنع به .. ولنا في اللانسر البومة خير مثال .. وعلى الرغم من أنها تفتقد بعض الكماليات الهامة وعوامل الأمان المتوفرة في السيارات موديل ال 2013 إلا أنها مازالت تباع زيرو وبأسعار غريبة

**grumby78** · 17-05-2013 03:08 AM

المشاركة الأصلية كتبت بواسطة hasanh_red

السلام عليكم اولا
ثانيا انا مع حضرتك تماما في كل كلمه ودة بسبب عدم الثقه في الايدي المصريه العاملة ولاكن بجد العربيه ثمنها في كل اﻷاوبشنز إلي فيها بس هو في ناس كدة تعشق التشاؤم والفتي والمصري معروف بجبروته في الفتي طبعا هههههههههههههههههههههه

احنا فعلا بنحب نفتي جدا ومحدش الا القليل بيقولك " معلش انا مفهمش في الموضوع ده " احنا لسه بنحكم على العربيات بسعه الماتور ! وعلى الصاج انه مؤشر ان العربيه حمالة وحتعيش ! وعلى الحساسات انها مشاكل ! وعندنا العربيه المفروض تكون لكل الاغراض يعني نسابق بيها وندخل على الصحرا والنقر والطرق الغير ممهده ونسوق بعنف ولما تعمل صوت نقول اااااه عربيه تعبانه ..

**grumby78** · 17-05-2013 03:14 AM

المشاركة الأصلية كتبت بواسطة د.محمدعبدالعال

يا سيدي لا تلتفت لمثل هذا الكلام .. ثقافة السوق المصري ترفض كل ما هو جديد حتى يستقر ويثبت وجوده وعندما يصبح قديما يقتنع به .. ولنا في اللانسر البومة خير مثال .. وعلى الرغم من أنها تفتقد بعض الكماليات الهامة وعوامل الأمان المتوفرة في السيارات موديل ال 2013 إلا أنها مازالت تباع زيرو وبأسعار غريبة

فعلا احنا بنحب القديم مش عارف ليه . حضرتك لاحظ ان اي جديد وقت مانزل غالبا كان بياخد اراء سلبيه . كل الجديد وحش لحد مايقدم ياخد شهادة الجوده المصريه . البوما يافندم مثال سافر جدا يعني تقريبا العربيه داخله في 120000 جنيه زيرو بنفس الشكل اللي اتهرى من سنين . ازاي يعني ؟؟! زكمان المستعمل بتاعها 2008 ب 100000 طب ازاي ياخوانا ؟ يقولك اصل اي ميكانيكي بيفهم فيها . يعني انا اجيب عربيه جديده عشان اروح للميكانيكي ! وازاي تويوتا كورولا 2007 ب 100000 ! حاجه تجنن فعلا . ومش عاجب الناس الصني بالسعر ده والمواصفات دي 2013 ..

**MaNoLa** · 17-05-2013 04:06 AM

أحنا أجدع ناس تتريق على أمريكا و اليابان و كوريا و الصين و روسيا
لدرجة انى ساعات بحس ان التريقة دى حقد

لكن أحنا كمصريين أية ؟
بسم الله ماشاء الله أغلب شعبنا كرشه مدلدل على ركبته و قاعد فى مكتبه بيفطر و لما يخلص فطار يأنتخ و يبدأ يشتغل

**AHMED_DINAMO** · 17-05-2013 07:27 AM

+111111111111
احييك على كلامك المظبوط

**the_air_devil** · 17-05-2013 08:29 AM

اللي يجادلك بالطريقة دي تسيبك منه علشان هو مش فاهم , وجدال واحد مش فاهم عمره ماهايوصلك لنتيجة غير حرقة دمك وأعصابك

الهجوم على أي موديل جديد بيكون من فئات:

1- فئة سطوحي أفندي أنتيكة ... ده توقف نمو عقله عند سنة 1960 , وكل العربيات اللي اتصنعت بعد السنة دي مالهاش لازمة وكلها على بعضها ماتسواش في نظره تعريفة ... أهم حاجة عنده الصاج وان الباب لما يترزع جامد تبقى عربية فل الفل

2- فئة حمادة كلاكس .... وده كل العربيات الباقية غير عربيته تبقى وحشة , تدخل عربيته تلاقيها فيميه وجنوط واكصدامات غريبة الشكل .... وألوان ورسومات تحسسك انك داخل كهف من العصر الحجري , ده كل العربيات من وجهة نظره - بما فيهم نفس موديل عربيته - وحشة ...لأن اللي هو عامله في عربيته بيحميها ويخليها ضد المية ضد النار , ضد الحشرة ضد الفار !!

3- فئة خالتي اللتاتة ... وده حال معظم المصريين اللي غاويين يفتوا في أي حاجة, أصل "بيقوللك" العربية نازلة خفيفة ...بيوفروا في التكاليف يا بيه ... العربية تانك البنزين بتاعها صغير ... يعني هاتدفع بنزين كتير (رغم ان مافيش أدنى علاقة بين ده وده !! )... "واحد صاحبي ركبها" وقال انها تعبانة ... وهكذا ... هاتلاقي ردود كتير نسبة المنطق فيها ماتزيدش عن 3%

4- فئة أنا ومن بعدي الطوفان ... ده بيكون توكيل منافس أو حد متعصب من نجاح العربية ونسبة مبيعاتها العالية , مش باتكلم على نيسان بس لأ على كل الموديلات , هدفه الأساسي والوحيد هو هدم الثقة في كل شئ في العربية علشان غايظاه فقط , مش أكتر !!

5- فئة "كدة Over Over" , وده لو سمع صوت تكة جاية من مكان مجهول في العربية يقعد يلطم ويصرخ ويقوللك العربية معيوبة وفيها أصوات وتجميعها وحش , بصراحة النوع ده من الناس بيكون له أسباب منطقية انه يشتكي , وبصراحة أكتر لازم نعترف ان التجميع المصري لسة ماوصلش لمرحلة احترافية متقدمة , غالباً بيكون عامل مسقط أو مش نايم أو ضارب سيجارة محشية لوز وبندق ... ونتيجة لغفلته في شغله حصل عيب تقفيل , ومش هايظهر للمراجعة والجودة لأن أغلب عيوب التقفيل بتكون في تربيط الصواميل أو الفرش الداخلي , ودي مش هاتتكشف غير بعد فترة من تحرك العربية في ظروف الشوارع العادية , وبيكشفها مالك العربية بنفسه

لكن ده مش مبرر للهجوم على العربية ككل ..انت تقدر تنتقد التقفيل وأسلوبه وتخلي الشركة تجبر العمال انهم يمشوا بنظام أحسن من الحالي .... لكن لو مسامير الكنبة اللي ورا مضايقاك .... الفيتيس ذنبه إيه ؟؟!!

وعادي سيب الناس تهاجم , لو كان هجومهم على مشكلة لها أصل في الحقيقة , يبقى المسئول عن إصلاح المشكلة هو الشركة الصانعة للعربية , ولو كان هجومهم على كلام فارغ وكدب مالهوش منطق , يبقى انت مش محتاج ترد أساساً

وكدة أو كدة , دي عربيتك انت وانت الوحيد صاحب الحق في نقدها أو إطراءها ... دي فلوسك وملكك ومن حقك تحبها وتحافظ عليها أو لو ماحبتهاش تبيعها ...براحتك ... ماحدش شريكك فيها وعمر ماحد مهما هاجم أو اتريق أو قال كلمتين بايخين ما هايكون له نصيب في عربيتك ... ربنا يباركلك فيها ويرزقك خيرها ويكفيك شرها ... وعلى رأي فيلسوف عين الصيرة : كلام الناس ... لا بيقدم ...ولا يأخر !!!