قرأت الموضوع كاملا والحوار المرح والشيق
بس لا يفوتني تعليقات بسيطة واستفسارات من الفيرناوية
التعليقات:
النقطة الاولى: لفت نظري تعليق عن ان غبور نزل الامجراند بدلها وانه (ما معناه) واهم انها تنتشر زي الفيرنا ........ الصيني ومعلش هاقول رأيي رغم انه بيزعلهم بجانب عيوب تقفيلها الهايفة وكلنا سامعين عن الامجراند واحد بيقول المرايا اتفكت من الازاز (يظهر ملزوقة بتفافة) والتاني يقولك فبرة التانك اتكسرت (هي فبر!) والثالث يقولك خجتها من التوكيل ليقت الفانوس الي ورا مابينورش والرابع يقولك لمبة التشك منورة على طول الى آخره
بجانب ده اعتمادية الصيني وعمرها في الضياع واحد معرفة اشترى ايه 113 من 5 سنين قابلته من اسبوع معاه لانسر مستعمله قلتله مبروك بعت ال113 ولا خليتها قالي بعت ايه دي اتبهدلت خالص الصيني عمره كده قصير فطبعا غبور هيخسر من سمعته معها في رأيي بس هو مضطر لوقف الفيرنا على فكرة مش بمزاجه دي اوامر هويونداى والا كان خلاها 10 سنين كمان خسارة اوي استبدال الفيرنا بالجيلي في رأيي
النقطة الثانية: الزميل لانوس 2004 على فكرة من اصدقاء الهيونداى وبيحضر لقاءات كتير لهم زي ما تابعت وبيحب ملاكها هو بس بيحب يناكفهم شوية وطبعا عربيته معدلة وقصة تانية غير اللانوس اما اللانوس فاذا كنتم بتتكلموا عن فرامل الفيرنا فحدث ولا حرج على اسوء فرامل عربية وهي اللانوس بلا جدال
النقطة الثالثة: حكاية 80 كيلو دي لا دي اوفر بصراحة فعلا ولا التوكتوك وانا ركبت الفيرنا وكنت متطمن لغاية 110 كيلو وجنوتها 13 كمان وحكاية الفرامل الضعيفة دي يعني متأفوره متهيألي ليه هتبقى اسوء من ال 128
النقطة الرابعة كلكم عارفينها موتور الفيرنا هو موتور الماتركس والالنترا 2006 على وزن اقل وده بيخلي الموتور جبار والتكييف مابيأثرش عليه تقريبا شوف اللانوس بيكتف ام الموتور تكتيفة سودا اما التكييف فتكييف هيونداى
تعالوا بقى لاستفساراتي
ياترى وقف انتاج الفيرنا هيأثر على انتشار قطع غيارها بعد 5 او 10 سنين
وياترى تغيير العجل بجنوط 14 بيفرق كتير وياترى ال 15 مابيأثرش على الاتزان تاني ولا بيحك في الرفرف وهل تكلفة التعديلات تتناسب مع تمن العربية ولا عالية نسبيا على ما اعتقد
وهل العربية بتسخن شوية على السرعات العالية مع تشغيل التكييف
اخيرا لازم اشير الى ان الفيرنا الي ركبتها عفشتها الناعمة ازهلتني وانني ارفع القبعة لم اختار الفيرنا امام اللانوس (مش المعدلة) واللوجان والصيني قصير العمر
اطلت اعذروني وتقبلوا تحياتي