الموضوع: معلومات و تقييم للبيجو 508

هذه اول مشاركة لى فى المنتدى لكنى متابع من فترة طويلة, اتمنى ان تنال رضاكم

اشتريت عربية 508Base line من فترة و هى عملا 1150 كيلو بالضبط, اول صيانة عند 2500 كم, لكنى رحت مركز الصيانة مرتين للاستفسار و رؤية السيارة نفسها فى الصيانة.

حبيت اشارك معكم رأيي كمالك و مزاياها و عيوبها عشان لو حد بيفكر يشتريها

نبدأ الموضوع

الموتور 10/9

- 156 حصان تربو رهييييييب, العربية سحبها ما شاء الله ممتاز , و للعلم انا بحط بنزين 92, اكيد فى فرق عن ال 95 لكن لو شفت فرق الاداء بالنسبة لفرق سعر البنزين ده غير ان 95 بيتغش ف اغلب محطات مصر.

- 92 بيخلى صوت العربية عالى اول ماتدور لكن بينزل بعد 3-4 دقايق, نسبة انضغاط المتور 10.5 : 1 و دى نسبة بالعافية تنفع 92 , لو كانت 1:11 كان بقى مستحيل 92.

- 92 فى الطلعات الشديدة DRAG بيخلى العربية تكركر سنة بس ال ECU بيلحق و يظبط دورة الحرق فمبتحسش بيها الا لو كان الشارع حواليك هادى ( دى حاجة مزعجة لو كنت من نوع اللى بيحبو السواقة الرياضية و الحرق, لو كانت سواقتك هادية و جوه قلب المحافظة مش هاتحس بيها نهائيا).

- بصراحة 92 ممشينى كويس , تفويلة ال 95 بتخش على 360-400 جنية, تفويلة ال 92 تخش على 100 جنية عشان تانك العربية 72 ليتر, من الاخر اداء 92 بتاع 85-90% من ال 95 و لكم الاختيار.

- كنت بامشى بيها على نزلة على 160 (لسة فى التليين و مش عايز اشد عليها) ولا تسمع للمتور صوت و تحس ان الاحصنة عايزة تكمل عادى ( كان معايا النترا 2012 قبلها , سحب الانترا بعد ال 100 زى ال 508 بعد ال 150).

العفشة 10/8

- ممتازة لكن بها بعض الطقطقة الخفيفة تكاد لا تحس بها, لكن التوكيل قال كده عادى فى الاول و بدأت تختفى بالتدريج فعلا.

الامان 10/9

- 6 وسائد هوائية – ABS – EBD ----- ستاندارد النظام الاوروبى, الصراحة ال ABS ممتاز و ساعدنى كتييير فى انى ملبسش ف مطبات قدامها رملة بسرعة عالية.

التوكبل

- رحت مركز ابو رواش اشوف ايه نظام الصيانة, قطع الغيار متوافرة و بالنسبة لمثل فئاتها تعتبر رخيصة, المشكلة ان مصنعية التوكيل نااار , يركبوا انذار مثلا ب 1500 جنية, و ده عيب فى النوكيل.

- الناس محترمين و مؤدبين فى المركز و علم و خبرة بالعربية جيدا , لكن كله بتمنه , ادفععع.

الامان للسيارة

- اموليزر مانع سرقة

- الانذار لو طلبته, التوكيل يركبهولك بعدها ب 45 يوم عشان بيجيبوه من فرنسا ب 3500 جنية و مصنعية 1500 جنية , بس بصراحة تكنولوجيا الانذار تستاهل.

- الانذار رباعى الانظمة يعنى :

1- يصفر لو حد حاول يفتح بمفتاح متقلد غير الاصلى.

2- يصفر لو الزجاج تغيرت ملامحة ( يعنى لو حد سرطن الزجاج بالسبراى من غير ما يهز العربية)

3- يصفر لو حد جلس على اى كرسى او دخل فى اى حتة فى فراغ العربية الداخلى – سينسور مساحة)

4- دى ماينفعش تركب فى مصر – و هى سنسور ميول لو العربية جت تتجر بونش – تصفر على طول

الفخامة : ما شفت احلى من كده خامات و تشطيب , تحس انها BMW او Mercedes .

الكنبة الخلفية تتنى للاخر و تبقى مفتوحة بحرى عالشنطة

ممكن تضبط ارتفاع اضائة النور الواطى ل 3 مراحل من الارض

كماليات لا تعد فعلا, تحتاج تقرا الكتالوج 330 صفحة عشان تعرف كماليتها

الوسع من جوه رهيب قدام و ورا و فى الشنطة تحط جمل.

انا ال High line مدخلتش دماغى عشان السمارت كى غير مألوف بالنسبالى, لو نسيتها دايرة او حاجة, ده غير ان اعطاله رخمة و احيانا السنسور بتاعه بيهنج و ده كلام حد من جوه بيجو.

المزايا:

- موتور جبار, ما تحس انه 1600CC .

- فرامل قوية و مستقرة.

- اقتصادية ( التفويلة بتقعد معايا 9 ايام, متوسط مشاويرى اليومية 70 كم اغلبها طريق سريع ).

- فخامة BMW من جوه.

- كراسى مريحة جدا مع مسند رأس جديد من نوعه.

- واسعة جدا ( طولى 182 سم و ليا صديق طوله 176 سم خليته يقعد فى الكنبة ورائى و ركبه مش لامسه الكرسى الادام وانا قاعد مستريح عال اخر.

- تكييف تحفة, بيتلج العربية فى عزالظهر فى اقل من 5 دقائق+ يوجد مبرد فى التابلوه و فى المسند الجانبى + 4 فتحات خلفية لكن ال High line تضيف امكانية التحكم فى درجة التكييف الخلفى .

العيوب:

- زاوية رؤية المرايات الجانبية صغيرة الى حد ما

- التوكيل مصنعيته نااااار

- لا يمكن اى حد غير التوكيل يمد ايده فيها عشان انظمتها المعقدة.

- لمبة الحزام و صوت التنبيه للركاب الاماميين ما بيطفى و بيكون مزعج جدا حتى يجبرك على شد الحزام (بشده ورا ضهرى و اسند عليه)

- الاستبن اللى معاها طاسة, بصراحة عيب

- بيديك مفتاح ريموت و مفتاح ب شفرة لكن بدون ريموت ( عيب على بيجو الصراحة )

ارجو ان اكون افدتكم, معلش عال رغى الكتير