الموضوع: بيعت عربيتي ومحتار ومحتاج النصيحة في المقارنة ضروري جدا

السلام عليكم ورحمة الله وبركاته

كنت امتلك كيا سيراتو 2010 .. والحمد لله بعتها اليوم لإني كنت محتاج اغير واركب حاجة احسن .. والحمد لله ربنا كرمني فيها

وادعو من الله ان يعطي شاريها الجديد خيرها ويكفيه شرها وللجميع .. اللهم آمين

دلوئتي بكل وضوح وصراحة الكاش اللي معايا من 200 - 220 الف ... دا كل اللي اقدر عليه في عربية اليومين دول ..

عربيات كنت بفكر فيها ولغيتها من حساباتي بسبب الكاش الغير متوفر "بيجو 508 - سيتروين c5 - سيتروين ds4"

للأسف العربيات دي الواحد يخاف منها من أسعار قطع الغيار "اللي اقصده فانوس او مراية لا قدر الله في مصر المحروسة" .. وكمان العين ربنا يستر علينا كلنا

جيت افكر في فولكس سواء جيتا او جولف ولما شوفت موضوع الفتيس ال DSG بعدت نهائياً عنها .. هل تم حل مشكله الفتيس ولا لسه زي الزفت وفولكس بتجرب فينا !!

دلوئتي من كل الإختيارات والبدائل اللي قدامي ... انا شايف ان احسن عربيتين فيهم قيمتهم

1- أوبل أسترا 2013 سواء سيدان او هاتشباك "قيمتها فيها كماليات وتكنولوجيا حديثة" يعيبها سعر اعادة البيع
- لكن مين عارف زمان السيراتو اول ما نزلت من اواخر 2009 كانو بيقولوا سعر اعادة البيع زي الزفت ودلوئتي ماسكه سعر احسن من الأوكتافيا !

2- سكودا فانتازيا إليجانس أعلي فئة "يعيبها تكنولوجيا من 2005 لحد دلوئتي ما اتغيرتشي"
- لكن سعر اعادة البيع نوعا ما كويس .. وكمان لو نزلت الجديده السنه الجاية DSG ماحدش هيشتري وسعر الفانتازيا هيزيد لإنها هتبقي مطلوبة وانا الكسبان

ياريت يا جماعه ماحدش يديني لينكات مقارنات لإني قريت كله .. بس برضه عايز اسمع رأيكم ونصائحكم من جديد .. لإن المبلغ ده تحويشه العمر .. ومش عايز اندم علي اي اختيار

وكمان المناقشة مفتوحة لأي عربية نوع تاني في نفس رينج السعر اللي انا قولته .. مش منحصر علي النوعين اللي انا ذكرتهم فقط ومنكم نستفيد

وياريت اللي يختار حاجة يقول اسباب اختياره ليها

انا محتاج الأسبوع ده اكون اشتريت عشان انا شغلي كل يوم في القاهره ومشواري زي الزفت والمواصلات هتبقي صعبه جداااااااااااااااا

وفقني الله واياكم في الخير والصلاح

تحياتي