السلام عليكم
انا يا جماعه معايا جيب شيروكى 93 وكان عندى أستفسار عن التكيف وعندى امل انى الاقى اللى يفيدنى
دلوقتى انا عربيتى التكيف فيها كل شويه يفصل اروح لكهربائى يلعب فى الفيوزات شويه يشتغل يومين وساعات يفصل على طول وساعات ألاقيه جايب هوه سخن او ضعيف وبعدين يفصل مش عارف أستمتع بيه
وخايف اروح لكهربائى ينيل الدنيا فى العربيه وأخرج من عنده ندمان خصوصا انى عندى قناعه ان العربيه دى مش اى صنيعى يشتغل فيها انا مره روحت لكهربائى عشان الكلاكس مكنش شغال بوظلى الانوار والكاسيت والزجاج الكهرباء والتكيف يعنى العربيه كان كويس انها ماشيه !!!

وبرده من فتره كان عندى مشكله عويسه ومطلعه عينى وهيا ان العربيه كانت بتقعد تنتش هيا ماشيه بمجرد ما تسخن وتدى كمان مدافع وبتاع والمشكله دى كرهتنى فى العربيه وفى نفسى وكانت بسبب برده كهربائى حمار لعب فيها ومن هنا بدأت رحله الاعطال والوقوف مع الصنايعيه لاول مره بس الحمدلله عرفت ميكانميكى كويس عندنا فى اسكندريه ظبتهالى والعربيه ميكانيا بقيت تمام ومش بتنتش ولا تعطل والصراحه خايف اروح لحد كهربائى او بتاع تكيف يبوظلى الشغل اللى الميكانيكى كان عامله

انا على فكره عندى مشاكل كتير هيا كلها رفايع وكماليات نفسى اظبتها بس خايف بجد جد يبوظلى حاجه تانيه اوى يلعب فى شغل الميكانيكى كان عامله واندم
ومن ضمن المشاكل دى :1- النور العالى أحيانا ببقى مشغله ويقعد يطفى ويولع مع نفسى كأنى بلعب بالرعاش
2- الزرار بتاع اللوك اللى بيتربس العربيه كلها بقيت لما ادوس عليه اسمع صوت كده غريب من تحت عند الفيوزات عامل زي الصوت اللى بيطلع لما تدى اشاره وطبعا مفيش اى استجابه ويعتبر الزرار ده عطلان
3- مشكله التكيف اللى أتكلمت عليها
4-برده محتاج سماعتين للكاسيت على الاقل لان مفيش غير واحده اللى شغاله ودى جنب السواق على طول وضعيفه

تخيلوا بقى انا راكن كل الحاجات دى بسبب انى خايف اروح لكهربائى يبوظ الدنيا او يبوظ الشغل اللى كان عامله الميكانيكى والعربيه مثلا ترجع تنتش تانى وتدى مدافع !
حد يعرف كهربائى يكون ممتاز فى اسكندريه ويكون بيشتغل فى الشيروكى بقاله سنين وحافظها ؟!