الموضوع: أخيرا عرفت سبب ضعف فرامل الدايو وعرفت الحل

المشاركة الأصلية كتبت بواسطة popahly

حمد الله علي سلامتك يا جووو...

شكرا علي الاكتشاف دا بس ياريت تنفذه وتشرحه تفصيلا...

الله يسلمك يا كبير
ايه أخبارك ؟
أول ما هنفذه هقول كلا التفاصيل علي طول

المشاركة الأصلية كتبت بواسطة Bassem Taha

حمدا لله على سلامتك
ونورت الجروب
انا الفرامل عندي في الضياااااااااااااااااع بجد والعربية بتهدي ومهما عملت العجل مبيسرخش خالص
وفعلاً سمعت حوار اخد الهوا كروس ده من يومين
وانا إنشاء الله هطبقة عندي بس يا رب العفشجي يرضى يسمع كلامي وميعمليش فيها هندسة ونازل ومعاه بيبة 9 من بطن مامته

الله يسلمك :D
هههههههههههههههههههههه
انا مشكلتي مش زيك
انا الموتور عندي شديد حبتين فالفرامل مش بتلحقه أصلا !
بس بتزحف عادي ... انا زاحف علي 100 قبل كدة ... ممكن تكون مشكلة كاوتش ... مع انه 205
بس انا أحساسي بالدواسة انها بتنزل معايا ومش حاضرة ... وغير ساعات بيحصل fade علي سرعات كبيرة

المشاركة الأصلية كتبت بواسطة Dr.Solom

الله ينور اول مره اعرف ان فى كده

انا بأة قعدت ادور وادعبس على كاتلوج صيانة النوبيرا واخيرا لقيته وجبت الجزء بتاع الفرامل
بس لقيت فيه اختلاف بينها وبين الانوس فى موضوع اخد هوا الفرامل



يمين ورا .. شمال ورا .. شمال ادام .. يمين ادام

الله ينور عليك بجد ... كنت لسة هدور عشان اشوف لو في حاجة مختلفة ... كويس انك نبهتني :D

المشاركة الأصلية كتبت بواسطة shaddadfalcon1

يعني المره الواحده هتاخدلها حوالي دقيقة او دقيقتين وفي 10 مرات يعني متوسط ربع ساعة للفرده يعني ساعة للاربع فرد

بيتهيالي لو قلت كده للميكانيكي هيشتمني ويقولي روح روح هههههههههههههه

بس الحق يتقال لما بقول حاجه للميكانيكي بيتاعي انا جايبها من علي النت بيفضل يتريق عليا وبعد مابيعملها بيقولي عندك حق وانت صح

انت بتوهمه بموضوع النت ده ! هههههههههههههه

المشاركة الأصلية كتبت بواسطة modyegypt

طيب وفرامل اليد كنت عملت فيهاايه مع القطعة المتعدل و ورة شلت الصواميل اللى كنت عملها .......؟

ولا شيلت ولا عملت ... بقالي أكتر من سنة من غير فرامل يد ! ... مش عارف أعمل فيها ايه

المشاركة الأصلية كتبت بواسطة Ahmed Nasser

حمدالله على سلامتك ياجو
بس الـ dot 5 مينفعش فى الدايو او الاملاكى عموما
دة بتاع النقل التقيل

الله يسلمك :D
احمد عبدالهادي حاطه وشغال كويس معاه

المشاركة الأصلية كتبت بواسطة 4fun14

ينصر دينك يا شيخ..انا رايح اسحب ام الهوا اللى فى الفرامل يارب احس بفرق لانى هولع ف العربيه بسبب الفرامل دى

سحبت الهوا ؟

المشاركة الأصلية كتبت بواسطة JAM

حمدالله بالسلامة ياجورج.. وياريت بقة ساعة لما تيجى تعملها تبقة تقولى وهجيب غزالى وهاجيلك ونشتغل كلنا مع بعضنا

الله يسلمك :D
ياااااااااااااه يا عبصمد
انا نفسي أشوفكوا يا جدعان :D

المشاركة الأصلية كتبت بواسطة a_arazik

شكراااااااااااااااا ليك علي الموضوع دة وطبعا الميكانيكية بيعكو وخلاص

عفواااااااا :D

المشاركة الأصلية كتبت بواسطة swimmer25

اتنين مع بعض من اعضاء المنتدي او انت واي حد صاحبك تعملوا الشغلانة دي بروقان
أنا هكتب الخطوات بالكامل من الكتالوج مترجم
الشكر لجورج إنه لفت نظرنا للموضوع ده وهبقي أعمل نفس الخطوات لل 128 وأشوف الأخبار ايه

1- إطفي الموتور ودوس دواسة الفرامل 4 او 5 مرات او اكتر عشان تخرج الهواء من السيرفو والدواسة تبقي ناشفة
.... لو شاكك إن فيه هواء في الماستر الرئيسي ..خد الهواء منه قبل مساتر العجل (وخصوصا لو كنت بتعمل شغل في الفرامل ونزلت الزيت كله)
2- إتأكد إن خزنة زيت الفرامل مليانة علي الأقل للنص ولو مش مليانة إملاها وإقفلها عشان الزيت ميمتصش رطوبة
.... خلي بالك من الزيت عشان لو نزل علي اي دهان هياكله..حضر جنبك إزازة مياه مليانة علي الأخر عشان تستخدمها لو فيه زيت نزل علي الدهان
3- فك صامولة خط الفرامل الأمامية من الماستر الرئيسي (الصامولة البعيدة عن السيرفو)



4- سيب الصامولة مفتوحة لحد ما الزيت ينزل
5- إربط الصامولة
6- ببطء إضغط علي دواسة الفرامل للأخر وثبت رجلك مع الضغط بقوة (مرة واحدة بس)
7- فك نفس الصامولة الأمامية لماستر العجل الرئيسي بس هويها بس المرة دي متفكش خالص عشان تخرج الهواء (الدواسة هتنزل معاك للأخر)
8- إربط الصامولة وبعد ما تربط سيب الدواسة ببطء واستني 15 ثانية
9- كرر الخطوات من 6-8 علي نفس الخط الأمامي لحد ما الهواء كله يخرج مع ملاحظة ترك 15 ثانية بين كل مرة

10- كرر نفس الخطوات من 6-9 ولكن علي الصامولة خط الفرامل التانية



.... الخطوات القادمة تستخدم لخروج الهواء من مساتر العجل بالترتيب التالي: خلفي يمين - أمامي شمال - خلفي شمال - أمامي يمين
في النوبيرا مكتوب (خلفي يمين - خلفي شمال - أمامي شمال - أمامي يمين)
11- ركب خرطوم رفيع علي صمام مساتر العجل بعد فك غطاء الصمام الكاوتش وإغمس الناحية التانية من الخرطوم في إزازة صغيرة شفافة فيها زيت فرامل قديم (متهيألي عشان تشوف فيها هواء بيخرج ولا لأ وكمان عشان الماستر مياخدش هوا قبل قفل الصمام)



12- ببطء إضغط علي دواسة الفرامل للأخر وثبت رجلك مع الضغط بقوة (مرة واحدة بس)
13- فك صامولة الصمام لحد ما تخرج زيت وهوا (هويها بس) (دواسة الفرامل هتنزل للأخر)
14- إربط الصامولة
15- سيب الدواسة ببطء واستني 15 ثانية
.... الضغط بسرعة علي دواسة الفرامل يدفع بستم الماستر الرئيسي الثاني في الماستر فبيصعب عملية أخذ الهواء من الدورة
16- كرر الخطوات من 12-15 لحد ما كل الهواء يخرج..ممكن توصل ل 10 مرات او اكتر لخروج كل الهواء
17- رجع الغطاء الكاوتش مكانه
18- كرر الخطاوت من 11-17 بالترتيب المذكور: خلفي يمين - أمامي شمال - خلفي شمال - أمامي يمين
19- إختبر الدواسة وإتأكد إنها مش طرية وكرر الخطاوط كلها غذا حسيت إنها طرية (إسفنجية)

الله عليك بجد
انا قعد أقرا علي أخد الهوا من الماستر بس فكستله بصراحة :D
بس كويس انك جتبته ... وترجمة زي الفل الله ينور :D

المشاركة الأصلية كتبت بواسطة blazer

اولا ويلكم باك على الغيبة الطويله الى مش عارف سببها دى

و انا كنت هقوله لما تيجى تعمله ابقى قول عشان نجربها مع بعض

ربنا يخليك :d
الدراسة بقي :d
أكيد ان شاء الله

المشاركة الأصلية كتبت بواسطة mahmoud_anwar

طيب ياجماعه محدش يعرف ميكانيكي عمل عنده الموضوع ده ؟؟؟
يعني بدل مانوح ولسه نشرح لي الناس يكون الفكرة دي عملها قبل كده تريح الواحد

معرفش .. بس أعرف ميكانيكي دماغه حلوة ولو الموضوع طلع تمام ويستاهل هقوله وهخلي الناس تروحله ... هو في ميدان الجيش في العباسية

المشاركة الأصلية كتبت بواسطة mo7eb elrasol

انا الفرامل عاندى الحمد لله كويس
ومن يوم ماجبت العربية من 8 شهور تقريبا خايف اخد هوا او اجى جنب الفرامل احسن تبقى اسوأ ههههههه

متأكد انها كدة كويسة ؟ :d

المشاركة الأصلية كتبت بواسطة jam

والله المشكلة فى الوقت بس.. وياريت نرتب مكان وزمان ونتقابل ونعمل الليلة دى.. انا شغلى فى أكتوبر وساكن فى القناطر.. نتقابل فى اى مكان فيهم هيكون تمام

ممكن يبقي أكتوبر حلو

المشاركة الأصلية كتبت بواسطة jam

ياريت.. لإنى فعلآ مش لاقى الزيت الألمانى فى السوق... بس عم جورج يفضيلنا نفسه شوية

ايه الزيت الألماني ده ؟
انا كنت هجيب mobil

المشاركة الأصلية كتبت بواسطة MMamdouh

موجود عند المواردى فى المنيل و اعتقد كمان عند المنير

MMamdouh

شكرا يا ممدوح
بس ايه الزيت ده ؟

المشاركة الأصلية كتبت بواسطة swimmer25

علي فكرة ... ممكن النوبيرا يكون لها تعديل في الفرامل الأمامية لفرامل نوبيرا 2000
ما تنزلوا تدوروا وتجربوا
شوفوا الصورة دي بتاعة مكنة 2000....مش لاقي بتاع 1600 !!

انا شوفتلها مقاس كبير علي amazon كان ventilated grooved .... حاجة كدة فخيمة :D

المشاركة الأصلية كتبت بواسطة muahmmad honda

مبروك مقدما :)

الله يبارك فيك :d

المشاركة الأصلية كتبت بواسطة eng.geo

5 غلط ليه ؟ ... أحمد عبدالهادي حاطه مبسوط بيه جدا

اويلسهات الماستر حساسة جدا لنوع الزيت, لو استخدمت نوع غير الموصى بيه وارد ان الاويلسيهات تضرب و الماستر يبوظ