انا بقالي كتير شايف الموضوع وساكت مش راضي اتدخل فيه لحد ماشوف كل طرف من الأطراف هايتصرف ازاي
وبصراحة صدق المثل العربي القديم "كل إناء ينضح بما فيه..."
يعني اللي عنده ذوق وأدب وأخلاق وبيحافظ على العشرة دخل وقال ما عنده , واللي في نفسه كلام لغرض ما والله مطلع عليه دخل وقاله وشفته وكل الناس شافوه
الموضوع يتمسك من أوله لآخره حتة حتة , ونشوف كل حاجة تتعالج ازاي ونهدي اعصابنا تماماً , ونبدأ بسم الله :
1- احب اكرر توضيحي لحتة ان مش كل الناس اللي تقرأ كلامك تفهمه بنفس الصورة اللي نفسك توصلهالهم ... لأ ده كل واحد بيقرأ بالكيفية اللي بتفكر فيها دماغه
2- البذاءة لا تقابل إلا بالتجاهل , الشخص المحترم لو دمه اتحرق هايخسر كتير من أعصابه وصحته , والشخص قليل الذوق والأخلاق إنما هو شخص فقير يجب التصدق عليه بالتجاهل !!
3- ده موقع إنترنت , مشهور وعليه بيانات عن سلعة صناعية معمرة تمنها غالي وفاتحة شركات مشغلة ملايين الأفراد باستثمارات مئات مليارات الدولارات , وكل ما تزيد أهميته كل ماتزيد مساهمته في التحكم في شريحة من السوق , وشرائح السوق في السيارات كلها ذات قيمة عالية والتركيز والتنافس عليها شديد
4- بناءً على الخطوة السابقة , كل عربية هاتتعمل مهما كان الصانع والموديل والتوكيل والخدمة والصيانة والملاك , هايكون لها مميزات وعيوب , هايكون لها محبين وكارهين , وبالتالي هايتدخل كل طرف لمناصرة رأيه.
5- في ظل فساد الأخلاق اللي مش بيتوقف عن التطور في مجتمعنا , عندنا كذا نوع من البشر لازم ناخد بالنا واحنا بنتعامل معاهم , وأولهم الشخص المتخصص في إشعال الحرائق بين الناس وعمل مشاكل وحوارات لا طائل من ورائها غير انه يشغلك ويعطلك ويضيع وقتك ويدمر صحتك وأعصابك , كل ماتطفي حريقة هايولعلك عشرة ... الراجل ده أحسن حل ليه هو السكوت والتجاهل التام
النوع التاني من هؤلاء البشر , هو الشخص المتخصص في مهاجمة كل منافسيه , وده وظيفته هامة جداً في مجال التسويق والمبيعات , لأنه بيخلق صورة مشوهة للموديل المنافس في ذهن كل المستهلكين المتوقعين , هايهاجم حاجات رئيسية ومدروسة في كل هدف , وخصوصاً الحاجات اللي بنعتبرها نقط ضعف فعلية , هايعرف يستغلها صح لأن دي شغلانته , وهايكون في بعض الأحيان عنده حق لأنه بيهاجم عيوب حقيقية , وفي أحيان أخرى هايكون كلامه فبركة لكنه بيوجع وبيسمع جامد في السوق وبيتسبب في بلبلة كبيرة , وده عز الطلب لأنه بيخدم الإقبال على سلعته كبديل أساسي للسلعة التانية اللي عمل عليها إشاعات.
النوع رقم 3 , ده شخص عنده مشكلة ما , لكن أسلوبه في الذوق والأدب مش راقي , وطريقته في الكلام مش بتتمتع بقسط وافر من الاحترام , وده -من وجهة نظري- لو حصل معاه مشكلة بتكون ذات حجم أكبر من المشاكل اللي بيسببها النوعين اللي فاتوا ... لأنه بيخبط في الكلام وبيهين بدون حساب وبيتهم الناس جزافاً بالباطل , حاله زي حال أي حد ماتعلمش الأدب ولا الأخلاق وبيظهر معدنه عند أول احتكاك , يقلبه خناقة ولازم ينتصر فيه بقلة الأدب والصوت العالي , النوع ده من البشر متواجد من بدري لكنه بيظهر مع تصاعد الأحداث دايماً
6- اللي حصل هو وجود الـ 3 نوعيات من البشر في فترات متقاربة من بعضها , حبة شتيمة في العربية وحبة شتيمة في الناس بتوع نيسان وحبة شتيمة في نيسان تيم وحبة اتهامات تمس النزاهة والشرف
في الحالة دي لازم اقدم شهادة في حق أحد الأعضاء الكرام الأعزاء وهو أخونا الكبير ووالدنا الأستاذ حمدي والد هيما
الراجل ده كان راح التوكيل مرة يعمل حاجة في عربيته , يعمللها صيانة , وانا كنت متواجد هناك بالصدفة وكانت معايا مراتي , شفته وقمت اسلم عليه واتكلمنا حبة صغيرين وماعرفتش اتكلم أكتر علشان مراتي كانت معايا , لكنه اتعامل زيه زي أي عميل في المكان اللي كنا فيه , وقعد واستنى وقته ونال القسط الوافر من البطء وبهدلة الانتظار ... لاهو قابض ولا واخد فلوس من التوكيلات ولا بيشتغل معاهم يا (هو الراجل اللي شتمه كان اسمه إيه؟؟ :) )
الشباب اللي اتشرف بمعرفتهم هنا في نيسان تيم كلهم بيصرفوا من وقتهم ووقت أسرهم علشان دي حاجة بيحبوها , علشان لقوا هواية جميلة نفسهم من زمان يحققوها وهما ناس مليانين بالخير , زي أي واحد ابن بلد مصري أصيل تسأله في الشارع يدلك ويوصلك بنفسه كمان وممكن يشتريلك حاجة ساقعة على حسابه في الحر علشان انت ضيف غريب عن المكان
ناس بيحبوا الخير وبيساعدوا من غير مقابل ومش محتاجين ولا مستنيين شكر من حد , ولا لازمهم تقدير من موقع أو شخص أو غيره ... الناس دول على يدي لو كان نفسهم يشتغلوا مع توكيل كانوا اشتغلوا من بدري ...ولو كانوا نفسهم يتعينوا في شركة فهم كلهم الحمد لله ربنا رازقهم بأعمال طيبة وكل واحد لاقي نفسه في وظيفته ... فيه فرق بين دخولك هنا علشان انت بتلاقي نفسك واطمئنانك في انك تساعد الناس , وفيه فرق بين انك تكون واحد مدفوعلك علشان تقوم بمهمة معينة ... الأخير ده بيكون كل ردوده في مصلحة الشركة اللي هو تبعها ... معاهم على طول الخط ومابيعترفش بوجود أي غلطة مهما كانت طفيفة
كلنا هنا عانينا من سوء خدمة ومن مشاكل تصنيع أو تجميع أو مشاكل واجهتنا في عربياتنا زي أي حد , وكلنا واجهناها عن طريق الاستعانة بخبرات سابقة قرأناها هنا , أو توكلنا على الله وواجهنا المشكلة بنفسنا وكل واحد حط تجربته علشان الكل يستفيد منها ...فين وجه الاستفادة من واحد عربيته طلعت عينه واتقرف على ما حل مشكلة مع توكيل من التوكيلات ... وفي الآخر راح حاطط المشكلة وحط حلها ؟؟؟ ما مشكلته اتحلت بعد طلوع روحه ... استفاد هو إيه لما راح حكالك وحكى لغيرك عن مشكلته غير انه كان عايز يفيدك ؟؟
لو كان موقع بحجم الموقع اللي احنا بنتكلم من خلاله بيدي فلوس للناس دي ... فكل ما يمكنهم الحصول عليه من أموال مش هايزيد عن أجر نص يوم من أعمالهم الحالية والحمدلله رب العالمين رزق ربنا واسع ... لو كان ده هدفه كان راح حتة أحسن من كدة بكتير يشتغل فيها - مع كامل احترامي للموقع - , انما فيه فرق بين واحد قلب مكان هوايته لمكان ودود محترم هادي , وبين واحد همه الوحيد هو القرش ...ومش مهم ييجي منين
وان كان أي حد بيعتبر الحصول على خصم 10% ميزة مهولة لا يتمتع بها باقي أفراد الشعب , فالشباب اللي هنا هما أصلاً اللي جابوا الخصومات دي لكل أهل المنتدى ده والكل يقدر يحصل عليه عن طريق شراء ستيكر صغير من أماكن كتيرة بيتوزع فيها ... يعني أصلاً زيهم زي غيرهم , عايز خصم روح اشتري ستيكر للمنتدى ...بالمناسبة انا ماجبتهوش ومش هاشتريه ومش عندي أدنى نية اشتريه ومش عايز خصم من أساسه !!!
مافيش حاجة اسمها تكتلات من أي نوع , كلنا ناس عرفنا بعض من هنا ومافيش بيننا أدنى مصالح , مافيش بيننا غير كل احترام والاحترام ده موجود تجاه كل الناس , حتى اللي بيتكلموا بشكل مستفز
ماحدش من الشباب اللي هنا قال لفظ خارج ولا قل أدبه ولا حقر من حد أو تعامل معاه على أساس شغله أو دينه أو انتمائه أو حتى طول دقنه !! ... الناس هنا ماحدش فيهم شايف حد وعايز اقول ان ناس كتير تعاملت معاهم من غير ماعرف أشكالهم حتى هذه اللحظة !! ...
7- في ظل الحالة اللي احنا فيها حالياً , هارجع واقول ان كل إناء ينضح بما فيه
انا مش هايهمني مين يقول إيه ...انا هافضل اشارك خبراتي مع الناس وبكل احترام , هافضل اقول كل حاجة فيها عيوب ومميزات ازاي .. اللي بيتعمل ده بيكون من جوة الشخص وماحدش بيجبرني اقول أو اسكت ... آه الواحد ممكن ياخد على خاطره ويزعل شوية من شخص عابر , بدل مايرمي السلام رمى شتيمة ... لكن هايفضل طول عمره "عابر" زيه زي أي حد ماشي في الشارع مانعرفهوش ومش عايزين نعرفه
المكان ده مافيش إدارة هي اللي بنته , ومافيش إدارة عندها خبرة مالكي نوع معين من السيارات ...اللي بناه ووصله للمرحلة دي هم الأعضاء المحترمين اللي كل واحد فيهم قال كلمته , وهو بشر قابل للصواب والخطأ .. علشان كدة هانلاقي أعضاء محترمين تانيين بيقولوا رأيهم الصحيح عند وجود أي حاجة ممكن تحتمل الخطأ
وكل واحد فينا بيحترم عقلية التاني ومكانته , ممكن يكون واحد بيرد عليا من لابتوب والده لأنه عنده 12 سنة , بس طالما قال رأي صائب يبقى احترمه , ممكن يكون اللي قدامك ده عنده 70 سنة وده رأيه فوق راسي لكنه ممكن يكون خاطئ ... عمره ما كان بالسن ولا بالأقدمية ولا "بتاريخ التسجيل في الموقع" ... قيمتك بما تقدمه للناس , ليس بما تتفضل به على الناس
وماشفتش حد هنا تفضل على الناس ولا أبطل صدقاته بالمن والأذى ... وماشفتش أذى غير من "بعض" الـ "أشخاص" الـ "عابرين" ... ومن وجهة نظري وجودهم منتهي لأنه زي عدمه
هايفضل المكان ده محترم بوجود أعضائه وباحترامهم لذاتهم ولعقليات بعضهم , وهايفضل كبير علشان انتوا ناس كبار ومكانتكم تتشال على الراس ... وتحياتي واحترامي لكل فرد فيكم ولو حتى دخل وشاف الموضوع من غير تعليق
لكن كلمة أخيرة مني وماحدش يزعل مني فيها :
كل المبادرات الطيبة تفشل عندما تتدخل فيها كلمة "مقاطعة" ... عمر المقاطعة ما بنت بيت وعمرها ما عمرت بلد ... نصيحة لوجه الله , كل واحد يستمر في العطاء بتاعه ... ولو حد فينا لقى حاجة غلط يصلحها , انا مش في ثقافتي ولا قناعتي الاستسلام ... ودي عقيدة قتالية متربي عليها من طفولتي ... وعمري ماهاتخلى عنها
تحياتي لكم جميعاً , وأدامكم الله بخير
المفضلات