السلام عليكم ورحمة الله وبركاته
انا قريت موضوعك يا استاذ عصام بتاع تغيير مياة الردياتير
وكان عندي مشكلة ان الصور مش ظاهرة عندي
بس انا استفساري بخصوص حاجة تانية
انا معايا شيفرولية لانوس موديل 2010 شاريها من سنة ونص
هي حاليا عامله 83000 كيلو مع العلم اني عملت بيها 10000 كيلو بس ف السنة ونص دول
يعني انا شاريها وهي عامله 73000
المهم بخصوص المياة انا جاهل لحد كبير بأجزاء العربية
فانا اول ما جبتها لقيت المياة ف القربة مياة حنفية وطبعا نصحوني اغير المياة واحط مياة خضرة
وانا عملت بالنصيحة ورحت لميكانيكي و فرغ المياة اللي ف القربة وفكها ونضفها من الصدا اللي كان ماليها ( نضفها بجاز وبعدين غسلها بمياة) ومعرفش ده صح ولا غلط :d
المهم انه قالي هات العلبة الامريكي دي الصغيرة و غيرلي مياة القربة فقط
حط العلبة وزودها بمياة م الحنفية
المهم انا كنت مفكر ان هو ده تغيير المياة معرفش ان مياة الردياتير نفسه بتتغير
ان كل اللي كنت اعرفه بيتملا مياه هي القربة
دي حدود معلوماتي :d
بس مع الوقت عرفت ان الردياتير المياة بتاعته بتتغير
انا دلوقتي بقى معرفش صاحب العربية كان حاطط مياة خضرة ف الردياتير وكان بيزود بمياة عادية
ولا هو كان حاطط مياة عادية اصلا م البداية
ومعرفش اسأله لاني شاريها من تاجر خدها من المالك القديم ليا على طول ف صعب اوصله
أنا اسف اني طولت ف الكلام بس السؤال دلوقتي
انا عايز اغير المياة كلها بقى زي ما حضرتك شرحت كده (بس ناقصني الصور)
هل احط مياة موبيل ولا الاسباني ولا احط مياة مقطرة ولا اعمل ايه بالظبط ؟
الموضوع ده شاغلني جدا وارجو الرد السريع والمفيد فيه
وشكرا جزيلا مقدما