ياخوانا انتم بتقارنوا البيز لاين الاوروبي اللى مازال اغلي من الكورى ب20الف جنية بالهاى لاين الكورى اللى ارخص ب 20الف من اول فئة فاضية اوروبي !
ياخوانا انتم بتقارنوا البيز لاين الاوروبي اللى مازال اغلي من الكورى ب20الف جنية بالهاى لاين الكورى اللى ارخص ب 20الف من اول فئة فاضية اوروبي !
تغيير الشكل وتجهيزات الـinterior والأوبشنز... لا أعتقد انها تسوى 50-70 ألف يا صياد؟!!
- لما هونضاى-كيا تقول All-New كذا: يبقى عـ الأقل شاسيه جديد!
لكن لما تلاقى الشاسيه/العفشة، الموتور والفتيس زى القديم (عمل new-shape فقط)... يبقى الكورى حرامية؟!! :afterboom:
دى أساسيات يامعلم:
أمثلة:
- شوف الفلوينس (موتور وفتيس وfacelift)،
- والإمبريزا (موتور وفتيس) السيفيك (شاسيه وgeneration)
- الأوكتافيا (عربية تانى شاسيه-موتور-فتيس-تجهيزات فضائية)
- الجولف7 كذلك، وحتى الجيتا على PQ35
- الفوكاس (عربية totally NEW)
- شوف البيمرز مثلا (كل حاجة فـ العربيات إتغيرت -إتحولت)
حتى الكورولا هتنزل عربية مختلفة تماما شاسيه وموتور وفتيس وتجهيزات...etc
ده إسمه ALL-NEW-CAR
مش يشتغل الزبون بشكل وأوبشنز - ولاتزال العيوب الميكانيكية/الفنية زى ماهى؟؟!!!
أختلف معاك ياحسام!
- الجديد ان الكورى قفز فـ شريحة سعرية مش بتاعته؟!! :eee:
العربيات دى متفهم -إلى حد ما- أسعارها والـvlaue أو الـtechnical background بتاعتها
(عشان كده قولت لشهدى ليها زبونها)،
لكن الكورى ده مالهوش زبون؟!! :bump1: دا بيتركب (كان بيتركب) عشان السعر والإنتشار وقطع الغيار/إعادة البيع؟؟!!!
دلوقتى فعلا مبقاش value-for-money زى الأول!!
رغم اني معايا عربيه كوري ورغم اني كنت بتمنى العربيات الاوروبي تنتشر أكتر في مصر لما عملت الموضوع ده بس أنا شايفكو عمالين تقارنو عربيات بعربيات وتقولو الكوري غلي ليه وبتاع وناسيين نقطه مهمه جدا. توكيل كيا بيجني دلوقتي ثمار نجاحه. ناس كتير بتقول ان المشتري بيجيب الكوري عشان منتشر. طب مين اللي خلاه ينتشر أصلا؟ التوكيل اللي رمى فلوس كتير في الدعايه ومكسب قليل على العربيه وهامش ربح أعلى للتجار عشان عربياته تملى المعارض ومصاريف كتير في تأسيس مراكز خدمه كبيره في القاهره والمحافظات مقابل توكيلات الاوروبي اللي تلاقي كل واحد فاتح مركزين تلاته بالكتير في القاهره ومفيش مراكز نهائيا في المحافظات وعربيات غاليه (هامش ربح أعلى للتوكيل في كل بيعه) عشان يقدر على مصاريفه التشغيليه الثابته ولما تحتاج قطعه غيار متلاقيهاش ويقولك احجزها ونطلبهالك تيجي بعد شهرين.
توكيلات الاوروبي خايفه تستثمر في دعايه وانشاء مراكز خدمه منتشره يبقى هما حرين يبلوها ويشربو ميتها ويرضو بارقام مبيعاتهم الهزيله مهما كانت عربياتهم أنضف وأكفأ وأأمن بس انا مش هجيب عربيه أعملها شغلتي كل ما يبوظ فيها حاجه ألف مصر كلها عشان ألاقيها ولا في الاخر أضطر أجيبها شحن من بره وأفضل راكن العربيه لحد ما القطعه دي تيجي عشان التوكيل بيخاف يجيب قطع غيار لتبور عنده لأن مبيعاته أصلا تعبانه.
كمثال وليس للحصر كنت عامل الموضوع ده لما رحت توكيل سيتروين قبل كده أتفرج على DS5 وفعلا كنت ناوي أشتريها لو عجبتني على الطبيعه زي ما عاجباني في الصور والفيديوهات اللي شوفتها. رحت عز العرب اللي على الصحراوي ولقيت العربيه مش معروضه. راحت فين؟ اتباعت. طب الناس هتحجز ولا هتشتري ازاي والعربيه مش موجودهو لسه نازله جديد وناس كتير لسه مشافتهاش في الشارع؟ زبون قال هاخدها بعناهاله. يعني انا أدفع 50 ألف أحجزها من غير ما أشوفها؟ طب فيه بروشور؟ لاء مفيش بس حضرتك ممكن تديني ايميلك وأبعتهولك. الفايل عندك؟ مش متأكد بس هدور عليه وأبعته لحضرتك على الميل النهارده. (طبعا ولا بعت ولا بتاع) ايه الفرق بين الفئتين؟ مش هقدر أقول لحضرتك عشان كل دفعه بتيجي المواصفات مختلفه!
بالذمه ده شكل اداره مبيعات عايزه تبيع؟ باقي التوكيلات هتلاقيها برضه بالمستوى ده. البياعين نايمين على روحهم من قله الشغل وعشان المبيعات ضعيفه والرجل عليهم خفيفه تلاقيهم بينسو المعلومات اللي اتدربو عليها الخاصه بمواصفات العربيات اللي عندهم.
في المقابل شايفين كيا عامله ايه في اعلانات الكارينز الجديده؟ أنا متهيألي مش بيفوت يوم الا لما أشوف اعلان ليها في التليفزيون وأنا مش متابع للتليفزيون أصلا. ده غير اعلانات النت والجرايد. ناس بترمي فلوس بقلب جامد وعندهم يقين ان بمجهودهم هترجع وزياده.
أتمنى تكون مشاركتي خفيفه عليكم ومتسببش أي حساسيه لحد بس ده رأيي ان توكيلات الكوري سواء كيا أو هيونداي سر نجاحهم في التسويق وأنا مش خبير تسويق بس عارف ان البياع الشاطر بيبع أي حاجه حتى لو كانت معطوبه والبياع الخايب مش بيبيع حتى لو معاه بضاعه درجه أولى.
الوكيل حلو مفيش كلام :bump1:
لسه بفتح الفيس لقيت الاعلان في وشي :aloha:
http://i.imm.io/17Kx4.jpeg
فين بس الشاسيه اللى متغيرش امال الـ 2700 دول ايه
الشاسيه بقى اطول واعرض من القديمة
والعافشة هى اه شكل القديمة بس مش زيها على الطريق
والموتور بقى Dual CVVT والفتيس 6 نقلات steptronic عايز ينزلوا الـ 8 يعنى ولا ايه
دا عندك عربيات لحد دلوقتى 4 نقلات و5 وكمان مفيهمش steptronic
عامة العربية مختلفة تماما فى كل حاجة ولا حجم ولا شكل وكماليات زى بعض
حتى الخامات من جوا
يا راجل دا لما بركب الريو وبنزل اركب السيراتو مثلا بحس بتطور شوية لصالح الريو
ما بالك بقى لما بركب السيراتو الجديدة
بالنسبة للـ 50 الف اللى بتقول عليهم
هتاخد جديد ..
شاسيه اطول
شكل احدث
موتور اقوى وموفر اكتر فى البنزين
aerodynamics احسن
عزل اعلى للصوت الخارجى والحرارة
العربية اطول واعرض واوطى من القديمة
طبعا الـ front والـ rear track بقوا اعرض
خامات احسن بكتير وتقريبا كلها Soft
وطبعا تجهيزات الموديل القديم + التجهيزات المضافة جديدة للعربية زى:
الكرسى الكهرباء بـ 2 ميمورى
والكراسى near الـ bucket
الكاسيت التاتش
الـ Flex Steering
EBD - BA
فوانيس قدام و ورا ليد
كمبيوتر معلومات احدث من القديم فى الاعطال دلوقتى والسيرفس
حساسات ركن امامية
ممكن تختار من 3 الوان للفرش الجلد
مثبت سرعة
فيه Ambient light دلوقتى فى الصالون
وwelcoming light من برا فى مقابض الابواب والمرايات
تكييف Dual Zone وفيه Ionizer وفتحات تكييف خلفية
Active Eco System ومش مجرد لمبة بس بتنور وخلاص
دريكسيون telescopic
وSmart key بعد ما كان اتشال من القديمة
والجنوط الـ 17 باردوا رجعت تانى
وفى حاجات تانية باردوا جديدة بس كفاية دول
الكورى عربيات تشدك وتبهرك واول 3 سنين شغل تستحملك
والاوربى عربيه تحترمك وتامنك وعمرها فى يوم ماهتخزلك وبعد 10 سنين شغل هتلاقيها شاده حيلها ومكمله
انا بقيت شاعر ولا ايه بس من الاخر عمر افتراضى وفيه كل حاجه يبقى اوروبى
لكن كل حاجه وبدون عمر افتراضى يبقى كورى
طبعا كعادة المواضيع اللي فيها كوري و أوروبي و ياباني .
كل حجزب متعصب لحاجته
الكوري مش بيبيع هنا في مصر بس ....... الكوري بيبع في أمريكا بكميات رهيبة و لذلك أصبح من أكبر 5 صناع سيارات في العالم
و عربيات كوريا بتأخد 5 نجوم في أختبارات الامان في امريكا و في أوروبا و أستراليا .
الكوري له مميزات و عيوب و أصبح من من أفضل السيارات في العالم أجمع .
=================================
الخيبة علينا أحنا
اللي بنتمنى فيه اليوم نشوف عربيات أوروبي (اللي بيضربونا على قفانا ) أكتر من الكوري .... اللي تقريبا مش بيضرونا في حاجة .
كنت اتمنى أشوف عربية مصري عربي و تبقى هي البريمو و هي اللي الناس تقول هاجيبها .
الناس اللي بتقول الكوري مش بيعيش و و مش أمان
بقولهم يبقى حضراتكم بتتكلموا بدون تجارب
فيه ناس معاها كوري قديم من أول الأكسل و الأكسنت القدام و الدايو ......... و العربيات لسة شغالة و زي الفل .
من ناحية الامان
العربيات الكوري الجديدة كلها اللي بتنزل امريكا أو أوروبا لازم تدخل على أختبارات الامان و كلها بتعدي زيها زي المرسيدس و البي ام و أجدع عربية أوروبي .
أنا على فكرة مش معايا عربية كوري !!! ده ما ينفيش أن انتشار الشئ بيخلي شكله يبقى مش ظريف و أنك تتعود عليه و يفقد رونقه .
أنا بصراحة مثلا مش بطيق أشوف سيراتو و لا لانسر بومة ...... زهقت من شكلهم
مش متخيل واحد بيشتري عربية فرنسي وفرنسا لسه اول البارح كانت بتضرب فى مسلمين مالي.
مش متخيل واحد يشتري عربية ألماني والمانيا كل سنة بتدفع للصهاينة ملايين دعم.
مش متخيل واحد بيشتري عربية امريكاني وعارف ان امريكا نافخة المسلمين فى كل مكان والداعم الرئيسي للصهاينة وكانت عدو فى حرب اكتوبر 73 ونزل جنودها ومدرعاتها مع الصهاينة.
مش متخيل واحد بيشتري عربية من دولة عضو فى حلف شمال الاطلسي "الناتو" اللى بيدعك المسلمين فى كل مكان.
مش متخيل ان واحد بيدعم اقتصاد دولة عدو - عدو فى العلن او فى الخفاء- !!
دة احنا لو بنصدر لهم بطاطس ومش عجباهم بيسبوها تضرب فى المواني!!
دة احنا بنقعد نعمل اتفاقيات ومعاهدات وتفاهمات علشان نعرف نصدر لهم ملايتن قطن وكيسين مخدة!!
مالها العربيات الماليزي على الاقل دولة مسلمة فى صفنا وخدت خبرات واسعه من الدول التانية وعربيتها محترمة جداً تفوق عربيات كثير ماشية فى الشارع ، مالها العربيات الياباني ، مالها العربيات الكوري ، خلاص بقينا بنفتخر اننا بنشتري من اللى بيدبحونا!! يبقي حلال فينا الدبح فعلا!!
مفيش حد يقولي ماالحكومة بتتعامل معاهم والدول دي حلوة ، وبنركب طيارات ودبابات امريكي ، فأولا احنا مش الحكومة ، و لو الحكومة مجبرة احنا الشعب مش مجبرين ومش مضطرين !! ، ثانياً لو بناخد دعم عسكري دة تنفيذ لإتفاقيات ومقابل تسهيلات عبور فى قناة السويس ثالثاً يوم لما الدول دي بتدي لك سلاح بيكون في الاحدث منه بمليون جيل وملهوش تأثير عليها ولا على حلفائهم الصهاينة.
مثلا الحكومة مجبره ومضطره انها تتعامل مع الصهاينة ، هل دة معناه اننا نشتري منتجات صنع قى اسرائيل ونرفع اقتصادها ؟!!
طيب ما الحكومة مجبره انها تتعامل مع الدول اللى بتدي دعم للصهاينة وبتقتل وبتحتل بلاد المسلمين، هل دة معناه اننا نروح نشتري بضاعتهم وننقذ اقتصادهم ؟!!
يعني يقتلونا ويحتلونا وندفع لهم ثمن احتلالنا كمان ؟!!
كفاية حب للذل بقي.