الموضوع: وكيل دايو الغير محترم حكاية متجددة مبتنتهيش لو بتفكر تشترى الدايو لانوس أدخل

فى البداية السلام على كل عضو فى المنتدى الأكثر من رائع بجد أنا بحب المنتدى دة جدا لأنوا بيفيدنى جدا وبيزودنى بالمعلومات إللى بحب أعرفها وبيعرفنى على أراء أحسن أعضاء فى الدنيا أنا مش عاوز أطول على أحسن ناس بس الموضوع محتاج حبت تفاصيل شوية علشان أنا دمى محروقت شوية من الموضوع دة
فى البداية يوم الجمعة 15/08/2008
كنت فى مشوار بالعربية اللانوس 2006 مع أخويا فى مشوار والمهم وأنا بلف بالعربية فجأه حسيت بطقطقة فى قلب الدريكسيون محطيتش فى بالى وقولت ممكن تكون طوبة دوست عليها المهم خلصت مشوارى وأنا مروح لاقيت الموضوع متماشى جدا مع النقر بتاعت الطريق إللى متعودين عليها فى كل شوارعنا الحبيبة المهم أبتديت أحس أنى مقلق والموضوع أمتد للمطبات كمان وأنا طالع أو نازل من على المطب الطقة دى برضوا بتحصل بحسها فى الدريكسيون والمطبات وإللى زاد على كدة أنى بقيت بحسها فى الدواسات مع الدريكسون تمام المهم كلمت الصيانة علشان أعرف فى اية واحل المشكلة قبل ما تكبر وتفتح فى حتة تانية المهم أخدت ميعاد يوم السبت الموافق 23/08/2008
وروحت علشان أعمل الصيانة أخدت كتيب الصيانة زى العادة أنا عربيتى عاملة بالظبط 12500 كيلوا وهى من 14/6/2006 المهم المشى إللى مش كتير فى الوقت الطويل دة حاجة خلت التوكيل المحترم بتاعنا دة يعترض على أن أزاى عربية فى سنتين تعمل صيانتين بس وربطولى أن كل 3 شهور أعمل صيانة فى المركز بتاعهم وبينى وبينكم أنا واحد مش فاضى للموضوع بتاع طول بالهم دة لأنى بضيع أكتر من 6 ساعات علشان صيانة مبتاخدش أكتر من 30 دقيقة وفى الأخر لو ليك أى ملاحظات كنت قايل عليها بعد ال 6 ساعات أنتظار بتلاقى العربية زى ما ودتها أخدتها بل كمان أسوء ما بتكون موديها والمعاملة زى الزفت أصل دى ناس مش فاضية وشغلهم كتير ياعينى عاوزين يقلبوا الزبون علشان يخلصوا ويلموا فلوس وبس المهم أنا مشكلتى إللى بحكى فيها هى أن عربيتى فيها مشكلة فى البارات بعات العجل مع الدريكسيون والموضوع دة فى عدد كليوات قليل زى إللى أنا عاملها تعتبر عيب صناعة المهم أنهم قالولى أنى خارج من الصيانة بسبب عدم أنتظامى فى مواعيدها وطالبين منى رقم خرافى علشان الحاجات دى تتغير مع أن المفروض أنها تبقى على حسابهم لأنها حاجة بتاعتهم خلاصة الكلام الكتير أن أنا ليا رأى فى كام حاجة وهما
1- الوكيل غير محترم بالمرة
2- عربية أنا من رأئى أنها مش محترمة وخسارة فيها كل مليم أتدفع فيها
3- من عيوب العربية ضعف المتور من ناحية التجميع والتسارع وصوت العربية العالى وسوء التقفيل ورداءة الخامات مستخدمة وسوء العزل وضعف التكييف ومعدل الأستهالاك العالى للبنزين مع أنها 1500 وضعف الفارمل الواضح جدا وأخيرا وليس أخرا الأتزان والأمان فهو والحمد لله 0 % لأن العربية بتروح بعد ال 120
فى النهاية أنا بقول الكلام دة علشان أوضح صورة لكل الناس إللى ممكن تفكر فى العربية دى أنا ممكن أنصحهم نصيحة أخوية أبعد عن العربية دى لأن حرام فيها الفلوس وخسارة توكيل زى دة يكون موجود إللى بيفكر يشترى عربية يشيل الدايو من حساباتوا لأنوا لو جابها هيزعل أوى من قراروا أسف على التطويل أصدقائى الأعزاء بس أنا كان لازم أطول علشان الأفادة وعدم تكرار الخطأ لأن فلوسنا غالية علينا وحرام نرميها