اول خبطة بالعربية الجديدة .. انا عايز اعيط

**kazamodia** · 04-06-2013 02:29 PM

انا عايز اعيط والله

يا جماعة انهارده للاسف كانت الوالدة بتسوق وللاسف بعلمها قامت راجعة ورا بكل قوتها وخبطت في العربية اللي وراها جامد
طبعا كانت العربية bmw فمحصلهاش حاجة واحنا عربيتنا ادغدغت

انا مش عارف اعمل ايه انا رافع صورة اهي وعايز اعرف التلفيات ايه بالظبط .. والعربية على فكرة عليها تأمين مش عارف اعمل ايه بالظبط ومش عايز العربية تبقى رشة او حاجة .. وهل لو غيرت الاكصدام العربية ترجع فابريكة ولا ايه وعلى فكرة الفوانيس كده طلعت بره والشنطة مش راضية تقفل

قولوا لي اعمل ايه يا جماعة انا عايز اعيط والله دي مكملتش شهر

**kazamodia** · 04-06-2013 02:43 PM

يا جماعة انا كلمت التأمين من شوية وقال لي روح اعمل مقايسة ومش عارف كمان اعملها فين دي

**A.Saad** · 04-06-2013 02:50 PM

تقول الحمد لله الاول
تراضى الوالدة لو حست انك زعلان منها
المقايسة بتتعمل فى التوكيل
يعنى تروح التوكيل تعمل مقايسة وتخطر بيها التأمين
للاسف الصور مش باينة علشان الشغل عندى حاجبها
بس الاكصدام الجديد برده هيبقى راشش غالبا لان اغلب التوكيلات بتجيبه اسود وترشه

شغل قرآن كريم فى العربية اول ما تركبها واقرا المعوذتين عليها
كل الجديد بياخد العين كدة

**miceg** · 04-06-2013 02:50 PM

مقدر موقفك طبعا
بص ياباشا
هتكلم شركة التأمين وتنسق معاهم معاد المعاينة
بس المشكلة بالنسبالك فالشنطه أهم حاجة
ومش هتستني شركة التأمين لما تعاين والكلام الفاضي ده
بص انت تروح لسمكري يستعدل الكلام ده
وأنصحك بورشة نايل موتورز
هيردهولك عالبارد وان شاء الله البويه مش هتسقط

**MITSUKERO** · 04-06-2013 03:03 PM

بدام مأمن اطلع علي التوكيل فورا و اوعي تعمل اي شغل برة حتي لو الاكصدام اتغير هيتغير بواحد اصلي و لو طلبت الماحفظة علي الاكصدام و عدم تغييره هيوافقوا

الخبطة من كلامك واصلة للشنطة و حركت جسر الفوانيس فلازم تترد كويس و بنضافة علشان الفوارق متبوظشي

ربنا معاك

**kemoooo2020** · 04-06-2013 03:09 PM

فداك يا باشا والحمد لله انها جت على قد كده (مع انى حاسس بقهرتك ) وبعدين محدش بيعلم حد على عربية جديدة كده بس دى الوالدة يعنى فداها اى حاجة فى الدنيا و اعتقد ان الاكصدام يتصلح عادى والشنطة كمان تتصلح بس اهم حاجة ان الخبطة متكنش وصلت لجوة

**kazamodia** · 04-06-2013 04:09 PM

يا جماعة شكرا لمواساتي بس انا فعلا زهقان اوي ورحت لميكانيكي دلوقتي قال لي ممكن نردها على البارد وكتبلي مقايسة 800 جنية طبعا كتير اوي ومش عارف هو شاطر ولا ايه نظامه وبيقول لي العربية هتقعد يومين
وقال لو عايز ممكن نغير كل حاجة بس كل الحاجات دي هتترش

لو حد يعرف سمكري شاطر في القاهرة الجديدة او العاشر يا ريت يا جماعة تقولوا لي عليه اردها على البارد عنده
المشكلة بقا ان العربية خلاص جابت 1000 ولازم اوديها الصيانة والشنطة مش راضية تقفل يعني مش هينفع اجري بيها كمان على الدائري ومش عارف اعمل ايه دلوقتي وعندي امتحانات كمان يعني كل المصايب نازلة فوق دماغي

**Sa3D ALEX** · 04-06-2013 05:10 PM

ياباشا الموضوع بسيط جدا
اولا لو هتروح التوكيل هيغير الاكصدام وممكن يقوللك هيغير شنطه او تتصلح وكل ده هيترش وكده تبقى ضاعت فبريكه العربيه

ثانيا وده الحل الامثل علشان تحافظ على فبريكه العربيه هتروح لسمكرى شاطر وهيرد الشنطه على البارد ومش هتاخد يومين ولا حاجه هتاخد ساعتين زمن مش اكتر وهيفك الاكصدام وهيوديه لواحد بتاع فيبر وههيرد تانى بمنتهى السهوله علشان ده مرن والبويه مش هتتقشر ولا حاجه

والعمليه دى هتكلف حوالى 500 جنيه بالكتير اوووووى وده افضل حل و التأمين بيجى معاك فى اى حته واى ورشه فى الدنيا انت عايزها وميكبركش على ورشه معينه اطلااقا والمقايسه سهله والسمكريه فاهمين شغل لتامين كويس من كتر التعامل معاهم